Turia Somuso Dödö

Fehede andre eluaha ba li Niha wehede εὐαγγέλιον (evangelion) ba li Yunani, heza tesura zura Gamabu'ulali Sibohou. Me föna la'oguna'ö wehede andre ba wangombakha turia si fakhai khö razo. Duma-dumania angombakhata wa no tumbu khönia nono ma wa edöna tohare ia ba zi sambua banua ma zui wa so goi-goi sibohou same'e aoha noro dödö niha mbanua, btn. Bakha ba zura Gamabu'ulali Sibohou te'oguna'ö wehede andre ha ba zi öfa mbuku sanutunö waö-waö wa'auri Yesu i'otarai tumbu ia irugi mate ia ba manahae ba zorugo, ya'ia da'ö buku Mataio, Mareko, Luka ba Yohane. Duma-dumania ibörötaigö wanura buku khönia Mareko faoma fehede famasao andre, "Böröta duria somuso dödö andrö, khö Yesu Keriso", ba nahia "duria somuso dödö" andrö tesura ba li Yunani εὐαγγέλιον.

Tohare ba Indonesia wehede Yunani εὐαγγέλιον andre moroi ba li Arab إِنْجِيل si tobali injil ba li Melayu. Da'ö mbörö wa ba li Indonesia latötöi Duria Somuso Dödö andrö Injil. Töi Injil andre göi zi to'ölö la'oguna'ö bakha ba liturgi Gereja Katolik ba Danö Niha.

 

Molo'ö wangosili ndra ere Zura Ni'amoni'ö tesura zi öfa mbuku Injil andre ba gotalua ndröfi 66 ba 110, eluahania töra 30 fakhe aefa wa'amate Yesu. Ba mböröta lö fao tesura döi zanura ya'ia irege lö la'ila niha haniha oi zanura Injil andrö. Awena ba ngaotu ndröfia si-2 lanönö niha oi döi Mataio, Mareko, Luka ba Yohane, eluahania me no oi mate niha sangila ya'ira.

Molo'ö zinöndra ato gere Zura Ni'amoni'ö, si föföna sibai tesura ba ya'ia Injil Mareko. Aefa da'ö la'oguna'ö zura Mareko andre ya'ira sanura Injil Mataio ba Luka ba wanura Injil khöra, ba lanönö göi nidunö-dunö moroi ba gumbu sura bö'ö (ba gotaluania sura nibe'e töi Q ba gotalua ndra ere Zura Ni'amoni'ö).

Andrö asese lafotöi zi tölu mbuku Injil si föföna andre Injil sinopsis, börö me ösira bakha so zifagölö (nihalö moroi khö Mareko) ba so göi zi fabö'ö (nihalö moroi khö Q. Faigi gambara ba zinga sisa sangoroma'ö hewisa gamakhaita zi tölu mbuku Injil andre. Bakha ba gambara andrö latötöi gumbu Q faoma double tradition)

Injil Yohane tesura ara furi hö, ba la'oguna'ö ia ba gotalua ndra niha si tefaböbö ba gangowuloa nifotöi angowuloa khö Yohane.

• Mataio
• Mareko
• Luka
• Yohane
• Sura Ni'amoni'ö
• Amabu'ulali Sibohou