Buku Michelin Guide

Michelin no sambua perusahaan samazökhi gaolo-gaolo moto awö hondra (li Indonesia ban) moroi ba Prancis. Lafotöi ia guide, eluahania fanuturu lala, sanolo niha ba wanöndra heza so hotel awö nahia wamazökhi moto ba hondra na so zi tekiko. Buku andre tebörögö laraka töra otu fakhe si lalö. Töinia sindruhu Red Guide, ena'ö tefabö'öni ia moroi ba mbuku tanö bö'ö nifa'anö Michelin sotöi Green Guides, sambua buku same'e fanuturu lala si fakhai ba kota, daerah ba negara. Michael Guides no tobali fame'e bosi restoran fondrege tehöngö ba zi sagörö ulidanö. Ibe'e Michelin Guides tölu ndröfi ha khö restoran amilita fondrege fahöna. Restoran sanöndra ndröfi Michelin Guides tola latötöna wa itugu ato niha si möi manga khönia, eluahania tobali tandra wa monga'öla bisnis-ra. Ba khö niha sato, na möi ira ba sambua restoran si so ha'uga ndröfi Michelin Guide ba tola faduhu dödöra wa restoran andrö ehao sibai ia ba ö khönia fondrege ami ba moadu.

The Michelin Guides

Autor	Michelin
Negara	Perancis
Li	Perancis
Penerbit	Michelin
Baŵa terbit	1900

Me döfi si-1900 ha ambö 3.000 moto so ba Prancis. Ena'ö tola tedou wamawa moto, ba simanö göi wamawa gaolo-gaolonia, lafa'anö ya'ira sokhö pabrik gaolo-gaolo moto (Édouard ba André Michelin si fatalifusö) sambua buku si tola la'oguna'ö ya'ira sokhö moto faoma hondra ba wanöndra nahia heza tola la'a'azökhi moto ma hondrara. Labe'e töi mbuku andrö Michelin Guide. Labagi-bagi mbuku andre mato 35.000 ngawua khö niha sato lö böli (li Indonesia gratis). Bakha ba mbuku andrö lafa'oli gambara danö (peta), nahia heza tola lafalemba mesin moto, heza so hotel awö nahia wamawa wanikha moto si so ba zi sagörö Prancis. Öfa fakhe aefa da'ö, 1904, laraka wanuturu lala si fakhili ba Belgia ba simanö göi ba negara bö'ö ba Eropa.

Me aefa Wasuwöta Sebua I (li Indonesia Perang Dunia I) labulö'ö lala wama'anö ösi mbuku Michelin Guide. Iada'a oi lafaosa wama'oli restoran molo'ö kategori, lanönö göi hotel bö'ö (tenga ha hotel si so ba Paris) ba lö sa'ae labe'e bakha nifotöi iklan. Me itugu tehöngö Michelin Guide, labörögö wama'anö bosi wa'afahöna restoran. Oi lafatenge niha manga ba restoran ba ya'ira andre dania labe'e mbosi restoran andrö molo'ö hewisa nitöröra. Lö la'ombakha'ö khö zokhö restoran haniha ira ya'ira sanandraigö ö andre, ba lö göi la'ombakha'ö wa edöna labe'e mbosi restoran andrö dania. Moguna da'a ena'ö bosi wa'afahöna sambua restoran andrö sindruhu-ndruhu ba obyektif.

 

I'otarai me ndröfi 1936 la'etu'ö hewisa wame'e bosi wa'afahöna sambua restoran ba labe'e tandra khönia faoma tandra ndröfi. Itugu oya ndröfi isöndra sambua restoran itugu alaŵa mbosinia ba gotalua fefu resotoran.

•  : "Restoran si sökhi sibai ba kategorinia" (li Prancis, Une très bonne table dans sa catégorie)
•  : "Sökhi wondrino gö, lö maniasa we'amöi manga ba da'ö" (li Prancis, Table excellente, mérite un détour)
•  : "Fondrege ehao ba ami, lö maniasa we'amöi ba da'ö." (li Prancis, Une des meilleures tables, vaut le voyage).