Media Sosial

Börö me oya ngawalö nifotöi media sosial andrö, alua göi wa fabö'ö zöndra niha moroi ba definisi da'a yaŵa. Heŵa'ae simanö so sa'atö ni'ilada (li Indonesia fitur) oi so khönia:

1. Media sosial no ngawalö aplikasi nifazökhi molo'ö teknologi Web 2.0 interaktif.
2. Tuhonia ya'ia ngawalö nösi nifazökhi zangoguna ya'ia simane teks, komentar, foto ma video digital awö data si so börö wariawösa ba gu'ö andrö.
3. Lafazökhi ya'ira sangoguna profil si faudu ba sambua media sosial ni'oguna'öra he bolokha gu'ö (li Inggris website) ba he göi aplikasi, si no ifa'anö organisasi media sosial sangokhögö media sosial andrö.
4. Itolo media sosial wangebua'ö u'ö sosial (li Inggris online social networks) na ifakhai sambua profil zangoguna khö zangoguna bö'ö ma angowuloa tanö bö'ö.

Fehede sosial bakha ba döi media sosial eluahania sangoguna awö halöŵö zato no tobali tuho hadia ia ba nahia nifotöi platform andrö. Börö da'ö tola taŵa'ö wa media sosial no fasilitator ma zui sondrou'ö ngawalö gu'ö niha, u'ö ero zi samö-samösa samonönö wa'afakhai niha sato.

Sito'ölönia larugi ngawalö media sosial niha faoma aplikasi gu'ö si so ba komputer desktop ma zui faoma aplikasi media sosial si so ba wakake simane telefon gokhö sonekhe (li Inggris smartphone) ma zui kara wanura digital (li Inggris tablet). Me la'oguna'ö oi wakake andre niha, lafobörö nahia fondrege interaktif, heza tola lafazaewe, lafalulu-fohalöŵö, lafatunö, labulö'ö hadia ia zi no lafazökhi ba la'owuloi ira sangoguna bö'ö. Onönötania, la'oguna'ö media sosial ba wangirö'ö wanörö-tödö, ba wamahaö ya'ira ba ngawalö hadia ia, ba wangombakha'ö ya'ira ba niha, ba ba wariawösa, awö ba wondrou'ö söndra i'otarai ba wamazökhi nifotöi blog, podcast, video ba game. Amakhaita ba gotalua niha ba teknologi si lö mamalö tebulö andre no tobali fokus mbolo wangosili teknologi nifalua samö-samösa niha. Mato ha'uga mbolokha gu'ö media sosial fondrege populer, si so töra 100 juta zangoguna si no mamasura'ö töira, fao ba da'ö Twitter, Facebook (ba Facebook Messenger), WeChat, ShareChat, Instagram, QZone, Sina Weibo, VK, Tumblr, Baidu Tieba, ba LinkedIn. Ba gofu interpretasi, nahia bö'ö andre göi latötöi media sosial: YouTube, Tencent QQ, Quora, Telegram, WhatsApp, Signal, Line, Snapchat, Pinterest, Viber, Reddit, Discord, TikTok, Microsoft Teams, btn. Baero da'ö so nifotöi wiki, ya'ia da'ö bolokha gu'ö nahia wamazökhi sura nifalului niha sato (falulu fohalöwö).

Oi fabö'ö media sosial moroi ba media tradisional simane majalah, koran, TV ba radio töra-töra na lahörögö kualitas, fa'amuzaewenia, fa'oya kali so nösi sibohou, fangoguna'ö ya'ia, awö wa faudu ba dödö niha nösinia, ba falö alio taya manö ia. Baero da'ö so media sosial bakha ba nifotöi sistem transmisi dialogis eluahania oya gumbunia ba oya göi zangouna'ö ya'ia. Na media tradisional so ia ba nifotöi model transmisi monologis eluahania ha sambua gumbunia sadölö ba oya zangoguna'ö ya'ia. Duma-dumania, lafa'ohe'ö sagörö koran ba ato zangoroi'ö ya'ia (li Inggris subscriber), ifazaewe sambua program sambua stasiun radio ba zi sambua kota.

I'otarai me fondrege muzawili gu'ö digital (li Inggris internet), tola te'oguna'ö media digital ba wamazaewe hada ma zui ba wangila hadia hada sambua media. No tobali proses sibohou khö ndra ere wangosili ba wamareso hewisa lala wehede ba mbolo digital.

No la'ila ya'ira sohörögö media sosial wa so oya lua-lua positif ba negatif wangoguna'ö media sosial. Tola itolo niha ba wondrou'ö fariawösa ba komunitas he ba zi faolo omo ba he yaŵa ba gu'ö (li Inggris online) ba tola göi tobali ia fakake ba wamazaewe ngawalö waniaga ma fakake komunikasi efektif khö perusahaan, pengusaha, organisasi si lö mangalui hare (li Inggris non-profit organisation), partai politik ba famatörö. No göi la'ila ya'ira sohörögö wa itugu oya gerakan sosial sangoguna'ö media sosial tolbai fakake komunikasi ba organisasi ba ginötö alua wasöndrata politik niha sato (li Indonesia kerusuhan politik).

Tola göi la'oguna'ö niha media sosial ba wamazaewe turia satulö ba si lö atulö.