sanandrösa

Ensiklopedia andre no fabö'ö sibai ia moroi ba danö bö'ö, börö me tenga halöŵö zi hadauga niha ia, ba hiza no halöŵö nifalului zato.

Dozi ita tola mamonönö ngawua zura, tola tabulö'ö fefu zura si no so ena'ö abölö te'a'azökhi ia. Da'a ensiklopedia moroi khöda, soguna khöda, ba soguna khö ndraonoda mi föna. Hulö zimane wamasao daro-daro ba gambara andre. Börö wamalulu zato, daro-daro sabua andrö tola lafasösö ba hili irugi yaŵa Mbawömataluo. Na lö me na famalulu, lö tola alua ba mowua halöŵö andrö.

Ba dalu ndröfi 2020, oroma khö Sirus Laia ba Apolonius Lase wa ba grup WhatsApp Nono Niha, itaria lasura ba da'ö gohitö dödö wamalua seminar Li Niha. So zanguma'ö wa itugu ato Nono Niha sambö fahuhuo ba Li Niha. Töra moroi ba da'ö ato göi zi lö mangila sa'ae hewisa wama'anö sambua ndroto wehede si faudu ma zui hewisa wanura ya'ia, simane si tola ta'ila ba ngawalö nisura ba media sosial.

Ba hiza börö sindruhunia wa abölö omasi Nono Niha wangoguna'ö Li Indonesia: börö me no mo'ambö-amböta Li Niha. Oya wehede sasese te'oguna'ö ba Li Indonesia lö fangalinia ba Li Niha. Moroi na la'eregesi tödö wangalui fangalinia, latörö manö lala salio wangoguna'ö Li Indonesia.

Börö da'ö ifa'anö Sirus Laia sambua draft sotöi Program Pengembangan Bahasa Nias di Era Digital 2020-2025 nifaosatö tölu: dokumentasi, standardisasi ba promosi.

Ena'ö aoha khö Ndraono Niha wangoguna'ö Li Niha moguna ua te'owuloi fefu ngawua wehede ba Li Niha (fefu wehede si fakhai ba hada, sinumbua, aurifö ba tanö bö'önia). Da'a nifotöi dokumentasi.

Aefa da'ö moguna mufazökhi goi-goi saoha hewisa wama'oli ngaro wehede ba hewisa wanura ya'ia (standardisasi).

Baero da'ö moguna mufazökhi fakake same ena'ö aoha wanura ba Li Niha (keyboard ma fafa wanura si so hurufo ö ba ŵ) börö me lö dombua hurufo andrö ba keyboard si fagölötö.

Töra moroi ba da'ö moguna göi nifotöi pabrik bahasa Nias, ya'ia da'ö fangalui wehede moroi ba Li Indonesia si lö fangalinia ba Li Niha. Mu'alui wehede si no atua ba lö mu'oguna'ö sa'ae ma zui mamazökhi fehede si bohou ma zui muhalö moroi ba li tanö bö'ö simane Li Indonesia.

Awena ba waosatö si tölu moguna promosi Li Niha ba media sosial, same ena'ö populer oi wehede si bohou andrö irege tebörögö la'oguna'ö ia niha.

Draft program andrö tefahea khö ndra mato ha'uga niha me 16 Yuni 2020 ba sambua konferensi zoom. Fao dödö fefu zi fao ba rafe andre ba wamörögö halöŵö andrö ba te'etu'ö göi wangalui media ba wangirö'ö fefu wehede ni'owuloi (dokumentasi) andrö. Fatua lö musöndra zabölö sökhi mu'oguna'ö ua Google Drive.

Ba hiza oroma wa media andre ambö fagöna ba wamalua gohitö dödö program.

Lö ara aefa da'ö tefawu'a berkas-berkas moroi Google Drive andrö lumalö ba Wiktionary ba ba Wikipedia Li Niha. Me luo da'ö no so ba zosou'a (tahap inkubator) Wikipedia Li Niha, andrö wa ibörögö Sirus Laia wama'anö Wiktionary Li Niha. Furi hö tebörögö göi Wikibuku Li Niha. Ba hiza lö aefa gohitö dödö sebua moroi ba duduma hörö: mangoguna'ö Wiktionary, Wikipedia ba Wikibuku Li Niha tenga ha ba wangirö'ö ngawua wehede, ba hiza göi ba wangirö'ö (dokumentasi) fefu zanandrösa ba budaya ba sejarah Danö Niha.

Lö ara aefa da'ö oi monönö ira sangodödögö wangowuloi fehede ba Wiktionary ba sanura ngawalö zura ba Li Niha ba Wiki Li Niha. Halöŵö andrö mowua ia me aboto Wiktionary/Wikipedia Li Niha moroi ba zosou'a tobali resmi me 13 Yanuari 2021 (proposal tetema'ö me 17 Desember 2020). Da'a ngaluo wa'atumbu resmi Li Niha ba Wikimedia/Internet: 13.01.2021! Ya'ahowu!

1. Program Pengembangan Bahasa Nias 2020-2025 (Li Indonesia)
2. Tantangan mengembangkan bahasa Nias di Wiki (Li Indonesia)
3. New Wiki projects main challenge and the possible solution (Li Inggris)
4. Proposal untuk rapat perdana Wikipedia Nias (Li Indonesia)
5. Melestarikan bahasa Nias untuk siapa dan bagaimana (Li Indonesia)
6. Strategi mengembangkan bahasa Nias di era digital (Li Indonesia)
7. Program Pengembangan Bahasa Nias dalam Tiga Diagram (Li Indonesia)
8. Strategi mengembangkan bahasa Nias melalui konten bermutu (Li Indonesia)

Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö