Ourano

La caratelística percipal de Ourano ye l'anclinaçon de l sou eixe de rotaçon, quaije nobenta graus an relaçon cul praino de sue órbita; essa anclinaçon nun ye solamente de l planeta, mas tamien de sous anéis, satélites i campo magnético. Ourano ten la superfice mais uniforme de todos ls planetas por sue caratelística quelor azul-sberdeada, porduzida pula cumbinaçon de gases an sue atmosfera, i ten anéis que nun puoden ser bistos a uolho znudo; para alhá desso, ten un anielho azul, que ye ua sclusebidade deste planeta. Ourano ye un de poucos planetas que ténen un mobimiento de rotaçon retrógrado, similar al de Bénus. Ten 27 satélites al sou redror i un fino anielho de poeira. L sou diámetro eiquatorial ye de cerca de 51 118 Km, esto ye, quatro bezes superior al de la Tierra. Ourano queda a cerca de 2 870 000 000 de Km de l Sol, eiquibalente a 19,18 bezes la çtáncia de la Tierra al Sol. L'anclinaçon próssima a 90º de Ourano fá-lo girar praticamente "deitado"; por esso sues regiones eiquatoriales quedan mui fracamente spostas a la luç i a l'einergie solar la maior parte de l tiempo, specialmente por ocasion de ls solstícios de Ourano. L qu'inda permanece misterioso i sin repuosta clara ye l fato de la temperatura destas regiones nun séren menores de l que las temperaturas registradas ne ls polos; estes, an funçon de l'anclinaçon, quedan altarnadamente spostos l tiempo anteiro a la radiaçon solar. Ye probable qu'haba algun tipo de geraçon de calor i que la dinámica atmosférica deste planeta promoba, d'algua forma, l calecimiento de las regiones eiquatoriales, mas até l momiento nun hai cunsenso antre ls cientistas subre cumo esto se dá.

Cumposiçon i strutura anterna

L planeta ten ua densa atmosfera formada por ua mistura de heidrogénio i hélio que puode repersentar até 15% de la massa planetária. Ourano (assi cumo Netuno) ye an muitos aspetos un gigante gazoso cujo crecimiento se anterrompeu sin tener acumulado las grandes massas de ls gigantes planetas gazosos anternos Júpiter i Saturno.

Anclinaçon de l'eixe de rotaçon

Ourano ten un mobimiento de rotaçon retrógrado, similar solo cumo l de Bénus. Sou eixe de rotaçon ten quaije nobenta graus d'anclinaçon an relaçon al praino orbital. Durante sou período orbital de 84 anhos, altarnadamente, cada un de ls polos ye eiluminado permanentemente pul Sol, anquanto l'outro permanece na selombra.

Anéis

An 1977, fúrun çcubiertos ls purmeiros nuobe anéis de Urano. Durante ls ancuontros de la Voyager, estes anéis fúrun fotografados i medidos, tal cumo outros dous anéis. Ls anéis de Urano son mui defrentes de ls de Júpiter i Saturno. L'anielho épsilon sterior ye cumpuosto percipalmente por blocos de carambelo cun bários metros de diámetro. Ua çtribuiçon mui ténue de poeira fina tamien parece star çpersa pul sistema d'anéis. Puode eisistir un grande númaro d'anéis streitos, ó possiblemente anéis ancumpletos ó arcos d'anéis, tan pequeinhos quanto 50 metros d'anchura.

• Astronomie
• Planeta
• Sol
• Tierra
• Saturno