ივანე კრამსკოი

27 მაისი [ძვ. სტ. 8 ივნისი], 1837, ოსტროგოჟსკი, ახლანდელი ვორონეჟის ოლქი — გ. 5 აპრილი [ძვ. სტ. 24 მარტი ], 1887, პეტერბურგი) — რუსი ფერმწერი, გრაფიკოსი და სამხატვრო კრიტიკოსი.

ივანე კრამსკოი
დაიბადა	27 მაისი (8 ივნისი), 1837
დაბადების ადგილი	ოსტროგოჟსკი
გარდაიცვალა	24 მარტი (5 აპრილი), 1887 (49 წლის)
გარდაცვალების ადგილი	სანქტ-პეტერბურგი[1]
ჟანრი	პორტრეტი და საჟანრო ფერწერა

სწავლობდა პეტერბურგის სამხატვრო აკადემიაში (1857–1863). რუს რევოლუციონერ-დემოკრატთა იდეების გავლენით კრამსკოი იბრძოდა ხელოვნების იდეურობისა და ხალხურისათვის, რეალიზმის პრინციპისათვის. კრამსკოი მოძრავი მხატვრული გამოფენების ამხანაგობის „პერედვიჟნიკების“ ერთ-ერთი მთავარი შემქმნელია. ეწეოდა პედაგოგიურ მოღვაწეობა. შექმნა დიდი რუსი მწერლების, მეცნიერებისა და მხატვრების პორტრეტები (ლევ ტოლსტოი, 1873; ივანე შიშკინი, 1873; პავლე ტრეტიაკოვი, 1876; მიხეილ სალტიკოვ-შჩედრინი, 1879 — ყველა ტრეტიაკოვის გალერეა), რომლებიც გამოირჩევიან კომპოზიციის უბრალოებით, მკაფიო ნახატით, ფსიქოლოგიური სიღრმით. კრამსკოის პორტრეტები გამსჭვალულია მხატვრის ამაღლებული მორალურ-ეთიკური და ესთეტიკური იდეალებით, დემოკრატიული შეხედულებებით, რაც შერწყმულია მოდელის სახისა და შინაგანი სამყაროს ზუსტ და ოსტატურ გამოსახვასთან. ყოველივე ამან განსაკუთრებით იჩინა თავი რუსი გლეხების, უბრალო ადამიანების პორტრეტებში („მინა მოისეევი“, 1882, რუსული მუზეუმი, სანქტ-პეტერბურგი და სხვა). კრამსკოის შემოქმედებაში ერთ-ერთი მთავარი ნამუშევარია: „ქრისტე უდაბნოში“, 1872. კრამსკოიმ შექმნა აგრეთვე ნაწარმოებები, რომლებშიც შერწყმულია პორტრეტისა და თემატური სურათის ნიშნები („ნეკრასოვი „უკანასკნელი სიმღერების“ პერიოდში“, 1877–1878; „უცნობი ქალი“, 1883; „უნუგეშო მწუხარება“, 1884 — ყველა ტრეტიაკოვის გალერეა). ისინი გამოირჩევიან ადამიანის რთული სულიერი სამყაროს ხასიათისა და ბედის ამოკითხისადმი ინტერესით. კრამსკოის გვიანდელი პერიოდის ნაწარმოებებში თავი იჩინა სალონური სილამაზის ნიშნებმა.

•  
  ქალთევზები, 1871
•  
  მოხუცი კაცი ყავარჯნით, 1872
•  
  ქრისტე უდაბნოში, 1872
•  
  მხატვარი ივანე შიშკინის პორტრეტი, 1873.
•  
  ლევ ტოლსტოი, 1873
•  
  ივანე შიშკინი, 1880
•  
  მარია , 1880-იანები
•  
  ფიოდორ დოსტოევსკი განსასვენებელში, 1881
•  
  უცნობი ქალის პორტრეტი, 1883
•  
  ვლადიმერ სოლოვიოვი, 1885
•  
  ალექსანდრე III, 1886

• ქართული საბჭოთა ენციკლოპედია, ტ. 6, თბ., 1983. — გვ. 14.
• (რუსული) Долгополов, Игорь Викторович Мастера и шедевры: В 3 т. Т.2 — მოსკოვი: Изобраз. искусство, 1987.

 

არის გვერდი თემაზე:

ივანე კრამსკოი

• Ivan Kramskoi's gallery and biography
• Ivan Kramskoi Gallery at MuseumSyndicate დაარქივებული 2013-03-15 საიტზე Wayback Machine.