Silkiroðla

Silkiroðla er algengasta roðlutegundin á Íslandi.

Silkiroðla
Silkiroðla í garði nálægt Massy, Frakklandi.
Ástand stofns
Ekki metið (IUCN)
Vísindaleg flokkun
Ríki: Svepparíki (Fungi) Fylking: Kólfsveppir (Basidiomycetes) Ættbálkur: Hattsveppir (Agaricales) Ætt: Roðluætt (Entolomataceae) Ættkvísl: Roðlur (Entoloma) Tegund: Silkiroðla (E. sericeum)
Tvínefni
Entoloma sericeum Quél., 1872

Silkiroðla dökkbrún og silkiglansandi, stafurinn er 2-7 cm langur og hatturinn 1-5 cm breiður. Fanir silkiroðlu eru fyrst ljósgráar og svo rauðgrábrúnar en stafurinn er ljósgrábrúnn með silfruðum þráðum og klofnar þegar hann er handleikinn. Holdið inni í hettunni er ljóst.

Gró silkiroðlu eru 7,5-10,5 x 7-8,5 µm.

Silkiroðla er algengasta roðlutegundin á Íslandi. Hún er rotvera sem vex í graslendi, mest í gömlum túnum og beitihögum. Hún sprettur frá júlí til október.

Silkiroðla var með fyrstu sveppategundunum til að finnast í Surtsey. Hún fannst þar sumarið 2005 þar sem hún óx innan um vallarsveifgras og melgresi inni í máfavarpi sunnarlega á eyjunni.

Silkiroðla er ekki talin æt og jafnvel lítilsháttar eitruð.

Hún hefur milt mjölkennt bragð og mjöl- eða ávaxtakennda lykt. Skyld tegund, Entoloma sericoides hefur svipuð einkenni og silkiroðlan nema daufari lykt og brúnni lit.

•  
  Silkiroðla í garði nærri Massy, Frakklandi.
•  
  Nærmynd af fönum silkiroðlu í Washington-fylki í Bandaríkjunum.
•  
  Teikning af silkiroðlu í gamalli breskri sveppabók.