Էդինբուրգ Հաբ

19-րդ դարի կեսին Թագավորական մղոնում` սուրբ Ջայլզի տաճարից ոչ հեռու, կառուցվել է Սուրբ Ջոնի եկեղեցին (անգլ.՝ Tolbooth Kirk St. John)։ Շինարարությունը ընթացել է 1839-1844 թվականներին ճարտարապետներ Օգաստես Ուեբլի Պյուջինի և Ջեյմս Գիլեսպի Գրեմի նախագծով։

Նեոգոթիկայի ոճով կառուցված եկեղեցին, որն ուներ Էդինբուրգում ամենաբարձր` 73 մետրանոց սրաձող, միանգամից դարձավ Շոտլանդիայի մայրաքաղաքում գերիշխող տեսք ունեցող շինությունը։ Եկեղեցին գործել է մինչև 1979 թվականը, երբ փակվել է Շոտլանդիայի եկեղեցու և Շոտլանդիայի միավորված ազատ եկեղեցու (անգլ.՝ United Free Church of Scotland) միավորման հետևանքով։

Որոշ ժամանակ Սուրբ Ջոնի եկեղեցին չի գործել։ Միայն 1999 թվականի վերանորոգումից հետո այնտեղ տեղակայվել է Հաբը (անգլ.՝ hub)` էդինբուրգյան նշանավոր փառատոների շտաբն ու տեղեկատվական կենտրոնը։

Ներկայումս շինությունն ունի մի քանի սրահներ, որոնցից խոշորագույնը կարող է ընդունել 420 մարդ։ Կա նաև գրադարան և սրճարան։ Ներքին տարածքները տրվում են վարձակալությամբ տարբեր հավաքույթներ, հրավերքներ, հարսանեկան արարողություններ իրականացնելու համար։

Մեծ սրահը, որը կոչվում է «Վիկտորյայի սրահ», մինչև 2004 թվականը երբեմն օգտագործվել է խորհրդարանական նիստեր անցկացնելու նպատակով, մինչև Հոլիռուդյան պալատի դիմաց կառուցվել է Շոտլանդիայի խորհրդարանի նոր շենքը։

Հաբ` Էդինբուրգի միջազգային փառատոնի շտաբ

Հաբը մշտապես գործում է, այնտեղ անցկացվում են համերգներ և թատերական ներկայացումներ։ Տարեկան կենտրոն է այցելում ավելի քան 500.000 զբոսաշրջիկ։ Հաբի աշխատանքի բուռն շրջանը ամռանն է, երբ մեկը մյուսի հետևից անցկացվում են էդինբուրգյան հայտնի փառատոները։ Հարյուր հազարավոր մարդիկ աշխարհի տարբեր երկրներից ժամանում են Էդինբուրգ. քաղաքի բնակչությունը կրկնակի մեծանում է։ Պատահական չէ, որ Շոտլանդիան անվանում են համաշխարհային փառատոնային մայրաքաղաք։

Էդինբուրգի միջազգային փառատոնի տնօրեն Ջոնաթան Միլսը, պատասխանելով լրագրողների հարցերին, մեկնաբանել է, որ ամենամյա փառատոների գաղտնիքը բազմազանության, անմիջականության, անկաշկանդության մեջ է։