Borja Verea: Político galego do PPdG

É licenciado en Dereito pola Universidade de Deusto, máster en Administración Local pola Universidade de Santiago de Compostela e doutor en Dereito pola USC. É funcionario da escala de Interventores de Habilitación Estatal pertence tamén ao Corpo Superior da Xunta de Galicia.

Comezou a súa carreira de funcionario como secretario do Concello do Saviñao. No ano 2009 é nomeado Subdirector Xeral de Réxime Xurídico Local na Consellería de Presidencia, Administracións Públicas e Xustiza. No ano 2011 é designado Secretario Xeral Técnico da Consellería de Economía e Industria. No ano 2015, a consellería asume as competencias de Emprego, pasando a denominarse Consellería de Economía, Emprego e Industria sendo o titular da Secretaría Xeral Técnica ata a súa elección como deputado autonómico no ano 2020.

Nas Eleccións ao Parlamento de Galicia de 2020 foi de número 11 da lista do Partido Popular pola Circunscrición electoral da Coruña, obtendo acta de deputado autonómico.

Desde maio de 2022 é o presidente do PP de Santiago de Compostela tras gañar as primarias co 98.9% dos votos. O seu partido escolleuno para encabezar a súa candidatura nas eleccións municipais de 2023 en Santiago de Compostela.

Nas eleccións municipais de 2023, a súa candidatura con PPdG resultou a máis votada obtendo 11 concelleiros dos 25 totais, fronte a un BNG (que goberna actualmente) con 6 concelleiros e a un PSOE co mesmo número de actas (6 concelleiro); CA acadou 2 concelleiros.

Nas eleccións ao Parlamento galego de 2024, foi de número 5 pola provincia da Coruña., obtendo a súa acta de deputado tras os resultados acadados polo PPdG (40 escaños, 13 deles por esta provincia).

Ligazóns externas

• Parlamento de Galicia Arquivado 19 de setembro de 2020 en Wayback Machine.