John Maynard Keynes: Ecunumista Britannicu

U keynesianisimu, a nova economia keynesiana, u neu-keynesianisimu o u post-keynesianisimu sò currenti di pinsamentu esciuti da l'opera di Keynes.

Consideratu cume unu di più influenti teoriciani di l'economia di u seculu 20, Keynes participò à a Conferenza di Pace di Versaglia à a fine di a Prima guerra mundiale è à l'accordi di Bretton Woods. À propositu di a Conferenza di Versailles, hè cunnisciutu ancu pè a redazzione d'un libru annant'à ella, intitulatu E consequenze economiche di a pace, publicatu in u 1919.

Keynes hè u figliolu di un profesore d'università di logica in Cambridge. Fece e so studie in Eton è ghjunse in u Civil Service, corpu di alti funziunarii inglesi, eppò diventa professore d'economia pulitica. Cume Ricardo, hè diventatu riccu grazia à felici investimenti in borsa. Sara à spessu consiglieru di u guvernu. Diventa in 1942 Lord Keynes, barone di Tilton.

A so prima teoria fù u Trattatu nant'a muneta, ma a so opera maiore fù senza dubitu a Teoria generale di l'impiegu, di l'interessu è di a muneta (1936), chì face a critica di a Lege di Say, mostra e limite di u lascià-fà dapoi a fine di u seculu 19, è da chì offre novi stuviglii pè a messa in opera di politiche economiche. Cusì, per esempiu, e so opere funu impiegate dopu à a Seconda guerra mondiale in u quatru di u sviluppu di u Statu-providenza.

Keynes ghjera oppostu à i conservatori cume à i socialisti.

Una macroeconomia nova

Keynes contr'u «lascià-fà»

Incù u svilippu di i so mudeli macroecunumichi Mudellu IS-LM per esempiu, Keynes s'hè oppostu à i neu-classichi, principalmente à l'auto-rigulazione di i marcati, nuzione impurtantissima di l'ecunumia, da Ghjuvan'Battista Say à Léon Walras passendu pà Edgeworth. Per ellu, l'intervizione di u statu nant'à i marcati, principalmente quandu avemu un squilibriu trà l'offerta è la chiesta. Tassi o spese publiche ponu rigulà u marcatu di i beni è servizii è di fattu u marcatu di u travadda, fendu move l'entrata riale (W/P).

Una visione nova di a dumanda

Dapoi Ghjuvanni-Battista Say, l'economisti cunsideravanu chì ciò chì conta in un mercatu ghjè l'offerta ; a dumanda vene dopu, di manera automatica, secondu elli.

Ma pè Keynes, hè ancu necessariu d'avè una consommazione chì permette à i stock d'esse venduti.

Ghjè per quessa chì, quandu Churchill diminuisce u salariu di i minatori pè diminuisce u prezzu di u carbone inglese nant'u mercatu internaziunale, s'oppone à 'ssa misura, dicendu chì 'ssa calata di salarii si trasformerà in una calata di u putere di comprà, dunque di a consommazione è infine di a produzzione (postu chì dumanda ci ne serà di menu), cusì aummentendu u desequilibriu di l'economia.

Keynes ripiglia a sfarenza mustrata da Marx trà :

• u mercatu di i bè d'equipamentu
• u mercatu di i bè di consomazione

È dice dinò chì, postu chì i bè d'equipamentu sò produtti sopra cummanda, a dumanda hè (quasi) sempre uguale à a produzzione (è a produzzione uguale à a dumanda). Dunque, ci vole à analisà sopratuttu a dumanda di i bè di consommazione, postu chì nantu 'stu mercatu hè per scontru possibile d'avè un desequilibriu.

Un tale desequilibriu, dice Keynes, spiega perchè, in tempi di crisi, i produttori devenu vende a produzzione sottu à i costi di produzzione.

A disoccupazione

À tempu ch'ellu mostra ch'ellu pò esiste un desequilibriu nant'u mercatu di i bè di consommazione, Keynes sviluppa una teoria chì mostra cume hè possibile d'avè una disoccupazione sistemica, è micca solu frizzionale.

A muneta

Pè Keynes, a muneta ùn hè micca solu, cume pè i neo-classichi un stallone di valore è un stuvigliu di scambiu, hè ancu una riserva di valore. L'agenti economichi ponu mete soldi da cantu è risparmià.

• E consequenzie economiche di a pace, 1919
• Trattatu nantu a muneta, 1930
• Teoria generale di l'impiegu, di l'interessu, è di a muneta, 1936

• Histoire de la pensée économique, da Henri Denis, PUF, pagina 623 : «la pensée de Keynes»