i Cinc Principis Fondamentâi

Dutis lis edizions de Vichipedie a si basin su cinc principis fondamentâi, che a definissin lis sôs carateristichis:

1. 

   La Vichipedie e je une enciclopedie che a inclût i elements tipics des enciclopediis gjenerichis, des enciclopediis specialistichis e dai strolics. La Vichipedie no je un côl indiscriminât di informazions. No je une racuelte di sorzints primariis, ma pluitost un imprest pe divulgazion secondarie; no je un dizionari (par chel al è il progjet Wiktionary), ni un palc par esprimi lis vuestris ideis, ni un gjornâl (par chel al è Wikinews); e nol è nancje un lûc dulà fâsi promozion, o ben un banc di prove pe anarchie o democrazie. La Vichipedie no je un elenc di sîts, ni un puest par declarâ lis tôs opinions, esperiencis o argomentazions; ducj chei che a contribuissin a àn di sfuarçâsi di lâ daûr a lis nestris politichis par chel che al rivuarde la atendibilitât e il diviêt di ricercjis origjinâls.

2. 

   La Vichipedie e à un pont di viste neutrâl, ven a stâi che a vin di cirî di no esprimi un unic pont di viste intes vôs. Par evitâ chest, ogni tant si scuen ripuartâ lis diviersis teoriis leadis a chê vôs, teoriis che a van presentadis in mût clâr, imparziâl e supuartantlis cun riferiments precîs, cussì di fâ capî al letôr la teorie in discussion. Nissune angolazion e à di jessi presentade come la miôr teorie o la veretât ma e à di jessi supuartade il plui pussibil cun sorzints autorevui, in particolâr intes vôs plui dibatudis. Cuant che e ven fûr un conflit su la version plui neutrâl, si scugne blocâ la vôs e lâ indevant cul confront inte pagjine di discussion.

3. 

   La Vichipedie e je libare, il so contignût al è duncje modificabil di ognidun. Dut il test al è dât fûr sot de licence GNU Free Documentation License (GFDL) e al pues jessi citât o distribuît in acuart cun jê. Ten presint che lis vôs a puedin jessi cambiadis di ducj e no son sot il control di un singul; par chest cualsisei vôs zontade o cambiade di te e pues jessi a sô volte cambiade liberementri e tornade a dâ fûr de comunitât. No sta inserî materiâl protezût dal copyright o cun licencis in contrast cu la GFDL.

4. 

   La Vichipedie e à un codiç di compuartament: rispiete ogni utent de Vichipedie ancje cuant che no la pense come te; compuartiti cun creance, no sta cjapâtile masse e evite i atacs personâi o gjeneralizazions; no sta impeolâti in vueris di modifichis cuntun altri utent e cîr di no ripristinâ plui di trê voltis une vôs; visiti simpri che a son 4 072 vôs inte Vichipedie in marilenghe, su cui lavorâ e tabaiâ; fâs ce che tu fasis in buine fede, cence danegjâ la Vichipedie dome par puartâ indevant une tô opinion, e cjale al lavôr dai altris cun compagne buine fede. Cîr di jessi viert.

5. 

   La Vichipedie no à regulis fissis fûr che i cinc principis elencâts culì. Cîr alore di no jessi timit (Be bold) intal cambiâ lis vôs, parcè che tal plasè di dâ une man nol covente par fuarce rivâ ae perfezion. No sta vê pôre di cambiâ alc, parcè che dutis lis versions vieris di une vôs a son salvadis, par cui no tu puedis fâ dams no comedabii. Ma visiti ancje che dut chel che tu scrivis al è tignût di cont par chei che vignaran dopo...

• liniis vuide