Лявон Вольскі: беларускі музыка, паэт, маляр

Вікіпэдыя мае артыкулы пра іншых асобаў з прозьвішчам Вольскі.

Заснавальнік «Мроі», N.R.M. і «Крамбамбулі». Таксама граў і сьпяваў у гурце «Новае Неба».

Лявон Вольскі
Леанід Артуравіч Зэйдэль-Вольскі
Дата нараджэньня	14 верасьня 1965(1965-09-14) (58 гадоў)
Месца нараджэньня	Менск, БССР, СССР
Грамадзянства	Беларусь
Месца вучобы	Менскі дзяржаўны мастацкі каледж імя Аляксея Глебава
Занятак	маляр, пісьменьнік, паэт, сьпявак, журналіст, аўтар-кампазытар, выканаўца-запісвальнік
Гады дзейнасьці	1981 — цяпер
Жанры	рок
Інструмэнты	гітара фартэпіяна
Псэўданімы	Kanzler
Гурты	Мроя Новае Неба N.R.M. Zet Крамбамбуля
Бацька	Артур Вольскі
Маці	Сьвятлана Яўсеева[d]
Узнагароды
Сайт	lavonvolski.com
Лявон Вольскі ў Вікісховішчы

Лявон Вольскі нарадзіўся 14 верасьня 1965 году ў Менску. Ягоны дзед Віталь Вольскі — беларускі літаратар. Бацька, паэт Артур Вольскі, шмат пісаў для дзяцей, перакладаў зь пяці моваў і стаяў у першых шэрагах нацыянальнага Адраджэньня канца 1980-х — пачатку 1990-х. Сябра Саюзу беларускіх пісьменьнікаў (з 2010).

У 1981 годзе ў Менскай мастацкай вучэльні імя Глебава разам з Уладзімерам Давыдоўскім ён заснаваў рок-гурт «Фаварыт» (пасьля — «Мроя»).

У 1989 у разгар перабудовы «Мроя» прагучала на ўвесь СССР, запісаўшы на ўсесаюзнай студыі «Мэлёдыя» кружэлку «Дваццаць восьмая зорка». У 1994 годзе музыкі «Мроі» ствараюць новы гурт — N.R.M., які за 13 гадоў выпусьціў 8 альбомаў і трывала заслупаваў за сабой рэнамэ флагманаў беларускага року. Сумесныя праекты з удзелам Вольскага — «Народны Альбом» і «Я нарадзіўся тут» — сталі ў Беларусі культавымі, а «Gazeta Wyborcza» нават назвала «Народны альбом» галоўнай падзеяй 1997 году ў Польшчы. 30 сьнежня 2009 году выйшаў дыск «Такога няма нідзе», усе песьні якога сачыніў Вольскі і запісаў іх з шэрагам музыкаў (Русяй, Алегам Хаменкам, Уладзімерам Пугачам ды іншымі).

Акрамя N.R.M. Вольскі сьпявае і грае ў гуртах «Крамбамбуля» ды «Zet». Аўтар некалькіх кніг паэзіі. Ад 2010 году ўдзельнічае ў стварэньні перадачы радыё Свабода «Саўка ды Грышка», працуе дыктарам. Першая жонка Ганна Вольская (1975—2016) была музычным прадусарам. У іх ёсьць дачка Адэля (нар. у 1998). У лютым 2018 году пабраўся шлюбам з Мар’янай Вольскай, вядомай пад творчым псэўданімам Яня Ядвабная.

У канцы 2023 году беларускія суды ўнесьлі ў сьпіс экстрэмісцкіх матэрыялаў старонкі Вольскага ў Telegram ды Instagram.

У гурце «Мроя» быў вакалістам і клявішнікам. Аўтар тэкстаў гурта ULIS, (альбом Па-над дахамі (1995). У гуртах N.R.M., «Крамбамбуля» — вакаліст і рытм-гітарыст. Браў удзел у гурце «Новае Неба» ў якасьці рытм-гітарыста і бэк-вакаліста. А таксама вакаліст і рытм-гітарыст гурта «Zet». Пасьля негалоснай забароны выступаў N.R.M. пачаў актыўна выступаць сольна. У 2010 годзе выдаў сольны дыск «Белая яблыня грому» на вершы беларускіх паэтаў. У 2011 году музыкі гурту N.R.M. пачалі выступаць бяз Вольскага. З Ганнай Хітрык была прэзэнтаваная песьня «А я спадзяюся і веру». У 2012 годзе Вольскі пачаў выступаць з Паўлам Аракелянам, саксафаністам гурту Apple Tea.

Выпусьціў дзьве кнігі паэзіі: «Калідор» (1993) і «Фотаальбом» (2000). Разьмяшчаў артыкулы і апавяданьні ў «Нашай Ніве». Друкаваўся ў часопісе «Тэксты». Апавяданьне «Новая кватэра Казімера» ў зборніку прозы «Паветраны шар» зь бібліятэкі «Нашай Нівы». У 2011 пабачыў сьвет зборнік аповедаў «Міларусь» з сэрыі «Кнігарня пісьменьніка» Саюзу беларускіх пісьменьнікаў.

Як мастак аўтар некалькіх сатырычных коміксаў, надрукаваных у часопісе «Бярозка» ў першай палове 1990-х гадоў.

Вёў перадачу «Квадракола» на «Радыё Рацыя» ды Радыё 101,2.

Аўтар праграмы «Назад у будучыню» і «Шыльды» на тэлеканале Белсат.

Сольныя альбомы

• Куплеты і прыпевы (2008)
• Белая яблыня грому (2010)
• Грамадазнаўства (2014)
• Псыхасаматыка (2016)
• Гравітацыя (2019)
• Амэрыка (2020)
• Трыбунал (2021)

Супольныя праекты

• Народны Альбом (1997)
• Сьвяты Вечар 2000 (1999)
• Я нарадзіўся тут (2000)
• Прэм’ер Тузін 2005 (2005)
• Прэм’ер Тузін 2006 (2006)
• НезалежныЯ (2008)

• Д.П. ВОЛЬСКІ ЛЯВОН (Вольский Лявон, Volski Leanid) // Энцыклапедыя беларускай папулярнай музыкі / уклад. Дз. Падбярэзскі і інш. — Мінск: Зміцер Колас, 2008. — С. 62–63. — 368 с. — 2000 ас. — ISBN 978-985-6783-42-8

• Афіцыйная старонка Архіўная копія
• Старонка ў LiveJournal
• Беларускі авангард — Вольскі (вершы)
• «Асабістая справа» на афіцыйнай хатняй старонцы N.R.M. (копія з web.archive.org)
• КУЛЬТурныя людзі: Лявон Вольскі
• «Дасье» на N.R.M.. Наша Ніва. Архіўная копія
• Лявон Вольскі на старонцы «Хто ёсьць хто ў РБ»  (рас.)
• Інтэрвію з Вольскім на сайце Ultra-Music 30.05.2011