Апэра́цыя «Та́нэнбэрг» (па-нямецку: Unternehmen «Tannenberg») — кодавая назва нямецкай апэрацыі па масавым зьнішчэньні палякаў у пэрыяд Другой сусьветнай вайны (частка Пляну «Ост»).
Сьпісы палякаў (ням. Sonderfahndungsbuch Polen), падрыхтаваныя немцамі яшчэ да пачатку вайны, налічвалі болей за 61 000 прадстаўнікоў польскай эліты: актывістаў, інтэлігенцыі, навукоўцаў, актораў, дзяржаўных дзеячоў і інш., якія мелі быць зьнішчаныя. Чальцы нацыянальнае нямецкае меншасьці, які пражывалі ў Польшчы, дапамагалі ў падрыхтоўцы сьпісаў.
Плян быў створаны ў траўні 1939. Пасьля загаду Адольфа Гітлера для выкананьня апэрацыі «Танэнбэрг» было створанае адмысловае падразьдзяленьне ў Галоўнай управе імпэрскай бясьпекі (ням. Reichssicherheitshauptamt). Яно камандавала мноствам Einsatzgruppen der Sicherheitspolizei und des SD, сфармаваных з гестапа, крымінальнай паліцыі (ням. Kripo) і чыноўнікаў SD, якія тэарэтычна былі падпарадкаваныя камандаваньню Вэрмахту. Іхняя задача складалася ў тым, каб арыштаваць усіх людзей, пералічаных у сьпісах.
Сьпярша, у жніўні 1939, у Нямеччыне былі арыштаваныя і забітыя прыкладна 2000 актывістаў арганізацыяў польскай меншасьці. Другая частка апэрацыі пачалася 1 верасьня 1939 і скончылася ў кастрычніку, спрычыніўшыся прынамсі да 20 000 ахвяраў, забітых у 760 масавых расстрэлах, выконваных адмысловымі адзінкамі або Einsatzgruppen пры дапамозе рэгулярных частак Вэрмахту.
Акрамя таго, адмысловае фармаваньне было створанае на базе нямецкае меншасьці ў Польшчы (ням. Selbstschutz), чальцы якога навучаліся перад вайной у Нямеччыне дывэрсыйнай і партызанскай барацьбе. Фармаваньне было адказнае за масавы гвалт і за сваю благую рэпутацыю было распушчанае нацысцкімі ўладамі пасьля поўнай акупацыі Польшчы.
This article uses material from the Wikipedia Беларуская (тарашкевіца) article Апэрацыя Танэнбэрг, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.