Asidong Amino

An mga susing elemento kan sarong asidong amino iyo an karbon (C), hidroheno (H), oksiheno (H), asin nitroheno (N), alagad an ibang elemento iyo mahihiling sa gilid na kadena kan mga pirang asidong amino.

Harus 500 kan mga natural na asidong amino an bistado na kan 1983 (alagad 20 sana an yaon sa henetikong kodigo) sagkod pwedeng maklasipika sa nagkapirang mga paagi. Pwede sinda maklasipika segun sa panlaog na istraktural na minagang grupo na lokasyon bilang alpha- (α-), beta- (β-), gamma- (γ-) o delta- (δ-) na asidong amino; an ibang kategorya iyo relatibo sa polaridad, lebel nin pH, asin klase kan gilid na kadenang grupo (alipatiko, asikliko, aromatiko, na igwang hydroxyl o asupre, asin iba pa). Sa porma kan protina, an tada kan asidong amino an minaporma sa ikaduwang pinakadakulang komposisyon (tubig an pinakadakula) kan masel nin tawo asin iba pang tisyu. Lagpas sa saindang ganap bilang tada sa protina, an mga asidong amino iyo nagpapartisipar sa nagkapirang mga proseso arug kan transportasyong neurotransmitter asin biyosintesis.

Sa biyokimika, an mga asidong amino na igwang aminong grupo na nakatakod sa (alpha-) karbong atomo sunod sa carboxyl grupo iyo may partikular na importansya. Bistado sinda bilang 2-, alpha-, o α-asidong amino (harus henerikong pormula na H₂NCHRCOOH, kun sain an R iyo sarong organikong substituente na bisto bilang sarong "gilid na kadena"); kun sain harus ginagamit an terminong "amino acid" para sa mga ini. Kabali sainda an 22 na protinohenikong ("naghahaman-protina") asidong amino, na iyo nagsasalak sa mga peptidong kadena ("polypeptides") ngarig makaporma nin manlainlain na protina. An mga ini iyo gabos L-stereoisomers ("walahang" mga isomero), alagad an pirang mga D-asidong amino ("toohan") iyo nagyayari sa mga bacterial envelopes, arug kan neuromodulator (D-serine), sagkod sa ibang mga antibiyotiko.

•   Igwang relatibong medya para sa Amino acid duman sa Wiki Commons