Vulpes Lagopus: Especie de mamíferu

Les raposes ártiques distribúinse a lo llargo de les tundres del norte d'Europa, Asia y Norteamérica, incluyíes munches islles a les que llegaron caminando sobro'l xelu mientres les glaciaciones.

 

La raposa ártica tien unes oreyes pequeñes y una capa trupa de pelo blancu que-y dexa subsistir y cazar a temperatures estremes (d'hasta -50 °C). Nel branu, esta capa blanca de pelame llarga camuda por una capa pardu-abuxada de pelame más curtia. En Groenlandia documentáronse exemplares de pelame azulada, carauterística apreciada polos pelliteros y potenciada polos criadores.

Les raposes ártiques miden ente 35 y 55 cm de llargu. El pesu del machu ye 3,5 kg de permediu, con un rangu de 3,2 a 9,4 kg, y el de la fema de 2,9 kg, con un rangu de 1,4 a 3,2 kg.

Permanecen actives tol añu y son de los pocos animales que nun enviernen o emigren a otres rexones mientres l'iviernu. Suelen pasar sobro los bloques de xelu buscando xibartes varaos y carnáu abandonao polos osos polares, a los que siguen mientres díes. Estos suelen inoralos, anque diéronse casos d'ataques d'osos escontra raposes ártiques. Si dalguna raposa ye sorprendida pol destemple branizu a gran distancia de tierra firme, pue acabar nes fauces d'un tiburón. En tierra, los sos depredadores más frecuentes son el llobu y l'uxu de la especie bubo scandiacus.

El so principal alimentu consiste en pequeños mamíferos y aves, siendo la so principal presa'l lemin. Tamién consume güevos, y n'ocasiones da caza a los cachorros de foques. Davezu aliméntense del carnáu dexáu por carnívoros más grandes, como los osos polares. Cuando nun atopen carne, peracaben bagues y algues.

Esta especie aparéase en marzu, que ye'l mes cuando yá hai camaes de lemmings, que van dexar a la madre alimentase meyor; esta, nel mes de mayu, da a lluz una camada de cinco o ocho cachorros.

Mientres el branu, esta especie forma pareyes monógames que curien conxuntamente de les críes. Nos llugares onde falten los lemmings y otros pequeños mamíferos, como n'Islandia, les raposes ártiques aliméntense casi puramente d'aves marines.

 

Hai cuatro subespecies:

• Raposa ártica d'Isles Bering, Alopex lagopus beringensis
• Raposa ártica d'Islandia, Alopex lagopus fuliginosus
• Raposa ártica d'Isles Pribilof, Alopex lagopus pribilofensis
• Raposa ártica de Groenlandia, Alopex lagopus foragorapusis

• Nowak, Ronald M. 2005. Walker's Carnivores of the World. Baltimore: Johns Hopkins Press. ISBN 0-8018-8032-7
• Sistema Integráu d'Información Taxonómica. «Vulpes lagopus (TSN 622025)» (inglés).

•   Wiki Commons acueye conteníu multimedia sobre Vulpes lagopus  .

• State of the Environment Norway: Arctic fox.
• Smithsonian Institution - North American Mammals: Vulpes lagopus
  •   Datos: Q82738
  •   Multimedia: Vulpes lagopus
  •   Especies: Vulpes lagopus