謬論(粵拼:mau6 leon6;英文:fallacy;希臘文:λογική πλάνη / logikí pláni),粵語口語又有嗌做謬誤或者誤謬,正式嚟講係指一啲用咗錯誤嘅邏輯嚟做推理嘅論證,而簡單啲講就係指一啲有問題嘅說服手法。舉個例說明,白馬非馬係一個喺漢字文化圈好出名嘅謬論。呢個謬論簡單啲講係噉嘅:因為白馬有「白色」呢一樣馬冇嘅特徵,所以白馬唔係馬。呢一個論證查實係一個謬論,分析如下:喺包括文言文同粵文在內嘅多種語文入面,「A 係 B」呢句嘢有至少兩個可能意思-佢可以係指
白馬同馬的確唔係同一樣嘢,但白馬係馬嘅一種,即係話「白馬係馬」呢句嘢喺第一個意思上唔合理,但喺第二個意思上係合理嘅。喺白馬非馬呢個所謂嘅論證當中,論證嗰個人撈亂咗「白馬係馬」呢句嘢嘅兩個可能意思,所以就出咗個謬論。
謬論好常見,喺大眾媒體等嘅地方都成日會出現,而且手法層出不窮:謬論有時係一聽就知唔合理嘅,但有人會用某啲技巧將謬論打扮成就噉聽落好似合理嘅論證-目的通常係要呃同老點人;有陣時,啲人又會犯錯,唔覺意用咗個謬論嚟諗住撐自己嘅觀點;而無論動機為何,有好多人都會將一啲諗深一層就知係謬論嘅諗法好信誓旦旦噉講出嚟,講到呢啲謬論好似係不證自明嘅噉。
分析謬論對批判思考嚟講好重要:分辨謬論唔係一件易事,有陣時有啲謬論就噉聽落好有說服力;再加上好多時一個論證會有好多個組成部份,當中某啲合理某啲係謬論。哲學當中有一套對謬論嘅詳細分析-即係分析「邊啲謬論係常見嘅」同「呢啲謬論點解唔合理」等等嘅問題,會將謬論分成形式謬論同非形式謬論等嘅種類。而學識分辨邊啲論證係謬論會幫到一個人睇穿其他人用嘅謬論同諗一啲真正合理嘅論證出嚟。
「謬論」呢隻漢字字詞,可以算得上係英文 fallacy 嘅對應:
謬論喺日常用語嘅意思同嚴格學術分析上嘅定義有些少唔同:喺日常用語當中,謬論可以指泛指任何唔真確嘅諗法;不過喺嚴格嘅哲學同邏輯學分析上,謬論係論證嘅一種-一個用嚟嘗試說服人去信某啲諗法嘅論證包括咗一個特定系列嘅命題,呢柞命題當中有一部份係前件,啲前件之間會有啲邏輯關係,導致到成個論證得出一個結論,而個結論往往就係提出個論證嗰個人想說服人信嘅嘢,例如係以下呢幾句嘢噉,就係一個論證:
一個論證未必係真確同合理嘅-喺哲學上,謬論正正就係指一啲荒謬嘅論證:p. 12。喺廿一世紀,哲學同邏輯學界最常見嘅做法係將謬論分做兩大類-形式謬論同非形式謬論。
形式謬論指一啲結構上有問題嘅謬論。呢啲謬論有一啲唔合理嘅推理,搞到佢哋啲結論唔可以合理噉由前件嗰度推導出嚟-呢句嘢用邏輯學嘅行話講嘅話,就係呢啲論證衰喺唔具有邏輯效度。一個形式謬論實係有問題嘅,個謬論可以有真確嘅前件同埋結論,但問題係佢個結論唔可以合理噉樣由啲前件嗰度推出嚟,就算有一次半次俾個謬論咁啱撞彩撞到個真確嘅結論,個謬論都仲係包含咗一個唔合理嘅推理,所以下次用個謬論諗嘢嗰陣會得出唔真確結論嘅機會會好大。因為噉,一般認為,俾一個形式謬論做自己思考方式嘅一部份係會好容易得出唔真確嘅結論嘅。
有效嘅論證係形式謬論嘅相反:形式謬論衰喺佢啲結論唔能夠合理噉由前件嗰度推理出嚟。喺哲學同邏輯學上,「有效嘅論證」指緊某一類嘅論證,佢哋嘅結論係可以合理噉樣由啲前件命題嗰度推理出嚟嘅,所以如果佢啲前件命題係合理嘅話,噉佢個結論都實會合理(但如果啲前件唔真確,噉結論就未必真確)。用行話講嘅話就係,如果一個論證有效嘅話,噉前件真確會包保結論真確。
否定前項係一種常見嘅形式謬論,指個論證靠否定一個前件嚟否定個前項嚟「證明」個後項。一個否定前項嘅謬論結構係以下噉樣嘅:
舉個例說明:
否定前項呢個謬論可以用集合論嘅角度嚟思考。想像家陣有三個集, 、 同 ,當中 係 嘅子集(簡單講即係屬 嘅嘢冚唪唥都屬 ),而 係 嘅子集(睇下圖)。如果有嚿嘢屬 ,噉嚿嘢實會屬 ,但就算一嚿嘢唔屬 ,嚿嘢依然有可能會屬 。
肯定後項係另一種出名嘅形式謬論,意思係指一啲透過肯定結果嚟到「肯定」個前件嘅論證,可以話係否定前項嘅相對。結構如下:
又用返集合論例子,如果有嚿嘢屬 ,噉嚿嘢實會屬 ,但就算一嚿嘢屬 ,都唔表示嚿嘢屬 。舉多幾個例子說明點解肯定後項呢種論證唔合理:
順帶一提,喺邏輯學上,「如果 成立,噉 都會成立」( 符號: )呢啲句子就係所謂嘅直陳條件,如果「上述呢句句子成立」而且「 成立」,噉 都會成立;喺肯定後項謬論當中,講謬論嗰個人講「 成立,所以 成立」-問題係,
係兩句唔一樣嘅句子。
非形式謬論同形式謬論唔同,指一啲衰喺前件嘅內容有問題嘅謬論。非形式謬論可能係有效嘅,但就算一個論證有效,都只不過係表示「如果啲前件真確,噉個結論都會係真確」-即係話一個前件唔真確嘅有效論證係可以俾出唔真確嘅結論嘅。例如係頭先提到嘅直陳條件噉,假設家陣
噉嘅話 都實會成立,但問題係,假如提出論證嘅人因為手上資訊不足等嘅原因,搞到佢錯誤噉以為 成立( 實際上唔成立),噉呢個論證最後都會成為一個謬論,而且係一個非形式謬論。
論證 2 係一個有問題嘅論證。雖然佢個結論係真確,但佢成個論證依然有問題:論證 2 個結構同論證 1 嘅一個版,所以佢錯唔係錯喺個論證嘅結構,而係喺佢前件嘅內容嗰度-神犬拉西係一隻狗,唔係一個人。一個論證有一柞命題,啲命題有內容,而命題同命題之間以及命題同結論之間會有住因果等嘅邏輯關係,論證 2 啲命題同結論之間嘅關係冇問題,但佢嗰句前件嘅內容有問題。
直陳條件嘅結構係合理嘅-直陳條件嘅做法係有效嘅論證,而且亦都係一種喺數學同電腦科學等嘅領域嗰度都會用到嘅一種論證,但由啲例子嗰度經已睇得出,就算一個論證係有效嘅都好,如果啲前件有問題,噉個結論都可能會出事。因為噉,一個完全合理嘅論證一定要有齊兩樣嘢:個論證要有效,而且啲前件要真確。有咗一個有效而且啲前件真確嘅論證,就會達到一個本身真確又可以合理噉由前件推出嚟嘅結論。
非形式謬論可以用「錯嘅方法」嚟分類:
一字多意就係一種非形式謬論。好似係白馬非馬嘅個案噉,一個人嘗試說服人相信「白馬非馬」呢一個荒謬嘅結論。佢用咗一連串似是疑非嘅論證,好古惑噉利用咗「非」呢個字嘅歧義,因為非一字-同埋個字喺上古漢語以及文言文等語文嘅對應-可以有最少兩個唔同嘅含意,解做「唔等同」又得,解做「唔屬於」又得,所以「白馬非馬」呢句嘢有兩個可能嘅定義:
第一句嘢係真確嘅,因為馬仲包含咗黑馬同灰馬等多種嘅馬,所以白馬同馬唔係同一樣嘢,但白馬係馬嘅一種,所以第二句嘢係唔真確嘅。講嘢嘅人利用咗關鍵詞彚嘅歧義嚟詏「白馬唔係馬」,犯咗一字多意嘅謬論。佢個詏法流程如下:
呢個係一個非形式謬論,佢個結構如下:
呢個論證嘅結構好合理,問題在於公孫龍跟手將「白馬同馬唔相等」呢個合理同真確嘅結論攞嚟詏「白馬唔屬於馬」。
唔啦更謬論係一種非形式謬論,指講緊謬論嗰個人個論證未必係唔合理或者唔真確,但實際上根本冇處理到講嗰個人處理緊嘅問題,諗深一層就知道同講緊嘅嘢冇啦更。啲人之所以會犯唔啦更謬論有好多原因,有啲人可能係唔覺意,但又有啲人係因為唔夠人詏所以專登用呢類手法詐詐諦引開注意力。唔啦更謬論有好多種:
人身攻擊謬論就係一種俾人指喺政治場合成日都見到嘅唔啦更謬論,指啲人-通常因為撞到對手講咗一個自己搞唔掂嘅論證-而忽視對方個論證,改為攻擊對手,質疑對方嘅人格、動機、態度、地位、階級或者處境,好似係以下呢場對話入面嘅 B 君噉:
喺呢場對話入面,B 君避開唔直接噉應對 A 君個論證,而改為攻擊佢嘅個人動機,但哲學界一般認為,一個描述緊客觀事實嘅論證合唔合理係唔應該受制於講嗰個人嘅身份嘅,而正如 A 君所講嘅噉,無論呢啲理據由一個天主教徒、佛教徒定係任何人開口講出嚟,都仲會係理據。B 君用人身攻擊嘅原因有好多,可能佢覺得佢冇能力正面噉回應 A 君個論證,又或者佢真係以為人身攻擊可以幫到佢否定 A 君啲證據。
草人謬論係一種好出名嘅唔啦更謬論,指講緊謬論嗰個人將對手提倡嘅立場講成第個易駁啲-但實際上根本唔啦更-嘅立場,然後再辯駁呢個易駁嘅立場,駁完之後仲要扮到好似成功噉駁斥咗對手真係主張緊嗰個立場噉。由頭到尾,講緊謬論嗰個人查實都係喺度攻擊緊一個佢對手冇主張過嘅立場。好似係以下呢個例子噉樣:
使用草人謬論嘅手法步驟如下:
草人謬論係唔啦更謬論嘅一種:因為草人謬論根本冇應付到對手個立場,而係靠講一啲唔啦更嘅嘢扮到好似駁到對手個立場噉。
以下係哲學同邏輯學上比較常分析嘅謬論類型:
...等等。
...等等。
認知心理學研究人嘅認知功能,包括思考,所以有認知心理學家研究「點解好多人都會受到諗深一層就知係謬論嘅論證說服?」嘅問題。喺最基本上,認知心理學界一致贊同嘅係,人之所以會信謬論,其中一個主因係啟發法:人並唔係完全理性嘅,而係會用好多「多數時候都啱使」嘅思考捷徑嚟務求快速噉處理資訊,呢啲思考捷徑就係所謂嘅啟發法,例如人好多時都唔夠時間處理嗮理解一個論證所需嘅知識,於是就改為靠睇講嗰個人嘅人品嚟對個論證作出判斷-可能會出現人身攻擊謬論。
貝葉斯腦假說係認知科學上嘅一個假說。根據貝葉斯腦假說,一個心靈學習嗰陣係做緊貝氏推論,即係話個心靈會透過自己過去嘅經驗,計算一大柞機會率數值,以此表示自己對「世界係點運作」嘅認識,而呢個知識表示就係所謂嘅「對世界嘅內部模型」-假想有兩件事件, 同 , 係 發生嘅機會率, 係 發生嘅機會率,根據貝葉斯定理, (已知 發生咗, 發生嘅機會率)可以用以下呢條式計:
舉個例說明,有一個地區,個地區嘅人當中有 0.1% 嘅都有一隻病( );而家有個新測試(「測試出陽性反應」係 ),而打前嘅醫學研究顯示,如果個病人真係有嗰隻病,個測試有 90% 機會呈陽性反應( ),但就算個病人冇嗰隻病( ),個測試都有 9% 嘅機會呈陽性反應( , 大約係 0.1)。家吓有個住喺呢個地區嘅人去做咗個測試,出咗陽性結果,用貝葉斯定理嚟計嘅話,佢真係有嗰種病嘅機會率( )大約係 10% (個測試唔多靠得住)。
有學者指,某啲類型嘅謬論之所以能夠說服人,可以用貝葉斯腦假說嘅原理想像:多數人唔夠時間資源處理嗮「做完美理性判斷」所需嘅資訊;所以佢哋就要用思考捷徑判斷「睇緊嗰個論證係正確」嘅機會率( ),而佢哋可能因為過往嘅經驗而學到「如果某個人嘅身份係噉噉噉( ),佢提出嘅論證係錯誤嘅機會率( )會好高」,並且靠呢種認知捷徑做判斷,就會引致人身攻擊謬論可能出現。
人類史上第一個有系統噉分析謬論嘅人係公元前 384 - 322 年嘅古希臘哲學家阿里士多德;阿里士多德嘅定言三段論為論證結構定立咗個基礎-佢指出有好多常用嘅思考方法都係諗深一層就知有問題嘅,佢將佢所觀察到嘅謬論列嗮出嚟;跟住佢仲分析呢啲謬論點解有問題,並且將嗰時觀察到嘅謬論分做「語言謬論」同「非語言謬論」兩大類-前者指一啲因為用字遣詞相關嘅問題而起嘅謬論,例如係用字不當或者一字多意等嘅問題,而後者指同講嘅內容相關嘅謬論,就算換返啲字眼都仲會係錯。
到咗家陣,阿里士多德嗰個謬論分類法經已好少可有人用,不過佢嘅思想係邏輯學嘅根基,而打後嘅哲學家仲有繼續將呢套思想發展上去:例如著名嘅 17 世紀英國哲學家培根都有落筆探討有關謬論嘅議題;而澳洲哲學家同邏輯學家咸貝連喺 1970 年出咗本書專講謬論相關嘅問題,係現代第一本成本都淨係講謬論嘅書,哈姆貝林批評當時嘅哲學教育唔夠重視由邏輯學嘅角度分析謬論,俾人指係令到廿一世紀哲學再重視研究謬論嘅原因之一。
以下係一啲講謬論嘅文獻:
而以下就係一啲講謬論嘅古典文獻:
This article uses material from the Wikipedia 粵語 article 謬論, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.