馬騮

馬騮同人一樣，係雜食動物，以生果，雀蛋，昆蟲為主，睇佢咩品種。馬騮進食後吐出或屙出嚟嘅種子，可以喺第啲林地生長，而馬騮亦係大型食肉動物（例如：豹）嘅食物來源，對森林生態好有貢獻。

馬騮可以話係亞洲嘅產物。分布印度、東南亞（泰國，馬來西亞，越南）、中國大陸（海南島，廣東，廣西）、臺灣，香港等地。可分3個亞種。

 

喺印度等地方，因為馬騮所住嘅森林大受破壞，令佢哋被迫走入市區搵食，結果令佢哋變成賊仔，識得打開雪櫃，搶飯盒，造成滋擾。中國一啲農地，亦都係因為森林逐漸減少，吸引唔少馬騮走去偷食，造成猴患。

香港現況

喺香港郊野公園所見嘅品種，主要以恆河猴為主，另外重有長尾獼猴同佢哋嘅雜種，以前香港係恆河猴嘅原產地之一，但相信已經絕種。現時啲人見到嘅馬騮，聽講係後期有人刻意放生，再變成而家嘅野生品種。

野生馬騮最多出現喺「馬騮山」。人養而開放畀公眾嘅有嘉道理農場，而家舊「鹿苑」改建為馬騮籠，有三隻馬騮，二仔一女。而以前荔園動物園亦都有養馬騮。

馬騮係中國嘅12生肖之一，排第九。

關於馬騮個名點蒞，有唔同講法：

據講以前馬舍有瘟疫，之後放馬騮喺馬籠度養，跟著啲馬就無事啦。所以後來就用「馬騮」嚟代表「猴」。

同馬冇乜關係，馬騮係古代中文「猱」嘅反切音^{[未記出處或冇根據]}，猱即係猴。馬騮舊時又叫「馬留」或「馬流」。 壯語以maxlaeuz【ma˦˨ lau˧˩】指「猴」，讀音接近粵語「馬留」文讀音，所以「馬騮」應該係壯語音譯。

• 《香港獼猴》ISBN 962-07-5396-8
• 《香港陸上哺乳動物圖鑑》ISBN-13 978-988-211-331-2，ISBN-10 988-211-331-1
• 《野生動物報導文學系列：走樣的臉孔》 ISBN 962-86308-3-0

• 香港哺乳動物