亞洲象

目前，亞洲象分布喺印度、尼泊爾、斯里蘭卡、緬甸、泰國、越南、印尼同馬來西亞，響中國以前分布亦好廣，由黃河以南大部分地方都有，但而家就只剩底雲南西雙版納一帶先至有。過往可再分4個亞種：印度象、錫蘭象、馬來西亞象、蘇門答臘象。此外，重有幾個亞種，馬來西亞有一種亞洲象亞種 —— 婆羅洲侏儒象，體型更細，係最近幾年先至俾人發現。

亞洲象響南亞國家馴服咗嚟使，響交通唔方便嘅森林搬木材等。相比之下，非洲象其實都可以馴養，只係冇亞洲象咁「機智靈敏」啫。

古代亦有人訓練做戰象，馬其頓嘅亞歷山大大帝進攻印度時，就係俾佢哋從未見過嘅戰象擊敗。

亞洲象響古代中國唔單止係南方鄰國進貢嘅禮品，皇家多馴養象用於典禮時顯示威儀，甚至用嚟打仗。古時響黃河流域重係用嚟耕田嘅家畜。響《呂氏春秋》裏面，亦記載咗商王曾經騎象攻打東夷部族。古時亦有「曹植稱象」嘅故仔 。

響泰國，象係國家象徵。泰國好多府嘅府徵都有象嘅圖案。相傳白象為古時泰北嘅蘭納泰王朝帶嚟幸運，自此成為泰國嘅國寶。泰國皇室勳章最高級嘅係皇家白象勳章。因為2006年從2月到7月大象嘅數目增長三倍有多，而家喺泰國主要用象嚟當車咁租畀人。11月1日定為象節，嗰日會揀一啲強壯嘅大象，嚟參加拔河、舉重、踢波、越障礙跑等比賽項目嘅大象運動會。

喺斯里蘭卡，亞洲象被視為莊嚴嘅象徵。而喺印度，就被視作吉祥物，佢哋成日出現喺重要嘅禮儀慶典。

喺美國，第一隻入境嘅亞洲象係喺1796年，而第一個文獻記載嘅圈養亞洲象出世記錄喺1875年，位於Missouri嘅Saint Joseph裏面。

喺香港，雖然重未發現過亞洲象嘅化石，但學者估計，后海灣沼澤森林同吐露港一帶附近亦曾經出現過。因為廣東、廣西一帶響 17 世紀初（明朝末年）仍然有亞洲象，嗰時軍隊中重有一隊用嚟做運輸同騎嘅大象。

大象天奴係以前荔園動物園所養嘅亞洲象，可惜響1989年2月染急性肺炎而人道毀滅。其後亦有兩次有大象從泰國運港作短期展出。而1975年嗰時，據講泰國有一個馬戲團嚟過香港表演，但反應唔理想，於是將 9 隻大象寄居荔園，重要籌錢將嗰班大象送返泰國。

•  
  亞洲象食緊西瓜
•  
  亞洲象嘅骨架
•  
  斯里蘭卡象搬嘢
•  
  雌性亞洲象 Elephas maximus 喺英國嘅動物院