వక్కంతం సూర్యనారాయణరావు: రచయిత

ఇతడు అనేక కథలు, నవలలు, ఆధ్యాత్మిక రచనలు, అనువాదాలు రచించాడు. ఇతని కుమారుడు వక్కంతం వంశీ తెలుగు సినిమా రచయితగా రాణించాడు.

వక్కంతం సూర్యనారాయణ రావు
జననం	1942 అరికెల గ్రామం, చిత్తూరు జిల్లా
వృత్తి	రచయిత
పిల్లలు	వక్కంతం వంశీ
తల్లిదండ్రులు	వరదయ్య (తండ్రి)

ఇతడు ఆంధ్రప్రదేశ్ రాష్ట్రం, చిత్తూరు జిల్లా, అరికెల గ్రామంలో 1942లో జన్మించాడు. ఇతనికి బాల్యం నుండే దేశభక్తి, సామాజిక స్పృహల పట్ల అవగాహన ఉంది. ఇతడు పాఠశాల ఫైనల్ వరకు చదువుకున్నాడు. ఇతడు బాల్యంలో తన మొదటి కథను పిల్లల కోసం వ్రాసి తన తండ్రి వరదయ్యకు చూపించాడు. అది చదివిన వరదయ్య తన కుమారుని ఎంతగానో ప్రోత్సహించాడు. రచనలు చేయడానికన్నా ముందు అన్ని రకాల పుస్తకాలను చదవమని సలహా యిచ్చాడు. అతడు తను కుమారునికి టెంపోరావు డిటెక్టివ్‌ నవల "ఇతన్ని నమ్మకండి"ను బహూకరించాడు. తండ్రి సలహా ప్రకారం ఇతడు తన బాల్యంలో అన్ని రకాల పుస్తకలను విరివిగా చదివాడు. ఇతడు ప్రముఖ డిటెక్టివ్ రచయిత "టెంపోరావు"కు అత్యంత సన్నిహితుడయ్యాడు. టెంపోరావు ఇతనికి రచనలలో మెళకువలను నేర్పించాడు. ఇతడి రచనలను ఎంతగానో ప్రోత్సహించాడు. టెంపోరావు ఇతడిని తన రచనా వారసుడిగా ప్రకటించాడు.

ఇతడు తన దృష్టిని సమాజంలోని సమస్యల పట్ల ముఖ్యంగా స్త్రీల మానసిక, శారీరక సమస్యలు, వారికి జరుగుతున్న అన్యాయాలపై సారించాడు. ఇతని మొదటి నవల "అబల ఆంతర్యం" 1966లో ప్రకటించబడింది. ఈ నవలను మద్రాసులోని ఒక పబ్లిషర్ ప్రకటించాడు. ఈ నవలకు ప్రచురణ కర్త ఏ పారితోషికం ఇవ్వలేదు. అసలు ఈ నవల ప్రచురిస్తున్నట్టు కూడా తెలియజేయ లేదు. ఇతనికి ఒక ప్రతి కూడా పంపలేదు. ఇతడు ఎంతో శ్రమకోర్చి మద్రాసు వెళ్లి ఈ నవల కాపీ ఒకటి కొన్నాడు. రచయితగా ఇది ఇతని తొలి అనుభవం. అప్పటి నుండి ఇతడు స్త్రీ సమస్యల పట్ల అనేక నవలలు, కథలు వ్రాశాడు. ప్రముఖ సినీ రచయిత ఆచార్య ఆత్రేయ ఇతని రచనల పట్ల ఆకర్షితుడై ఇతడిని "మగ రచయిత్రి" అని కొనియాడాడు.

1980 నుండి ఇతడు పూర్తిస్థాయి రచయితగా మారాడు. ఇతడు తన డిటెక్టివ్ నవలలను, కథలను వి.ఎస్.రావు అనే పేరుతోను, ఆధ్యాత్మిక, సాంఘిక రచనలను తన పూర్తి పేరు వక్కంతం సూర్యనారాయణరావు అనే పేరుతోను ప్రకటించాడు. ఇతడు ఇంకా 'బాటసారి', 'కౌండిన్య ', 'సూర్యాత్రేయ ', 'చిత్రభాను ' అనే కలంపేర్లతో రచనలు చేశాడు.

ఇతడు 84 కు పైగా క్రైమ్‌, డిటెక్టివ్ నవలలను, స్త్రీవాద నవలలను, నాటకాలను, ఆధ్యాత్మిక రచనలను చేశాడు.ఇంకా ఇతడు వందల కొద్దీ భక్తి పాటలను వ్రాసి క్యాసెట్లుగా విడుదల చేశాడు.

ఇతడు టెంపో అనే డిటెక్టివ్ పాత్రను సృష్టించి సుమారు 12 నవలలలో ఆ పాత్రను హీరోగా చేశాడు. ఈ పాత్రకు తన అభిమాన రచయిత టెంపోరావు ప్రేరణ. టెంపోరావు మరణించిన తర్వాత ఈ టెంపో పాత్ర సృష్టించబడింది. ఈ పాత్ర తెలుగు పాఠకులలో ఎంత ప్రాచుర్యం పొందింది అంటే ఆ పాత్ర సజీవమైనదని ఎందరో నమ్మారు.

ఇతడు తిరుమల తిరుపతి దేస్థానం వారి "దాస సాహిత్య ప్రాజెక్టు"లో అనువాదకునిగా పనిచేశాడు. ఈ సమయంలో ఇతడు చాలా ఆధ్యాత్మిక రచనలను కన్నడ భాష నుండి తెలుగులోనికి అనువదించాడు. వాటిని తి.తి.దే. వారు ప్రచురించారు.

ఇతడు అనేక పురస్కారాలను, బహుమతులను అందుకున్నాడు. ఇతని మోడల్ కథ హిందీ అనువాదం భారతీయ విశిష్ట కహానియాఁ వార్షిక సంచికలో ప్రచురింపబడింది. ఇతని రచనలపై ఒక విద్యార్థి శ్రీ వెంకటేశ్వర విశ్వవిద్యాలయంలో పరిశోధన చేసి డాక్టరేట్ సంపాదించుకున్నాడు. ఇతని స్త్రీ ప్రధాన సాంఘిక నాటకం న్యాయదుందుభి మనస్విని - ఆత్రేయ లిటరరీ అవార్డును గెలుచుకుంది. అదే నాటకానికి కుప్పం రెడ్డమ్మ సాహిత్య పురస్కారం లభించింది. యత్రనార్యస్తు బాధ్యంతే నాటకానికి సోమేశ్వర సాహిత్య పురస్కరం లభించింది. గౌరీ కళ్యాణం నాటకానికి ఎన్.టి.ఆర్. విజ్ఞాన్ ట్రస్ట్ అవార్డ్ లభించింది. చతుర నవలల పోటీలో సంభవామి గృహే గృహే నవలకు మూడవ బహుమతి లభించింది. ఆటా (అమెరికన్ తెలుగు అసోసియేషన్) వారు నిర్వహించిన నవలల పోటీలో ఇతడు వ్రాసిన మదర్ ఇండియా నవలకు రెండవ బహుమతి లభించింది. ఈ నవల నవ్యవీక్లీలో ధారావాహికగా ప్రచురింపబడింది.