تیرانا

تیرانا (tirana) بہت قدیم آبادی ہے۔ اتھوں 30،000 توں گھن کے 10،000 سال پراݨے اوزار ملن۔ ایہ آثار ایندے قریب کوہ داجتی تے مختلف غاراں اچوں ملے ہن۔ ایندے علاوہ مختلف قلعیاں، عمارتاں تے عبادت گاہواں دے آثار وی ملے ہن۔ ہک قلعہ جیہڑا 520 قبل مسیح اچ تعمیر تھیا ہئی، جینکوں احمد پاشا نے اٹھارویں صدی اچ دوبارہ بحال کیتا، اچھی حالت اچ موجود ہے۔

شہر دا سب توں بہترین دور عثمانیہ سلطنت دا ہے جیندے اچ شہر نے بے حد ترقی کیتی۔ ایہ دور 1418ء توں گھن کے 1912ء تک رہیا۔ ترکاں نے 1431ء وچ تیرانا دی تاریخ اچ پہلی دفعہ زمین دا اندراج کیتا جیندے مطابق اوں وقت تیرانا اچ سٹھ مختلف آبادیاں ہن جنہاں اچ 2028 گھراں اچ 7300 لوگ رہائش پزیر ہن۔ جبکہ 1583ء اچ کیتی ونڄݨ والی مردم شماری دے وقت تیرانا اچ 110 مختلف آبادیاں وچ 2900 گھر ہن جنہاں وچ 20،000 توں کجھ زائد لوگ رہندے ہن۔ لیکن موجودہ جدید تیرانا شہر 1614ء اچ سلیمان پاشا نے تعمیر و آباد کیتا جیندے اچ ہک مسجد دی تعمیر وی کیتی۔ ایندے علاوہ اوں زمانے اچ بہت کم پایا ونڄݨ والا ہک جدید تجارتی مرکز تے ترکی حمام تعمیر کروائے۔ ایہ جدید شہر تجارتی کارواناں دے رستے تے ہئی تے ایں وجہ نال ایں نے بہت ترقی کیتی۔ اوں زمانے اچ ہک ٻئی مسجد ادھم بے وی تعمیر تھئی جیہڑی اڄ وی موجود ہے۔