ᱫᱷᱭᱟᱱ ᱪᱟᱸᱫᱽ ᱫᱚ ᱢᱤᱫ ᱥᱤᱧᱚᱛᱤᱭᱟᱹ ᱦᱚᱠᱤ ᱠᱷᱮᱞᱚᱸᱰᱤᱭᱟᱹ ᱠᱟᱱᱟᱭ, ᱡᱟᱦᱟᱸᱭ ᱫᱚ ᱠᱷᱮᱞᱚᱸᱰ ᱨᱮᱱᱟᱜ ᱱᱟᱜᱟᱢ ᱨᱮ ᱧᱩᱛᱩᱢᱟᱱ ᱦᱚᱠᱤ ᱠᱷᱮᱞᱚᱸᱰᱤᱭᱟᱹ ᱢᱮᱱᱛᱮ ᱵᱟᱰᱟᱭᱚᱜ ᱟᱭ ᱾ ᱩᱱᱤ ᱫᱚ ᱟᱹᱰᱤ ᱩᱥᱟᱹᱨᱟ ᱜᱮ ᱦᱚᱠᱤ ᱪᱤᱸᱰᱩᱭ ᱰᱷᱟᱠᱟ ᱠᱷᱟᱹᱲ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ, ᱚᱱᱟ ᱛᱮ ᱟᱹᱰᱤ ᱛᱮᱫ ᱠᱚ ᱵᱟᱰᱟᱭᱮᱭᱟ ᱾ ᱩᱱᱤ ᱫᱚ ᱯᱮ ᱫᱷᱟᱣ ᱛᱮ ᱦᱚᱠᱤ ᱨᱮ ᱚᱞᱤᱢᱯᱤᱠ ᱥᱤᱨᱯᱷᱟᱹᱭ ᱧᱟᱢ ᱞᱮᱫ ᱛᱟᱦᱮᱸᱫ ᱾ ᱟᱡ ᱮᱱᱮᱡ ᱠᱟᱱ ᱚᱠᱛᱚ ᱫᱚ ᱥᱤᱧᱚᱛ ᱡᱚᱛᱚ ᱠᱷᱚᱱ ᱵᱷᱟᱹᱜᱤ ᱦᱚᱠᱤ ᱠᱷᱮᱞᱚᱸᱰ ᱫᱚᱞ ᱞᱮᱟᱛᱮᱭ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱩᱱ ᱥᱚᱨᱮᱥ ᱮᱱᱮᱡ ᱤᱫᱤ ᱛᱮ ᱥᱤᱧᱚᱛ ᱫᱚ ᱑᱙᱒᱘ ᱥᱟᱞᱮ ᱠᱷᱚᱱ ᱑᱙᱖᱔ ᱵᱷᱤᱛᱤᱨ ᱨᱮ ᱤᱨᱟᱹᱞ ᱜᱚᱴᱟᱝ ᱚᱞᱤᱢᱯᱤᱠ ᱠᱷᱚᱱ ᱮᱭᱟᱭ ᱜᱚᱴᱟᱝ ᱥᱚᱱᱟ ᱢᱮᱰᱟᱞ ᱮ ᱟᱢᱮᱴ ᱞᱮᱫ ᱛᱟᱦᱮᱸᱫ ᱾ ᱩᱱᱤ ᱫᱚ ᱑᱗ ᱵᱚᱪᱷᱚᱨ ᱵᱚᱭᱮᱥ ᱨᱮ ᱯᱚᱧᱡᱟᱵᱽ ᱨᱮᱡᱤᱢᱮᱸᱴ ᱨᱮ ᱥᱮᱞᱮᱫ ᱠᱟᱛᱮ ᱦᱚᱠᱤ ᱮᱱᱮᱡ ᱨᱮᱱᱟᱜ ᱥᱮᱱᱮᱪᱮᱫ ᱮ ᱧᱟᱢ ᱞᱮᱫᱼᱟ ᱾ ᱥᱤᱧᱚᱛᱤᱭᱟᱹ ᱯᱷᱟᱹᱫᱽ ᱞᱠᱟᱛᱮ ᱠᱟᱹᱢᱤᱠᱟᱱ ᱡᱷᱚᱜ ᱑᱙᱒᱖ ᱱᱤᱣᱡᱤᱞᱟᱸᱰ ᱥᱮᱱ ᱡᱚᱠᱷᱟᱜ ᱟᱡᱟᱜ ᱦᱚᱠᱤ ᱮᱱᱮᱡ ᱨᱮᱱᱟᱝ ᱜᱳᱞ (Goal) ᱥᱟᱭᱟᱝ ᱮ ᱥᱮᱴᱮᱨ ᱞᱮᱫᱼᱟ ᱾
ᱫᱷᱭᱟᱱ ᱪᱟᱸᱫᱽ ᱫᱚ ᱑᱙᱐᱕ ᱥᱟᱞᱮ ᱚᱜᱚᱥᱴ ᱒᱙ ᱢᱟᱹᱦᱤᱛ ᱨᱮ ᱩᱛᱛᱚ ᱯᱨᱚᱫᱮᱥ ᱨᱮᱱᱟᱜ ᱟᱞᱟᱦᱟᱵᱟᱫᱽ ᱨᱮ ᱢᱤᱫ ᱨᱟᱡᱽᱯᱩᱛ ᱜᱷᱟᱨᱚᱡᱽ ᱨᱮᱭ ᱡᱟᱱᱟᱢ ᱞᱮᱱ ᱛᱟᱦᱮᱸᱫ ᱾ ᱟᱡᱤᱡ ᱟᱯᱟᱛ ᱫᱚ ᱥᱚᱢᱮᱥᱚᱨ ᱫᱚᱛᱛᱚ ᱡᱟᱦᱟᱸᱭ ᱫᱚ ᱥᱤᱧᱚᱛᱤᱭᱟᱹ ᱨᱮ ᱠᱟᱹᱢᱤᱭᱟᱹᱭ ᱛᱟᱦᱮᱸᱠᱟᱱᱟ ᱾
ᱫᱷᱭᱟᱱ ᱪᱟᱸᱫᱽ ᱛᱟᱦᱮᱸ ᱠᱟᱱ ᱚᱠᱛᱚ ᱫᱚ ᱥᱤᱧᱚᱛᱤᱭᱟᱹ ᱦᱚᱠᱤ ᱨᱮᱱᱟᱜ ᱟᱹᱰᱤ ᱵᱷᱟᱹᱜᱤ ᱡᱩᱜᱽ ᱛᱟᱦᱮᱸ ᱠᱟᱱᱟ ᱾ ᱑᱙᱒᱘ ᱨᱮ ᱱᱮᱫᱚᱨᱞᱟᱸᱰ ᱦᱩᱭᱞᱮᱱ ᱚᱞᱤᱢᱯᱤᱠᱥ, ᱑᱙᱓᱒ ᱥᱟᱞᱮᱨᱮ ᱞᱚᱥ ᱮᱧᱡᱮᱞᱚᱥ ᱚᱞᱤᱢᱯᱤᱠᱥ ᱟᱨ ᱑᱙᱓᱖ ᱥᱟᱞᱮᱨᱮ ᱵᱚᱨᱞᱤᱱ ᱚᱞᱤᱢᱯᱤᱠᱥ ᱨᱮ ᱥᱚᱱᱟ ᱯᱚᱫᱚᱠ ᱟᱢᱮᱴ ᱨᱮ ᱟᱡᱟᱜ ᱟᱹᱰᱤ ᱢᱟᱨᱟᱝ ᱮᱱᱮᱢ ᱛᱟᱦᱮᱸ ᱠᱟᱱᱟ ᱾ ᱑᱙᱓᱖ ᱵᱚᱨᱞᱤᱱ ᱚᱞᱤᱢᱯᱤᱠᱥ ᱨᱮ ᱡᱚᱨᱢᱟᱱᱤ ᱦᱮᱨᱟᱣ ᱠᱟᱛᱮ ᱥᱚᱱᱟ ᱯᱚᱫᱚᱠ ᱠᱚ ᱟᱢᱮᱴ ᱠᱮᱫ ᱛᱟᱭᱚᱢ ᱟᱰᱞᱚᱯᱷ ᱦᱤᱴᱞᱚᱨ ᱡᱚᱨᱢᱟᱱᱤ ᱯᱷᱟᱹᱫᱽ ᱜᱚᱴ ᱨᱮ ᱫᱷᱭᱟᱱ ᱪᱟᱸᱫᱽ ᱫᱚ ᱯᱷᱤᱞᱰ ᱢᱟᱨᱥᱟᱞ ᱞᱮᱠᱟᱛᱮᱭ ᱫᱚᱦᱚᱭᱮᱭᱟ ᱢᱮᱱᱛᱮ ᱟᱨᱰᱟᱥ ᱮ ᱮᱢᱟᱫ ᱫᱮ ᱛᱟᱦᱮᱸᱫ, ᱢᱮᱱᱠᱷᱟᱱ ᱫᱷᱭᱟᱱ ᱪᱟᱸᱫ ᱥᱟᱨᱦᱟᱣ ᱮᱢ ᱥᱟᱶᱛᱮ ᱱᱚᱶᱟ ᱟᱹᱨᱡᱤ ᱫᱚᱭ ᱢᱟᱱᱟ ᱞᱮᱫ ᱛᱟᱦᱮᱸᱫ ᱾ ᱑᱙᱓᱖ ᱥᱟᱞᱮ ᱨᱮ ᱥᱤᱧᱚᱛ ᱤᱝᱞᱚᱸᱰ ᱜᱚᱵᱚᱞ ᱨᱮ ᱛᱟᱦᱮᱸ ᱞᱮᱱ ᱨᱮᱦᱚᱸ ᱵᱚᱨᱞᱤᱱ ᱚᱞᱤᱢᱯᱤᱠᱥ ᱨᱮ ᱤᱝᱞᱚᱸᱰ ᱨᱮᱱᱟᱜ ᱡᱟᱹᱛᱤᱭᱟᱹᱨᱤ ᱥᱮᱱᱮᱨᱮᱧ ᱥᱮᱨᱮᱧ ᱵᱤᱨᱩᱫᱽ ᱠᱟᱛᱮ ᱵᱚᱱᱫᱮ ᱢᱟᱛᱚᱨᱚᱢ ᱥᱮᱨᱮᱧ ᱟᱛᱮ ᱫᱤᱥᱚᱢ ᱫᱩᱞᱟᱹᱲ ᱨᱮᱱᱟᱜ ᱩᱯᱨᱩᱢ ᱮ ᱮᱢ ᱞᱮᱫ ᱛᱟᱦᱮᱸᱫ ᱾ ᱑᱙᱒᱘ ᱥᱟᱞᱮᱨᱮ ᱟᱢᱥᱴᱚᱨᱰᱮᱢ ᱚᱞᱤᱢᱯᱤᱠ ᱨᱮ ᱥᱚᱧᱚᱛ ᱞᱮᱠᱷᱟᱜᱩᱴ ᱒᱙ ᱜᱚᱴᱟᱝ ᱮ ᱜᱳᱞ ᱞᱮᱫ ᱢᱩᱸᱫ ᱠᱷᱚᱱ ᱫᱷᱭᱟᱱ ᱪᱟᱸᱫ ᱫᱚ ᱑᱕ ᱜᱳᱞ ᱮ ᱮᱢ ᱞᱮᱫ ᱛᱟᱦᱮᱸᱫ ᱾ ᱚᱱᱠᱟ ᱜᱮ ᱑᱙᱓᱒ ᱞᱚᱥ ᱮᱧᱡᱮᱞᱚᱥ ᱚᱞᱤᱢᱯᱤᱠ ᱨᱮ ᱑᱒ ᱜᱚᱴᱟᱝ ᱟᱨ ᱵᱚᱨᱞᱤᱱ ᱚᱞᱤᱢᱯᱤᱠ ᱨᱮ ᱑᱑ ᱜᱚᱴᱟᱝ ᱜᱳᱞ ᱠᱟᱛᱮ ᱟᱡᱟᱜ ᱟᱹᱭᱩᱨ ᱛᱮ ᱥᱤᱧᱚᱛ ᱫᱚ ᱢᱤᱫ ᱫᱷᱟᱹᱲ ᱛᱮ ᱦᱟᱴᱨᱤᱠ ᱴᱟᱭᱴᱚᱞ ᱮ ᱡᱤᱛᱠᱟᱹᱨ ᱞᱮᱫ ᱛᱟᱦᱮᱸᱫ ᱾ ᱑᱙᱔᱗ ᱥᱟᱞᱮᱨᱮ ᱔᱒ ᱵᱚᱭᱮᱥ ᱚᱠᱛᱚ ᱨᱮ ᱯᱷᱩᱨᱜᱟᱹᱞ ᱥᱤᱧᱚᱛ ᱦᱚᱠᱤ ᱫᱚᱞ ᱨᱤᱱᱤᱡ ᱟᱹᱭᱩᱨᱤᱭᱟᱹ (captain) ᱞᱮᱠᱟᱛᱮ ᱢᱤᱫ ᱡᱩᱣᱟᱹᱱ ᱫᱚᱞ ᱥᱟᱶᱛᱮ ᱥᱟᱢᱟᱝ ᱟᱯᱷᱨᱤᱠᱟᱭ ᱥᱮᱱ ᱞᱮᱱ ᱛᱟᱦᱮᱸᱫ ᱾ ᱚᱸᱰᱮ ᱥᱤᱧᱚᱛ ᱒᱒ ᱜᱚᱴᱟᱝ ᱢᱮᱪ ᱮ ᱮᱱᱮᱡ ᱞᱮᱫ ᱛᱟᱦᱮᱸᱫ ᱾ ᱮᱠᱞᱟ ᱛᱮ ᱫᱷᱭᱟᱱ ᱪᱟᱱᱫᱽ ᱖᱒ ᱜᱚᱴᱟᱝ ᱮ ᱜᱳᱞ ᱞᱮᱫ ᱛᱟᱦᱮᱸᱫ ᱾ ᱩᱱᱤ ᱫᱚ ᱑᱙᱔᱘ ᱥᱟᱞᱮ ᱨᱮ ᱦᱚᱠᱤ ᱠᱷᱚᱱᱮ ᱡᱤᱨᱟᱹᱣ ᱞᱮᱱ ᱛᱟᱦᱮᱸᱫ ᱾ ᱑᱙᱕᱗ ᱥᱟᱞᱮᱨᱮ ᱟᱨᱢᱤ ᱢᱮᱡᱚᱨ ᱠᱟᱹᱢᱤ ᱠᱷᱚᱱᱮ ᱡᱤᱨᱟᱹᱣ ᱞᱮᱱ ᱛᱟᱦᱮᱸᱫ ᱾ ᱑᱙᱒᱖ ᱥᱟᱞᱮ ᱠᱷᱚᱱ ᱮᱦᱚᱵ ᱠᱟᱛᱮ ᱑᱙᱔᱘ ᱡᱤᱨᱟᱹᱣᱮᱱ ᱚᱠᱛᱚ ᱛᱟᱞᱟᱨᱮ ᱑᱐᱐᱐ ᱠᱷᱚᱱ ᱦᱚᱸ ᱵᱟᱹᱲᱛᱤ ᱜᱳᱞ ᱮ ᱥᱠᱚᱨ ᱞᱮᱫ ᱛᱟᱦᱮᱸᱫ ᱾ ᱯᱮ ᱜᱚᱴᱟᱝ ᱚᱞᱤᱢᱯᱤᱠ ᱨᱮ ᱥᱤᱧᱚᱛ ᱨᱮᱱᱟᱜ ᱑᱐᱒ ᱜᱳᱞ ᱢᱩᱸᱫ ᱠᱷᱚᱱ ᱫᱷᱭᱟᱱ ᱪᱟᱸᱫ ᱫᱚ ᱓᱗ ᱜᱚᱴᱟᱝ ᱮ ᱜᱳᱞ ᱞᱮᱫ ᱛᱟᱦᱮᱸᱫ ᱾ ᱚᱱᱟ ᱠᱷᱟᱹᱛᱤᱨ ᱩᱢᱤ ᱫᱚ "ᱜᱳᱞ ᱢᱤᱥᱤᱱ" ᱢᱮᱱᱛᱮ ᱠᱚ ᱢᱮᱛᱟᱭ ᱠᱟᱱ ᱛᱟᱦᱮᱸᱫ ᱾ ᱑᱙᱗᱙ ᱥᱟᱞᱮ ᱰᱤᱥᱮᱢᱵᱚᱨ ᱓ ᱨᱮ ᱩᱱᱤ ᱫᱚ ᱱᱚᱶᱟ ᱫᱷᱩᱲᱤ ᱫᱦᱟᱹᱨᱛᱤᱭ ᱵᱟᱹᱜᱤ ᱥᱟᱹᱨᱤᱭᱟᱫ ᱛᱟᱦᱮᱸᱫ ᱾ ᱟᱡᱟᱜ ᱡᱟᱱᱟᱢ ᱢᱟᱦᱟᱸ ᱫᱚ ᱡᱟᱣ ᱥᱮᱨᱢᱟ ᱜᱮ ᱥᱤᱧᱚᱛ ᱨᱮ ᱡᱟᱹᱛᱤᱭᱟᱹᱨᱤ ᱠᱷᱮᱞ ᱢᱟᱦᱟᱸ ᱞᱮᱠᱟᱛᱮ ᱠᱚ ᱢᱟᱱᱟᱣᱮᱫᱼᱟ ᱾ ᱾
This article uses material from the Wikipedia ᱥᱟᱱᱛᱟᱲᱤ article ᱫᱷᱭᱟᱱ ᱪᱟᱸᱫᱽ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.