Атомовы Бомбардованя Гирошимы И Нагасаки

В конци Другой свѣтовой войны (1939—1945) в США успѣшно ся завершило створѣня атомового оружия. 16. юла 1945 в пустыни под Аламогордо было докончене его выпробованя. Президент США Г. Трумен поважовав, же властництво такого оружия буде рѣшати о вплывѣ по войнѣ и дозволить ся добити уступчивости од СССР при повойновом роздѣлѣ свѣта. Требало чимскорше демонстровати силу нового оружия. Америчане диспоновали двомя атомовыма бомбами — Little Boy (Дѣтятко) и Fat Man (Бумбела), але того было очевидно не доста про побѣду над Япониев. Было знати, же СССР в найблизшом часѣ вступить до войны з Япониев, а тогды бизовно буде поражена. але 6. августа 1945 уранова бомба о силѣ 15 кт была вержена бомбардером B-29 на Гирошиму, а 9. августа плутониева бомба о силѣ 21 кт — на Нагасаки. В Гирошимѣ удар трафив на центер города, в Нагасаки — на промыслову зону. На одстояню 1–5 км од епицентра выбуха будовы были нараз розвалены. Наступный пожар знищив на 90 % Гирошиму и на 50% — Нагасаки. Загыбло понад 200 тыс. людей, сотни тысяч потерпѣли. Територия зостала радиоактивно заражена.

Тоты бомбардованя не могли дефинитивно вплынути на резултат войны, понеже економична база Японии была в Манджурии, поза досягом америцкой авиации. Япония капитуловала по розгромѣ японской Квантунгской армады в Манджурии Червенов армадов 9.–17. августа 1945. 17. августа император выступив з рескриптом ку офицерам и воякам императорского войска, подяковав за оддану участь в боях и объяснив свое рѣшѣня капитуловати вступом СССР до войны, чим створила ся ситуация, котра «грозить самой екзистенции Империи», не упоминаючи ани словом о атомовых бомбардованях.

Масове забивство людей в Гирошимѣ и Нагасаки указало свѣту резултаты хоснованя атомового оружия, и мало значный вплыв на зачаток студеной войны.

• Америцкы бомбардеры, котры вергли атомовы бомбы на Японию, вылѣтали з острова Тиниан, де в року 1944 США зрядили военску базу з найдовжыма на тот час розбѣговыма смугами.
• Перву бомбу зоз США доправив на Тиниан крейсер Индианаполис, шпециалнов плавбов 14. – 26. юла 1945.
• 30. юла 1945 крейсер быв торпедованый японсков субмаринов и затопив ся, въедно зо 900 членами екипы.

• Лесли Гровс. Теперь об этом можно рассказать. История Манхэттенского проекта. — М., Атомиздат, 1964. Сокращенный перевод с английского издания: NOW IT CAN BE TOLD. The story of Manhattan project. By Leslie R. Groves, Lieutenant General, U.S. Army, Retired. — Harper & Brothers Publishers, New York. Одчитане: 2020-08-09русс.
• Шубин А. В.. Атомные бомбардировки Хиросимы и Нагасаки. //Энциклопедия «Всемирная история». https://w.histrf.ru/articles/article/show/atomnyie_bombardirovki_khirosimy_i_naghasaki. [перевірено 2020-08-08].  русс.
• Emperor Hirohito’s Surrender Rescript to Japanese Troops (HTML). 1945-08-17. Archived from the original on 2012-01-27. https://www.webcitation.org/64zoOO3CN?url=http://www.taiwandocuments.org/surrender07.htm. [перевірено 2020-08-09]. англ.
• Tinian. Encyclopædia Britannica. May 31, 2017. https://www.britannica.com/place/Tinian. [перевірено 2020-08-09]. англ.