بجریگر

جنگلی بجریگر دی مدری لمبائی 18 سینٹی میٹر (7 انچ) تے مدرا جوکھ 30–40 گرام ہوندا اے۔ ٹڈ تے پچھلا مگر ہلکا ہرا ہوندا اے۔ پر تے پچھا کالا جیدے اوتے پیلیاں دھاریاں بنیاں ہوندیاں نیں۔ مونہہ تے متھا پیلے ہوندے نیں۔ گل تے اک جامنی پٹی ہوندی اے تے گلے دونوں پاسیاں تے تن تن کالے نشان ہوندے نیں۔ پوچھل گوڑھی نیلی ہوندی اے۔ ایدی چنج زیتونی سانولی تے پنجے نیلے سانولے ھوندے نیں۔

ایہدی اتلی چنج توں تھلویں چنج ادھی ہوندی اے تے اوہ دسدی نہیں۔ ایس چنج نال ایہ فروٹ، بوٹے تے سبزیاں کھا جاندا اے۔ ایس دی چنج دی پکڑ وی ڈاہڈی ہوندی اے۔

بجری نوں 1850 توں پالیا جاریا اے تے پالن والیاں نے ایہدیاں ناپ، رنگ تے پراں دے وکھراپے نال کئی ونڈاں بنائیاں نیں۔ ایہ ملن ورتن والا پنچھی اے۔ ایہ بولدا اے سیٹیاں ماردا تے انساناں نال کھیڈدا اے۔ دونویں نر مادھ گاندے تے نقلاں لاندے نیں پر ایس کم وچ نر اگے نیں۔ایہ کسے وی شے تے چک ماردیگا جیدے نال ایہدی چنج رگڑی جاوے۔

پنجریاں وچ بجری 5 توں 8 سال تک جیوندے نیں تے 15–20 سال دے وی ویکھے گۓ نیں۔

بجریگر
بجریگر	بجری جنگل وچ	بجری دا سر	نیلا بجری

ایہ طوطے رکھاں دیاں موریاں تے تھلے ڈگیاں لکڑاں وچ موریاں وچ آلنے پاندے نیں تے 4 توں 6 تک انڈے دیندے نیں جنہاں اتے ایہ 18–21 دناں تک بیٹھدے نیں۔ چوچے آنڈیاں توں نکلن مگروں 30 دناں مگروں آلنے توں اڈ جاندے نیں۔ مادھ نر بنا وی انڈے دے سکدی اے پر اوہدے چوں چوچے نہیں نکلدے۔ آنڈے 1 توں 2 سینٹی میٹر تک لمے ہوندے نیں۔ مادھ آپ ای آنڈیاں تے بیندی اے تے نر نوں نہیں بیٹھن دیندی۔