Село Тркање: село во Општина Кочани

Селото се наоѓа од десната страна на магистралниот пат Штип-Кочани, на околу 5 километри од градот Кочани. Низ селото поминува Трканска Река која извира од јужната страна на Осогово.

Во XIX век селото било дел од Кочанската каза на Отоманското Царство.

Според статистиката на Васил К’нчов („Македонија, Етнографија и статистика“) од 1900 година, во Тркање живееле 680 жители, сите Македонци. Според егзархискиот секретар Димитар Мишев, („La Macédoine et sa Population Chrétienne“) во 1905 година во Тркање имало 680 Македонци, под врховенството на Бугарската егзархија.

Според германска карта издадена во 1941 година, а заснована на пописот на Кралството Југославија од 1931 година, селото имало 550 Македонци.

Според пописот од 2002 година, селото има 1.225 жители, од кои 1.224 Македонци и 1 Србин.

Според последниот попис од 2021 година, во селото живеел 1.001 жител, од кои 963 Македонци, 5 останати и 33 лица без податоци.

Во табелата во продолжение е направен преглед на населението во сите пописни години:

Извор за 1900 г.: Македонија. Етнографија и статистика.; за 1905 г.: La Macédoine et sa Population Chrétienne.; за 1948-2002 г.: Државен завод за статистика на РМ.; за 2021 г.: Државен завод за статистика на РМ.

Родови

Тркање е македонско село.

Според истражувањата од 1960 година, родови во селото се:

• Пуќовци (16 к.), Тацковци (14 к.), Ташковци или Поповци (8 к.), Гаџовци (6 к.), Молецовци (8 к.), Пендовци (6 к.), Ѓауровци (5 к.), Буријарци (5 к.), Бодушовци (4 к.), Мусовци (2 к.), Голубовци (7 к.), Рендевци (5 к.), Газарци (5 к.), Деповци (4 к.), Гицовци (4 к.), Пржовци (2 к.), Посателци (6 к.), Рогушеви (6 к.), Златанови (3 к.) и Самантелци (2 к.) за овие родови не се знае дали се староседелци или доселеници со непознато потекло.
• Рунтевци (6 к.) доселени се од сега раселеното село Десовица над селото Бања.
• Бунишовци (6 к.) доселени се од селото Бунеш кај Пробиштип.

Избирачко место

Во селото постои избирачкото место бр. 874 според Државната изборна комисија, сместени во просториите на основното училиште.

На претседателските избори во 2019 година, на ова избирачко место биле запишани вкупно 929 гласачи.

Цркви

• Црква „Св. Никола“ — главната селска црква, изградена е во 1830 г.
• Црква „Св. Ѓорѓи“ — манастирска црква изградена во 1975 г.
• Црква „Св. Димитриј“
• Црква „Св. Петка“

Споменици

• Споменик на Никола Карев во близина на селото

Археолошки наоѓалишта

• Главовец — населба од неолитско време
• Горна Црква — некропола од доцноантичко време
• Господница — населба од доцноантичко време
• Селиште — населба од доцноантичко време
• Страгата — некропола од доцноантичко време
• Трлиште — населба од доцноантичко време