Милетино: село во Општина Брвеница

Милетино се наоѓа во подножјето на Сува Гора, во близина на реката Вардар.

Милетино се наоѓа помеѓу селата Челопек и Блаце.

Во XIX век селото било дел од Тетовската каза на Отоманското Царство.

Според статистичките пребројувања од 1453 додина во Милетино живееле исклучиво Македонци и тоа 88 семејства, 8 вдовици и 10 неженети. Додека пак во следниот попис во 1468 година има нагло зголемување на македонското население и тоа на 145 семејства, 6 вдовици и 7 неженети.

Според статистиката на Васил К’нчов („Македонија, Етнографија и статистика“) од 1900 година, во Милетино живееле 335 жители, од кои 200 Македонци и 135 Албанци. Според егзархискиот секретар Димитар Мишев, („La Macédoine et sa Population Chrétienne“) во 1905 година во Милетино имало 240 Македонци, под врховенството на Бугарската егзархија.

Рускиот филолог Афанасил Селишчев запишал дека во 1929 година селото имало 790 жители.

Според германска карта издадена во 1941 година, а заснована на пописот на Кралство Југославија во 1931 година, селото имало 450 Македонци, 350 Албанци и 50 Турци.

Според пописот од 2002 година, селото Милетино брои 1986 жители, од кои 642 Македонци, 1.336 Албанци, 2 Срби и 6 останати.

Според последниот попис од 2021 година, во селото живееле 1.674 жители, од кои 501 Македонец, 1.105 Албанци, 1 Србин, 3 останати и 64 лица без податоци.

На табелата е прикажан националниот состав на населението низ сите пописни години:

Родови

Милетино е македонско-албанско-турско село.

Според истражувањата од 1947 година, родови во селото се:

• Македонски родови во селото се:
• Стаматовци (2 к.) стар селски род. Имаат иселеници во Белград (едно семејство).
• Тасевци (3 к.) стар селски род. Имаат иселеници во Тетово (едно семејство).
• Кнушој или Николовци (6 к.) стари доселеници од Порече. Имаат иселеници во Тетово (едно семејство).
• Филиповци или Карадаг (14 к.) доселени се од некое село на планината Скопска Црна Гора. Имаат иселеници во Белград.
• Топаловци (19 к.) доселени се од некое село во Охридско. Овде дошол основачот на родот Топал, го знаат следното родословие: Паун (жив на 78 г. во 1946 година) Аврам-Ѓоргија-Злате-Топал, основачот на родот кој се доселил. Имаат иселеници во Тетово (три семејства) и во Белград (две семејства).
• Влкановци (3 к.) доселени се од некое албанско село на Шар Планина, го знаат следното родословие: Блаже (жив на 38 г. во 1946 година) Петруш-Анѓеле-Влкан, кој се доселил во селото. Имаат иселеници во Челопек.
• Станчевци (11 к.) доселени се однекаде. Имаат иселеници во Гостивар (едно семејство).
• Самарковци (1 к.) доселени се и они однекаде.
• Џамадај или Маковци (8 к.) доселени се однекаде, се доселил основачот на родот Мако, го знаат следното родословие: Вељан (жив на 50 г. во 1946 година) Стојан-Аврам-Мако, кој се доселил. Имаат иселеници во Јабука во Војводина.
• Војној (5 к.) доселени се од некое село во Порече.
• Ѓорговци (6 к.) доселени се од некое село во Порече. Имаат иселеници во Белград (две семејства), Ќуприја (едно семејство) и во Војводина (едно семејство).
• Бацој (3 к.) доселени се од сега албанското село Горна Лешница. Имаат иселеници во Теново (едно семејство).
• Јаковчевци (5 к.) доселени се од Блаце, каде биле староседелци. Имаат иселеници во Тетово (едно семејство).
• Коруној (1 к.) и они се од Блаце, потекнуваат од домазет.
• Јанкуловци (2 к.) и они се од Блаце, таму припаѓале на родот Лукаревци, подалечно потекло од селото Лупште, Порече.
• Нокој (Новаковић) (1 к.) доселени се од Косово, го знаат следното родословие: Новак (жив на 44 г. во 1946 година) Димитрије-Тодосије-Новак-Јован, кој дошол во селото.
• Ќулумовци или Цветковци (1 к.) доселени се од Порече. Имаат иселеници во Белград (едно семејство).
• Стојчевци (2 к.) доселени се од сега албанското село Горна Лешница.
• Шутковци (1 к.) доселени се од селото Блаце.
• Филип (1 к.) дојдени од селото Томино Село, Порече.
• Иван или Дебранци (1 к.) доселени се од некое село на Црн Дрим.
• Вељан (1 к.) доселени се од селото Седларево, нивните роднини таму се поалбанчени.
• Албански родови во селото се:
• Амедовци (34 к.) доселени се од некое место во северна Албанија. Имаат иселеници во Темишвар (едно семејство).
• Ќемаловци (3 к.) стари доселеници, нивното потекло е непознато, можеби се од турско потекло.
• Таировци или Имеровци (14 к.) доселени се од Дебарско, го знаат следното родословие: Ајет (жив на 55 г. во 1946 година) Реџеп-Алија-Нуија, еден од нивните први доселеници. Имаат иселеници во Тетово (едно семејство).
• Шаракат (8 к.) доселени се од селото Ѓурговиште на Шар Планина, го знаат следното родословие: Куртиш (жив на 80 г. во 1946 година) Реџеп-Зибер, еден од браќата кој се доселил.
• Реџеповци (5 к.) доселени се од некое село западно од Дебар го знаат следното родословие: Азир (жив на 50 г. во 1946 година) Амет-Рушан-Реџо, кој се доселил во селото.
• Османовци (3 к.) доселени се од селото Падалиште, подалечно потекло од северна Албанија. Имаат иселеници во Долно Синичино.
• Миџаит (1 к.) скоро доселени, не сакале да кажат од каде.
• Азис (1 к.) исто така доселени скоро, доселени се од Дебарско.
• Турски родови во селото се:
• Агалари (5 к.) доселени се овде преку Тетово, подалечно потекло од Мала Азија, го знаат следното родословие: Арслан (жив на 60 г. во 1946 година) Рушан-Мамут-Арслан-Ага, кој се доселил. Имаат иселеници во Тетово (три семејства).
• Зенул-Агини (2 к.) доселени се од Врапчиште, викаат дека се од турско потекло. Имаат иселеници во Тетово (едно семејство).

 

Цркви

• Црква „Св. Богородица“
• Црква „Св. Димитриј“
• Црква „Св. Георгиј“
• Црква „Св. Атанасиј“
• Црква „Св. Петка“

Милетино е центар на Милетинската парохија при Тетовското архијерејско намесништво на МПЦ.

Избирачко место

Во селото постојат избирачките места бр. 2042 и 2043 според Државната изборна комисија, сместени во просториите на основното училиште.

На претседателските избори во 2019 година, на ова избирачко место биле запишани вкупно 1.919 гласачи.

• Милин Град - археолошко наоѓалиште, каде е пронајден еден јонски капител;

• Спиро Стоматовски (1913 - 1944) — жртва во логорот „Јасеновац“
• Борче Сибиновски — стопанственик и поранешен пратеник на ВМРО ДПМНЕ во Собранието на Република Македонија

• ФК Победа (Милетино)

Ајде на билје, билје да бериме
Ајде на билје Јано, дејче мори,
Билје да бериме о, ииии
Билје да береме на средниот камен,
билје да береме, стадо да крмиме,
стадо да крмиме, стадо братово.
(песна која се пее кога се берат билки, односно вечерта споти Ѓурѓовден)

• Полог
• Општина Брвеница
• Тетово