Alfabeta

La parola veni de la nomes elinica per la du leteras prima de la alfabeta elinica – alfa e beta – e de la nomes en la alfabeta fenisia – alef e beth (la bove e la casa).

On ave fundal cuatro formas de alfabetas:

1. Silabarios, o alfabetas silabal, en cual la leteras representa silabas – juntas de consonantes e vocales cual es mesma pronunsiable. Esemplos inclui katakana e hiragana per japanes, e la alfabeta de la tsalagis de America Norde.
2. Abjades, o alfabetas consonantal, en cual sola la consonantes es scriveda. Esemplos inclui la alfabetas de la fenisias antica, e ance la alfabetas per ivri e arabi. La nom abjad deriva dede la nomes de la du leteras prima de la alfabeta arabi.
3. Abugidas, o alfabetas cuasi-completa: La alfabetas de Asia sude e sude-este es derivada de la alfabeta brami. La simboles major es consonantal, ma la vocales es jeneral representada par cambias minor de la consonantes o par simboles peti ajuntada a la consonantes. La nom abugida es de la parola en la itiopian (geez, un lingua de Etiopia) per sua alfabeta.
4. Alfabetas completa, cual ave leteras individua per consonantes e vocales. La plu de alfabetas aora usada es alfabetas completa, incluinte la alfabeta latina, la alfabeta cirilica e la alfabeta per corean, nomida la hangul.