Google Диск

Анын функцияларына файлдарды интернетте сактоо, аларды башкалар менен бөлүшүү жана бирге редакциялоо кирет. Google Дисктин курамына Google Документтер, Таблицалар жана Презентациялар кирет. Булар - тексттик документ, электрондук таблица, презентация, чийме, веб-форма жана башка файлдардын үстүндө бирге иштөө үчүн кеңсе колдонмолорунун тутуму. Дисктеги жалпыга жеткиликтүү документтер издөө системдери тарабынан индекстелет.

Google Дисктин бет ачары 2012-жылдын 24-апрелинде болгон. 2014-жылдын октябрына чейин айлык активдүү колдонуучуларынын саны 240 миллион болгон.

Google Диск for Work

Google Диск for Work - Дисктин 2014-жылы 25-июнда Google I/O конференциясында тааныштырылган Google Apps for Work'тун курамындагы премиум-версиясы. Мында сактоо үчүн чектелбеген мейкиндик, аудит жана отчет түзүүнүн кеңейтилген функциялары, ошондой эле электрондук иликтөө үчүн маалымат камсыз кылган кызматтар бар. Кызматтын кошумча орнотуулары администраторлорго кардарлардын Диск менен иштөөсүн жакшыраак башкарганга мүмкүндүк берет, мисалы, кээ бир кызматкерлерге ЖК үчүн кардар синхрондоштуруу орнотууга уруксат берилген. Дискке 5 ТБка чейин файл жүктөөгө болот. Компанияда бештен аз колдонуучу бар болсо, алардын ар бирине 1 ТБтан берилет. Google Enterprise'тын расмий блогундагы пресс-релизге ылайык, кардарлардын маалыматтары Google серверине жүктөлгөндө, сакталганда, жүктөп алынганда шифрленет. Колдонуучуларга күнү-түнү колдоо кылынат жана убакыттын 99,9%ында кызматтын үзгүлтүксүз иштешине кепилдик берилет.

Google Диск for Education

Google Диск for Education 2014-жылдын 30-сентябрында иштей баштаган. Бардык Google Диск for Education жазылуучуларына бекер жеткиликтүү. Колдонуучуларга маалымат сактоо үчүн чектелбеген орун жана 5 ТБка чейин файл жүктөө мүмкүнчүлүгү берилет.