Алматы Сәтбаев Атындағы Көше

Көшеге қазақтың ардақ ұлы, отандық металлогендік ғылымның негізін салған әмбебап ғалым, атақты геолог, Қазақ КСР Ғылым академиясының тұңғыш Президенті және академигі, КСРО Ғылым академиясының академигі, Ленин және КСРО Мемлекеттік сыйлығының иегері Қаныш Имантайұлы Сәтбаевтың есімі (Алматы қаласы атқару комитетінің 18.03.1964 №133 шешімі) берілген. Сәтбаев Қаныш Имантайұлы (1899-1964) Семей губерниясының Павлодар болысында дүниеге келген. Оның есімімен Жезқазған тау-металлургиялық комбинаты, Қарағанды мен Балқаштағы металлургиялық зауыт, Рудный Алтай, Қаратау фосфориті, Ұлытау өңіріндегі темір және марганец кен орындарьі тығыз байланысты. Көше бойында Оқушылар Сарайы, Алматы гидрометеорологиялық обсерваториясы, Алматы қаласы әкішілігінің ғимараты, Қазақ теле-радио ғимараты, Қ.Сәтбаев атындағы Қазақ Ұлттық техникалық университеті, Балуан Шолақ атындағы Спорт сарайы, «Дана» сауда орталығы, т.б. ірілі-ұсақты мекемелер мен дүкендер, қызмет көрсету орындары орналасқан. Көше Медеу ауданында орналасқан. Көше қаланың шығысынан батысына қарай Лугански көшесінен басталып, Шепетков көшесіне барып жалғасады. Бұрынғы атауы - Университет көшесі. Көшенің ұзындығы -7200 метр.