Sexyuali Chanzmitid Infekshan
Sexyuali chanzmitid infekshan (STI), aalso refa tu az sexuali chanzmitid diziiz (STD) ah veniirial diziiz (VD), a infekshan we kamanli pred chuu sex, espeshali vajainal intakuos, ienal sex ah uoral sex. Muos STI inishal no kaaz no simtam. Dis rizolt ina grieta rix fi paasaan di diziiz tu adawandem. Simtam ah sain a diiziz kiah ingkluud vajainal dischaaj, piinail dischaaj, olsa pan ar rong di jenital, ah pelvik pien. STI we akwaya bifuo ar juurin boert kiah rizolt ina puor outkom fi di biebi. Som STI kiah kaaz prablem wid di abiliti fi get prignant.
Muo dah 30 difrah baktiiria, vairos, ah parasait kiah kaaz STI. Baktiirial STI ingkluud klamidia, ganariya, ah sifilis mongx adaels wan. Vairal STI ingkluud jenital oerpiiz, HIV/AIDS, ah jenital waat mongx adaels wan. Parasitik STI ingkluud chrikomuoniasis mongx adaels wan. Wails deh yuujali pred bai sex, som STI kiah azwel pred chuu nan-sexyual kantak wid kantaminietid blod ah tishu, bresfiidn, ar juurin chailboert. STI dayagnastik tesdem hiizi avielebl ina di divelop wol, bot dis noftaim a no di kies ina di divelopin wol.
Di muos ifektiv wie fi privent STI a fi no ab sex. Som vaxinieshan kiaa aalso dikriis di rix a soertn infekshan ingkluudn epataitis B ah som taip a HPV. Siefa sex praktis laka di yuus a kandom, fi ab sumaala nomba a sexyual paadna, ah fi de ina rilieshanship we iich poersn onggl ab sex wid die di adawan aalso dikriis di rix. Sorkomsijan ina miel kiah bi ifektiv fi privent som infekshan. Muos STI kiah chriit ar kyuor. Outa di muos kaman infekshan, sifilis, ganariya, klamidia, chrikomuoniasis deh kyuorebl, wails oerpiiz, epataitis B, HIV/AIDS, ah HPV kiah chriit bot deh no kyuorebl. Rizistans tu soertn antibayatik a-divelop mongx som aaganizim laka ganariya.
Ina 2008, iweh-estimiet se dat 500 milian piipl eh-infek wid aida sifilis, ganariya, klamidia ar chrikomuoniasis. Akliis wah adishanal 530 milian piipl gat jenital oerpiiz ah 290 milian uman ab yuuman papiluomavairos. STI ada dah HIV rizolt ina 142,000 det ina 2013. Ina di Yunaitid Stiet deh eh-ab 19 milian nyuu kies a sexyuali chanzmitid infekshan ina 2010. Istarikal dakiumentieshan a STI diet bak tu akliis di Ebers papairos frah rong 1550 BKI ah di Uol Testiment. Muotaim shiem ah stigma asosiet wid demaya infekshan. Di toerm sexyuali chanzmitid infekshan jinarali prefa uoba di toerm sexuuali chanzmitid diziiz ah veniirial diziiz, az ihingkluud demde uu no gat no simtomatik diziiz.
Refrans
This article uses material from the Wikipedia Jumiekan Kryuol article Sexyuali chanzmitid infekshan, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Kantent avielobl fi anda CC BY-SA 4.0 anles nuot adawaiz. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Jumiekan Kryuol (DUHOCTRUNGQUOC.VN) is an independent company and has no affiliation with Wiki Foundation.