ويكيپيديا

ويكيپيديا هيّا أكبر ؤ أشهر خدمة مرجعية عامة علا لويب، ؤ هيّا عاوتاني وحدة من سّيتات تّلطاش لأكتر شعبية لي صنفاتها أليكسا تال دابا. لموسوعة كتعرض حصريان محتوى فابور بلا إعلانات تيجارية، ؤ مملوكة ؤ مدعومة من قيبال لمؤسسة د ويكيميديا، لّي هيّا منضمة ماشي ربحية كتّمول أساسا من تّبرعات.

بدا سّيت ديال ويكيپيديا ف 15 يناير 2001 ؤ لي بداوه هوما دجيمي ويلز ؤ لاري سانݣر. سانݣر هوّا لي سماه. سمية ويكيپيديا كاتكون من كلمة ويكي ؤ كلمة إينسيكلوپيديا بمعنى موسوعة. ؤ ملي بدات كانت غير ب نݣليزية، ولاكين بزربة بانو نوساخ خرين ب لوغات خرين لي كانو مختالفين ف لمحتوى ؤ طريقة لكتبة ديالهم. دابا كاينين شي 314 ويكيپيديا، ويكيپيديا ديال نݣليزية هيا لكبيرة فيهم وفيها كثر من 6,5 مليون مقال. ف لمجموع ويكيپيديا كاملة فيها شي 55 مليون مقال ب 309 لغة. ف فبراير 2014 ويكيپيديا كان تشافت شي 18 مليار مرة، ب 500 مليون ڤيزيت كل شهر تقريبان.

ف مارس 2017، ويكيپيديا فيها كتر من 40 ألف مقال واعر بمعنى مكتوبين مزيان كيتسماو لمقالات لمخيرة ؤ لمقالات لمزيانة لي كاتهضر على مواضيع حيوية. ف 2005 نشرات مجلة نيتشر واحد رّيڤيو كاتقارن فيه مابين 42 مقال ديال صيونص من موسوعة بريطانيكا ؤ موسوعة ويكيپيديا، ؤ لقات بلي دّيقة ديال لمقالات د ويكيپيديا قريبة ل دّيقة ديال بريطانيكا. مجلة د طايمز تاهيا ݣالت بلي سّياسة ديال ويكيپيديا باش تخلي أي واحد يكتب فيها ردات ويكيپيديا أكبر ؤ واقيلا أفضل موسوعة ف لعالام. ؤ هيّا شهادة علا شّوفة ب مدى بعيد ديال دجيمي ويلز.

ف 2018، فيسبوك ؤ يوتيوب علنو بلي غادي يبداو يخدّمو ويكيپيديا باش يعاونو لخدايميا ديالهوم يديتيكتيو لخبارات لمزوّرين. بزاف د سّرابس د أنتيرنيت بحال ݣوݣل ؤ أپليكاصيوات د لپورطابل بحال سيري ف لأيفون، كيعتامدو على ويكيپيديا باش يعطيو معلومات ل لخدايميا ؤلا يجاوبو لأسئلة ديالهوم.

ويكيپيديا بدات ف 2001، كا موسوعة رقمية مبنية على سّيستيم د ويكي لي كان ديجا موجود قبل، ؤ كان لهدف لأصلي ديالها هوا باش تدعم موسوعة د نوپيديا لي كانو بداوها نيت دجيمي ويلز ؤ لاري سانݣر. هاد جّوج كانو لونصاو نوپيديا عام قبل باش تكون موسوعة لي كيكتبوها حرايفيا ف كلا ضومين، بحال بزاف د لموسوعات، ؤ ملي شافو بلي من بعد عام يلاه خرجو منها 13 مقال، قررو باش يديرو ويكيپيديا باش يساهمو فيها خدايميا من أي بلاصة، ؤ يكتبو مقالات لي يقدرو لحرايفيا من بعد يكمّلو عليها. ملي شافو لإقبال لي طرا على ويكيپيديا، قررو باش يردوه لپروجي لأساسي ديالهوم. عام موراها كانت ويكيپيديا وصلات ل 20000 مقال ب 18 لوغة ؤ باقية كاتكبر بشكل سريع.

ف 2003، دجيمي ويلز خلق مؤسسة د ويكيميديا باش تجيري لهاردوير ؤ سّوفتوير لي كاتخدم بيه ويكيپيديا، ؤ يتلقا دّعم لمادي باش لمشروع يستامر. ولاكين تّسيير ديال لموسوعة ؤ لمحتوى ديالها بقا ف يد لخدايميا لعاديين، لي كيتسماو كتاتبيا ؤلا لويكيپيديين، ؤ لي قدرو ف ضرف سنوات يقادّو موسوعة أكبر من أي وحدة دازت ف تّاريخ. لمجتمع د لويكيپيديين كيسيّر راسو ب راسو ؤ كيختار ب لڤوط واحد لݣروپ ديال لخدايميا لي كيوليو عندهوم صلاحيات كبر من لخدايميا لعاديين، ؤ لي كيتسماو لأدامين ؤلا لموديرين ؤلا إمغارن.

بزاف ف لبدية شافو بلي لمشروع د ويكيپيديا كيجيب ضّحك ؤلا ماغاديش يصدق، حيت وخا حافض على شي مبادئ ديال موسوعة تقليدية بحال بلي خاصها تكون شاملة جميع لمجالات لمعرفية ؤ مبنية على روح د لعقلانية، رمات ف لمزبلة أعراف ؤ تقاليد مؤسساتية متداولة، لي كاتݣول بلي موسوعة ماخاص ؤلا مايقدرو يكتبوها غير حرايفيا متخصصين، ؤ مختارين من أحسن لموتقافين ؤ لخوبارا ف لمجال ديالهوم. ف لّخر د 2005، ويكيپيديا ب نّݣليزية كانت وصلات ل 750،000 مقال، ؤ ب كترت ما تداولات لهضرة عليها ف لإعلام، نضمو ليها عاداد كبير د نّاس ؤ ولات كاتّعتابر مرجعية موهيمة ف أنتيرنيت.

من 2006، ب سباب لعاداد لكبير د تّبديلات ف لمقالات، مابقاوش لإمغارن د ويكيپيديا قادرين يسيطرو على لجودة د لمقالات، حيت بزاف د تّبديلات كيكونو فيهوم أخطاء ؤلا تخريبات د لمحتوى. ؤ ديجا ف لعام لي قبل كانت طرات واقيعة ديال دجون سييݣينطالر، لي كان صحافي ؤ مستشار قانوني سابق ديال رّايس لميريكاني دجون كينيدي، ؤ لي تعرّض ل تّشهير ف مواقع معروفة بسباب مقال د ويكيپيديا لي تّاهمو ب لخطأ بلي يقدر يكون قتل رّايس كينيدي. هاد لواقيعة ستدعات تّدخل ديال دجيمي ويلز رايس د لمؤسسة د ويكيميديا براسو باش يحيد لمقال ؤ يمحيه من ليسطوريك ديال ويكيپيديا. بسباب هادشي، لويكيپيديين طوّرو سطراطيجيات جديدة ف لمحاربة د تّخريب ؤ لمراقبة د لمحتوى د لمقالات. من بين هاد سّطراتيجيات، كاينين وسائل تقنية لي كاتسهّل تحياد تّخريبات ب كليك د بوطونة، ؤ سّتيعمال د لبوتات لي تقدر ف بزاف د لحالات تّعرف على تّخريب ؤ تحيدو ؤطوماتيكياً. أول بوت د ويكيپيديا، لي سميتو رامبوت Rambot، كان ديجا تّستعمل من أكتوبر 2002 باش يصاوب 33،832 مقال على لمدون ؤ دّواور د لميريكان.

هاد سّطراتيجيات دارو خدمتهوم، ؤ قدرو ينقصو بزاف ف تّخريبات ؤ لخبارات لمزوّرة. ولاكين كان عندهوم مفعول عكسي على لخدايميا جّداد، حيت لي كيبغيو يبداو يبدّلو ف ويكيپيديا ؤ ماكيعرفوش كيفاش غالباً كيديرو أخطاء ؤ كيتحيدّو تّبديلات ديالهوم، شّي لي ماكيشّجعهومش باش يستامرو. لعاداد د لكتاتبيا ف ويكيپيديا ب نّݣليزية بدا كيتناقص، ؤ داز من 51،000 ف 2007 تال 31،000 ف 2013. ف 2012، لموديرة د مؤسسة ويكيميديا سو ݣاردنر دارت مجهودات باش تحدّ من هاد لموشكيل، ؤ هيّا فاش بانت لبوطونة ديال "شّكر"، لي تخادت من لّايك ؤلا جيم د فيسبوك. ليديتور لمتشاف د ويكيپيديا حتا هوّا بان كا نتيجة د لبحت على حلول ل لموشكيلة د نقصان د لكتاتبيا. هاد ليديتور كيسهّل لكتابة حيت كيبيّن داكشي لي مكتوب كيما غادي يبان مورا مايتصوڤا، ماشي على شكل كوض د ويكي. ف لبدية ليديتور لمتشاف كان كيبان پارضيفّو هوّا لّول، ولاكين لكميونيتي د لويكيپيديين عارضات هادشي ؤ قدرات تفرض على لمؤسسة باش تخليه غير ختيار لي خاص لواحد يكليكي عليه باش يبان.