عرس الديب

السباب فيه هوّ لإنعكاس، التهراس، و التشتات ديال الشعا على لقطرات ديال لما ف السما (شتا)، لي كيفرّق الشعا لبيض ديال الشمش ل لمكوّنات ديالو، بحيت كيبان السپيكتر ديالو.

عرس الديب كيبان على شكل قوس ديال سبعة د اللوان لي هوما ب هاد الترتيب: حمر، ليموني، صفر، خضر، زرق، إنديڭو (زرق غامق) و قوقي. هاد اللوان غير ضاهريين بسباب لقدرات لمحدودة ديال لعين و لمخ د بنادم، حيت ف لواقع السپيكتر كيكون مستامر (ماشي متقطع) و مافيهش لوان محددين. قبل من نيوتن كانو بعض لكتّاب كيهضرو على 5 د اللوان ف عرس الديب، ولاكين نيوتن حيت كان كيآمن بزاف ب الروحانيات، و كيعتابر النمرة 7 نمرة سحرية، أوّل السپيكتر د الشعا ف التجارب ديالو بلي فيه 7 د اللوان.

ف التقافات ديال شمال إفريقيا، سيرتو ف لمغريب، و الجزاير و تونس، كيتّستعمل لمصطلح ديال عرس الديب، لي هوّ طرجامة حرفية من التعبير لأمازيغي "أورار أووشن" ؤلا "تريد أو ؤشن". هاد لمصطلح عندو قصة ف الترات لأمازيغي لي كاتعاود على واحد الديب وصل سن الجواج، ولاكين بقا كيتهرّب منو حيت مابغاش لمسؤولية. الدياب صحابو بقاو كيبززو عليه، فا جاوبهوم بلي ماغادي يتجوج تا تكون الشتا كاتطيح و الشمش طالعة ف السما و تبان عروس السما، حيت حساب ليه بلي هادا شرط تعجيزي ماعمّرو يتحقق. ملي طرا هادشي نيت، ضطر الديب باش يتجوّج داك النهار و تسمى ب "عرس الديب".