Provincias Da Arxentina: Subdivisión administrativa da Arxentina

Debido á súa estrutura federal, as provincias arxentinas conservan unha ampla autonomía retendo todas as competencias non delegadas á federación. Internamente subdivídense en departamentos, chamados partidos na Provincia de Buenos Aires e comunas na Cidade Autónoma de Buenos Aires. A nivel político, cada provincia conta cun sistema de goberno republicano, democrático e réxese por unha constitución de seu.

Catorce das provincias son preexistentes ao estado nación arxentino, sendo herdeiras das demarcacións coloniais. As provincias orixinais son as seguintes, indícase entre parénteses o ano de unión:

1. Provincia de Buenos Aires (1820)
2. Provincia de Catamarca (1821)
3. Provincia de Córdoba (1820)
4. Provincia de Corrientes (1814)
5. Provincia de Entre Ríos (1814)
6. Provincia de Jujuy (1836)
7. Provincia de La Rioja (1820)
8. Provincia de Mendoza (1820)
9. Provincia de Salta (1836)
10. Provincia de San Juan (1820)
11. Provincia de San Luis (1820)
12. Provincia de Santa Fe (1816)
13. Provincia de Santiago del Estero (1820)
14. Provincia de Tucumán (1825)

Con posterioridade á organización nacional da República Arxentina (1853-1860), varios territorios foron incorporados logo de campañas militares sobre os territorios indíxenas do norte (Gran Chaco) e do sur (Patagonia) do país. Estes foron organizados coa denominación de "territorio nacional" e estaban baixo a autoridade dun gobernador designado polo goberno federal. Estes territorios acabaron por ser convertidos en provincias entre mediados do século XX e 1990. As provincias que naceron de antigos territorios nacionais son os seguintes, indícase entre parénteses o ano da provincialización:

 

1. Provincia do Chaco (1951)
2. Provincia do Chubut (1955)
3. Provincia de Formosa (1955)
4. Provincia de Misiones (1953)
5. Provincia de Neuquén (1955)
6. Provincia da Pampa (1951)
7. Provincia de Río Negro (1955)
8. Provincia de Santa Cruz (1956)
9. Provincia de Terra de Fogo, Antártida e Illas do Atlántico Sur (1990)

A condición de Buenos Aires como capital da federación e da provincia provocou grandes tensións e problemas que condicionaron á construción do estado nacional arxentino. Finalmente, no 1880, o Presidente da Nación Arxentina, Nicolás Avellaneda, impuxo a federalización da cidade de Buenos Aires segregándoa da provincia homónima e converténdoa nun distrito federal. Dende entón, e ata 1996, a Buenos Aires funcionou como un municipio á fronte do cal estaba un intendente nomeado polo xefe do Estado da Arxentina coa aprobación do Senado federal. No 1996 mudou o sistema de goberno no marco da reforma constitucional do 1994, sendo partir dese ano a Cidade Autónoma de Buenos Aires con funcións equivalentes ás provinciais.