Conmemoración Da Paz De Hiroshima

O edificio foi orixinalmente proxectado polo arquitecto checo Jan Letzel para a Exposición Comercial da Prefectura de Hiroshima. Foi terminado en abril de 1915 e inaugurado oficialmente en agosto dese ano. O edificio tiña como obxectivo promover a venda de bens producidos en Hiroshima. É unha construción de ladrillo e formigón, cunha cúpula de estrutura de aceiro e 25 metros de altura.

En 1944, o edificio deixou de ser usado para a promoción industrial e foi convertido na sede de varias oficinas locais.

O hipocentro da explosión da primeira bomba atómica lanzada sobre unha poboación civil o 6 de agosto de 1945 situouse a unha distancia de apenas 150 metros na horizontal e 600 metros na vertical do edificio, sendo a estrutura máis próxima que resistiu ao impacto. O edificio foi inmediatamente preservado exactamente como se atopaba despois do bombardeo. Serve hoxe como un monumento conmemorativo da devastación nuclear e un símbolo de esperanza na paz mundial e a eliminación de todas as armas nucleares.

Dende 1996 está na lista do Patrimonio da Humanidade da Unesco.

A Cúpula Genbaku sitúase no Parque Conmemorativo da Paz de Hiroshima que contén outros monumentos levantados posteriormente:

• Estatua dos Nenos da Bomba Atómica, en memoria dos nenos que morreron vítimas da bomba.
• Monte Conmemorativo da Bomba Atómica, coas cinzas de 70 mil vítimas non identificadas.
• Cenotafio das Vítimas Coreanas, en homenaxe aos preto de 20 mil coreanos mortos no bombardeo.
• Cenotafio Conmemorativo, coa inscrición «Descansade en paz, pois o erro xamais se repetirá».
• Chama da Paz, que permanecerá alumando ata que a ameaza de aniquilación nuclear deixe o planeta Terra.
• Campá da Paz, que os visitantes poden tocar en honra á paz mundial.
• Sala Nacional Conmemorativa da Paz de Hiroshima, que inclúe a Sala da Memoria cunha reconstrución de 360º de Hiroshima despois da bomba, formada por 140 mil ladrillos (o número de vítimas até o final de 1945).
• Museo Conmemorativo da Paz de Hiroshima.
• Portas da Paz, cinco portas de cinco metros de altura coa palabra «paz» escrita en varios idiomas.

Outros artigos

• Patrimonio da Humanidade no Xapón