Tsukrutõbi

Tuud, kas seo tõbi sul om vai kui taad ravima piät, ütles sullõ su tohtri.

Tsukrutõbi vai diabeet (ladina keelen diabetes mellitus) om sääne ollusõvaihtushädä, et veren om ülearvo pall'o tsukõrd, tuu tähendäs, et veretsukru tasõq om pall'o korgõ.

Tsukrutõpi om mitmit. Tsukruhaigõl inemisel om hariligult tõõnõ katõst tsukrutõvõ tüübist:

• I tüüpi tsukrutõbi tulõ hariligult külge latsilõ, a või ka ildampa tullaq. I tüüpi tsukrutõbi om autoimmuunhaigus, tuu tähendäs, et kihhä kaitsjaq rakuq ründäseq kihä hindä kudõsit. Seo haigusõga inemise kihha kaitsjaq rakuq ründäseq kõtunääret, miä saa-aiq inämb insuliini tetäq. Ilma insuliinildaq saa-aiq kihä glükoosi vai tsukõrd vasta võttaq ja tsukõr jääs verre ümbre käümä.
• II tüüpi tsukrutõbi tulõ hariligult külge täüskasunuilõ. II tüüpi tsukrutõvõga inemise kõtunääreq ei tiiq niipall'o insuliini ku vaia olnuq. II tüüpi tsukrutõbi tulõ rohkõmb külge noilõ, kiä ommaq paksuq ja noilõ, kink perren om viil tsukruhaigit.

Tsukrutõpõ näütäseq näütüses säändseq tunnusõq, et inemine taht sakõstõ kusõlõ, taht rohkõmb juvvaq vai süvväq ja tä kihä nõrkus, tä nägemine om hägonõ, nahk om kuiv, haavaq ei parahuq kõrraligult ja egäsugudsõq külgenakkajaq tõvõq tulõvaq sakõstõ mano.

Tõvõ pand sullõ su tohtri, kiä ütles, kas sul taa tõbi om vai olõ-õiq. Korgõ veretsukru tasõq ütsindä tsukrutõpõ näütä-äiq. Tsukrutõvõ pandmisõs võtt tohtri verest egäsugutsit pruuvõ.