Anoressia Niervosa

Se caraiteriza pol repucheu la comia que puei llegal a la total inanicion i pola incapaciá de sostenel el pesu corporal correspondienti a la eá.

Enas pressonas con esta crassi trastornu cuaja un mieu dessagerau pola possibiliá umentu pesu, de mois que precuran mecanismus conos que no engordal, comu engeril la menol cantiá alimentu qu’es escapás i el ejercíciu de mas.

Las causas esti trastornu puein sel de destinta naturaleza. Puei avel fatoris biológicus comu la genética o la eá. El sessu femininu está mas canteau pal desarrollu la anoressi que los ombris.

Entre los fatoris esternus se puein mental destintus espetus el entornu la pressona anoréssica comu, vé-lo í, la enfrujéncia sociucultural, conflitus familiaris, via estrebejilá i tal i mas. La precupacion pol pelitasqui cona que ahinchonan los meyus comunicacion puei golvel-se dessagerá entre ciertus sectoris la socieá, comu los adolescentis, llegandu a causal trastornus condutualis en paragi d’anoressia.

Entre pressonas que tiendin a sel prefecionistas, con baja autostima i que acetan los canun socialis la delgaura están mas abocaus a que n’ellus cuaji l’anoressia.

Angunas caraiterísticas la pressona anoréssica son vé-la equí estas:

• Enritabiliá.
• Apression.
• Ossession.
• Aginacion.
• Piel botanosa i seca.
• Pelusina pol cuerpu.
• Cárii dental, prencipalmenti las enpicás al gomitaeru.
• Amenorrea.
• Arriziura.
• Encacinamientu.
• Atrofia musculal.
• Perda pesu i grassa corporal.
• Debiliá capilal.

L’anoressia, en quantis quantis es alvertia polos familiaris o amigus el pacienti, prejisa dun tratamientu meicu i sicoterapéuticu. El güen endilgaeru premitirá que la pressona anoréssica recobri el pesu aparenti pa la su eá i con el corretu tratamientu se corrigirán los malus conportamientus alimentárius i los desordin sicológicus.

Tantu el apoyu familial comu el estrafamilial —amigus, compañerus, otras pressonas que padeçan anoressia— es hundamental pa la plonta i segura recuperacion.

• Anoressia en Medline.