جەوھەر نامیق
جەوھەر نامیق سالم لە ساڵی ١٩٤٦ دا لە ناوچەی بەرلوتی سەر بە شارۆچکەی کەلار دایکبووە، لە ساڵی ١٩٩٢ دا بە یەکەمین سەرۆکی پەرلەمانی ھەرێمی کوردستان ھەڵبژێردراوە.
خاوەن کەسایەتییەکی بە ھەڵوێست و جوامێر بووە، لە تەمەنی ٦٥ ساڵیدا لە خەستەخانەی ھۆدینگا لە وڵاتی سوید بە نەخۆشی لە شەوی ٢١/٢٣ ئازاری ٢٠١١ کۆچی دوایی کردوە. خێزانداربووە و دوو کوڕ و کچێکی پاش خۆی بەجێھێشتوە.
 | |
| لەدایکبوون | ١٩٤٦ |
| مەرگ | ٢١ی ئازاری ٢٠١١ |
| ھۆکاری مەرگ | نەخۆشی |
| نەتەوە | کورد |
| پەروەردە | بەکالۆریۆس |
| پیشە | سیاسەتمەدار |
| چالاکبوون | ١٩٧٥-٢٠١١ |
| حیزبی سیاسی |  پارتی دیموکراتی کوردستان |
ژیاننامە
جەوھەر نامیق سالم لە خێزانێکی کوردپەروەر لە ساڵی ١٩٤٦ لە ناوچەی بەرلوتی سەر بە شارۆچکەی کەلار لە دایکبووە، باوکی یەکێک بووە لە دامەزرێنەرانی حیزبی ھیوا، لە تەمەنی لاوێتییەوە پەیوەندی بە ریزەکانی پارتی دیموکراتی کوردستانەوە کردووە. لە زانکۆی موستەنسریە لە بەغداد کۆلیژی ئابووری بەشی زانستە ئابوورییەکانی تەواو کردوە و بڕوانامەی بەکالۆریۆسی بەدەست ھێناوە.
لە ساڵی ١٩٧٥ دا بۆتە ئەندامی سەرکردایەتی کاتی پارتی دیموکراتی کوردستان کە بە قیادە موەقەتە ناوی دەرکردبوو، ھاوکات بەرپرسی ھەرێمی یەکی پارتەکەی بووە، لەبەر لێھاتووی لە ساڵی ١٩٧٩ دا وەک ئەندامی مەکتەبی سیاسی پارتی ھەڵبژێردراوە، جارێکی دیکەش لە دە ھەمین کۆنگرەی پارتی دیموکراتی کوردستاندا ساڵی ١٩٨٩ وەکو ئەندامی مەکتەبی سیاسی ھەڵبژێردراوەتەوە.
دوای راپەڕینی بەھاری ساڵی ١٩٩١ کراوەتە بەرپرسی سنووری کەرکوک لە بەرەی کوردستانیدا، ساڵی ١٩٩٢ وەکو یەکەمین سەرۆکی پەرلەمانی کوردستان ھەڵبژێردراوە، لەنێوان ساڵەکانی ١٩٩٣ بۆ ٢٠٠٠ لێپرسراوی مەکتەبی دیراسات و توێژینەوەی پارتی دیموکراتی کوردستان بووە، ساڵی ٢٠٠٠ کراوەتە سکرتێری مەکتەبی سیاسی پارتی دیموکراتی کوردستان و تاکو ساڵی ٢٠٠٣، لە دوای ساڵی ٢٠٠٣ ەوە وازی لە دەسەڵات و پۆستە حیزبییەکەی لە پارتی دیموکراتی کوردستان ھێناوە، تا لە ژیاندا بوو باسی ھۆکارەکەی نەکردوە.
مردن
بەھۆی نەخۆشییەکی کوشندەوە لە مانگی شوباتی ٢٠١١ دا دەبرێتە وڵاتی سوید بۆ چارەسەر، ھەر لەوێش لە شەوی ٢١ لەسەر ٢٢ی ئازار لە نەخۆشخانە کۆچی دوایی دەکات.
سەرچاوەکان
بەستەرە دەرەکییەکان
This article uses material from the Wikipedia Soranî / کوردی article جەوھەر نامیق, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ناوەرۆک لەبەردەستە لەژێر CC BY-SA 4.0دا، مەگەر پێچەوانەی وترابێ. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Soranî / کوردی (DUHOCTRUNGQUOC.VN) is an independent company and has no affiliation with Wiki Foundation.