Немцы

Агульная колькасьць — каля 150 млн. Мова — нямецкая германскай групы індаэўрапейскай сям’і.

Нямецкае слова Deutsche (немцы), пайшло ад старажытнаверхнегерманскага слова diutisc (што азначае «народ»). У іншых мовах самым распаўсюджаным корнем зьяўляецца лацінскі корань german, які выкарыстоўваецца для абазначэння немцаў і нямецкай мовы ў ангельскай (Germany, German), румынскай (Germania, germana) і шмат у якіх іншых мовах.

Амаль палова немцаў жыве за межамі Нямеччыны. Нямецкамоўным зьяўляецца насельніцтва такіх прымежных краінаў Нямеччыны, як Аўстрыя, Ліхтэнштайн, Люксэмбург, большай часткі Швайцарыі. Аднак апошнім часам, яны называюць сябе адпаведна аўстрыйцамі, ліхтэнштайнцамі, швайцарцамі. У гістарычна нямецкамоўных раёнах Францыі (Эльзас, поўнач Лятарынгіі) усё менш насельніцтва валодае мясцовымі дыялектамі нямецкай мовы, і яшчэ менш атаясамляюць сябе зь немцамі.

Значная колькасьць немцаў жыве ў многіх краінах Эўропы, Амэрыкі і Азіі, такіх як Польшча, Італія, Бразылія, Расея, Казахстан і іншыя. Паводле афіцыйных зьвестак на 2010 год, немцы складаюць 12,5% ад усяго насельніцтва ЗША — гэта прыкладна 48 мільёнаў чалавек. У Беларусі на 2012 год этнічнымі немцамі сябе назвалі 4806 чалавек.

  Немцы — сховішча мультымэдыйных матэрыялаў