Камуністычная Партыя Ўкраіны

Лідэр партыі — Пятро Сіманенка.

Камунізм, прарасейская рыторыка.

 

Выбары ў Вярхоўную Раду Ўкраіны 1994 году

Гэта былі першыя выбары пасьля аднаўленьня дзейнасьці партыі ў 1993 годзе. Выбары праходзілі па мажарытарнай выбарчай сыстэме. Камуністы перамаглі ў 85 з 450 выбарчых акругаў, і сфармавалі буйнейшую фракцыю ў Вярхоўнай Радзе.

Выбары ў Вярхоўную Раду Ўкраіны 1998 году

Гэтыя выбары праводзіліся паводле зьмешанай выбарчай сыстэмы. Палова (225) дэпутатаў абіраліся па партыйных сьпісах, астатнія 225 ў акругах. Камуністычную партыю падтрымалі 24,65% альбо 6 550 353 выбаршчыкоў, першае месца. Такім чынам, партыя атрымала 84 дэпутацкія мандаты. Таксама 34 прадстаўнікі ад камуністаў перамаглі ў аднамандатных акругах, то бок усяго камуністы здабылі 121 мандат.

Прэзыдэнцкія выбары 1999 году

 

Пятро Сіманенка зьяўляўся кандыдатам ад камуністаў на пост Прэзыдэнта Ўкраіны на выбарах 1999 году. На іх ён атрымаў падтрымку 5 849 077 галасоў выбаршчыкаў, альбо 22,24%, і разам зь Леанідам Кучмам трапіў у другі тур выбараў. Нягледзячы на падтрымку амаль ўсіх левых сілаў, у другім туры ён прайграў дзейснаму Прэзыдэнту Кучму. Пятра Сіманенку падтрымалі 10 665 420 выбаршчыкаў, альбо 37,80%.

Выбары ў Вярхоўную Раду Ўкраіны 2002 году

На гэтых выбарах камуністы ўпершыню саступілі першае месца правацэнтрыстам з блёку Віктара Юшчанкі «Наша Ўкраіна». Камуністаў падтрымалі 5 178 074 выбаршчыкі ці 19,98%. Яны атрымалі 59 дэпутацкіх мандатаў. У аднамандатных акругах толькі 6 прадстаўнікоў ад партыі здабылі перамогу. Такім чынам, разам камуністы атрымалі 65 дэпутацкіх мандатаў.

Прэзыдэнцкія выбары 2004 году

На гэтых выбарах лідэр партыі, Пятро Сіманенка, атрымаў падтрымку 1 396 135 галасоў выбаршчыкаў, альбо 4,97% (чацьвертае месца). Найбольшую падтрымку ён атрымаў на Поўдні ды Ўсходзе Ўкраіны: за яго кандыдатуру прагаласавалі 10,60% выбаршчыкоў Днепрапятроўскай, 10,04% Хэрсонскай, 8,84% жыхароў Севастопалю. Найменш Пятра Сіманенку падтрымалі выбаршчыкі Заходняй Ўкраіны. Так, яго падтрымлі 0,53% выбаршчыкоў Тарнопальскай, 0,70% Івана-Франкоўскай, ды 0,83% Львоўскай вобласьці.

Выбары ў Вярхоўную Раду Ўкраіны 2006 году

Выбары ўпершыню праводзіліся паводле прапарцыйнай выбарчай сыстэмы. На іх партыю падтрымалі 929 591 выбаршчыкаў альбо 3,66%. Хоць партыя і здолела прайсьці 3% бар’ер, гэты вынік быў найгоршы за ўсю гісторыю ўдзелу партыі ў агульнанацыянальных выбарах. Партыя саступіла нават сацыялістам, якіх падтрымалі 5,69% выбаршчыкаў. Такім чынам, камуністы занялі пятае месца і атрымалі 21 дэпутацкі мандат. Але, нягледзячы на гэткія вынікі, камуністы ўпершыню ўвайшлі ў парлямэнтскую большасьць разам з Партыяй Рэгіёнаў ды сацыялістамі.

Датэрміновыя выбары ў Вярхоўную раду Ўкраіны 2007 году

 

На датэрміновых выбарах у Вярхоўную раду Ўкраіны 2007 году партыя атрымала 1 257 291 галасоў выбарцаў, або 5,39% (чацьвертае месца) і атрымала 27 мандатаў у Вярхоўнай Радзе.

Прэзыдэнцкія выбары 2010 году

Пятро Сіманенка зарэгістраваны Цэнтральнай Выбарчай Камісіяй Украіны як кандыдат ад блёку левых ды левацэнтрысцскіх сілаў. У гэты блёк апрача камуністычнай партыі ўвайшлі таксама Сацыял-дэмакратычная партыя Ўкраіны (аб'яднаная), Усеўкраінскае аб'яднаньне левых «Справядлівасьць» ды Зьвяз Левых Сілаў. Па выніках выбараў Пятро Сіманенка атрымаў 872 877 галасоў выбаршчыкаў, альбо 3,54% галасоў (шостае месца).

• Афіцыйны сайт партыі

Гэта — накід артыкула пра ўкраінскую палітыку. Вы можаце дапамагчы Вікіпэдыі, пашырыўшы яго.