Бэнэдыкт Павал Сапега
Бэнэдыкт Павал Сапега (каля 1643 — 12 жніўня 1707, Бэрлін) — дзяржаўны дзяяч Вялікага Княства Літоўскага.
Падстолі (1663—1665), стольнік (1665—1670) і крайчы вялікі літоўскі (1670), падскарбі надворны (1670—1676) і вялікі літоўскі (з 1676). Трымаў Слонімскае староства.
.jpg) Б. П. Сапега. З Коданскай галерэі, 1709 | |
 Герб «Ліс» | |
| Асабістыя зьвесткі | |
|---|---|
| Нарадзіўся | каля 1643 |
| Памёр | 12 жніўня 1707 |
| Пахаваны | |
| Род | Сапегі |
| Бацькі | Павал Ян Сапега Ганна Барбара з Копацяў |
| Жонка | Ізабэла з Тарлаў |
| Дзеці | Міхал Юзэф |
| Дзейнасьць | вайсковец |
Біяграфія
З чарэйска-ружанскай лініі магнацкага роду Сапегаў гербу «Ліс», сын Паўла Яна і Ганны Барбары з Копацяў. Меў братоў Казімера Яна, Лявона Базыля і Францішка Стэфана.
3 1657 навучаўся ў езуіцкім калегіюме ў Грацы (Аўстрыя), з 1661 працягваў адукацыю ў Лёвэнскім унівэрсытэце (Гішпанскія Нідэрлянды), у 1663—1664 падарожнічаў па Заходняй Эўропе.
Неаднаразова абіраўся паслом на соймы. На элекцыйным сойме 1674 быў маршалкам і спрыяў абраньню на сталец Яна Сабескага, што спрычынілася да ўсталяваньня гегемоніі Сапегаў у Вялікім Княстве Літоўскім.
Намагаўся сілай ліквідаваць рух сваіх супраціўнікаў («рэспубліканцаў»), 15 кастрычніка 1700 ягонае войска напала на аддзел шляхты пад Ашмянамі і разьбіла яго. Аднак у Алькеніцкай бітве (18 лістапада 1700) пацярпеў паразу і, паранены, уцёк у Курляндыю.
У сакавіку 1702 перайшоў на бок швэдзкага караля Карла XII і ўдзельнічаў у ягонай кампаніі ў Каралеўстве Польскім. Сойм 1703 пазбавіў Б. П. Сапегу пасадаў і тытулаў.
Удзельнічаў у Варшаўскай канфэдэрацыі (1704), якая скінула са стальца Аўгуста Моцнага. Новы кароль і вялікі князь Станіслаў Ляшчынскі ў 1705 вярнуў яму пасаду падскарбія вялікага. Далучыўся да войска С. Ляшчынскага, зь якім удзельнічаў у выправе на Літву ў 1706, потым у маршы швэдзкай арміі ў Саксонію.
Пабраўся шлюбам з Ізабэлай Тарла (у 1668), зь якой меў сыноў Міхала Юзэфа, Францішка Караля і Казімер Юзэфа. Пахавалі Б. П. Сапегу ў парафіяльным касьцёле ў Сямятычах.
Крыніцы
Літаратура
- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
- Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 2001. — Т. 6. Кн. 1: Пузыны — Усая. — 591 с. — ISBN 985-11-0214-8
This article uses material from the Wikipedia Беларуская (тарашкевіца) article Бэнэдыкт Павал Сапега, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.