লখিমী বৰুৱা

লখিমী বৰুৱাৰ জন্ম হৈছিল যোৰহাট জিলাৰ এখন সৰু গাঁৱত। আৰ্থিক সমস্যাৰ বাবে ১৯৬৯ চনত তেওঁ কলেজীয়া শিক্ষা আধাতে সামৰিব লগা হৈছিল। ১৯৭৩ চনত তেওঁৰ বিয়া হয়। বিয়াৰ পাছত তেওঁ আধৰুৱা শিক্ষা সমাপ্ত কৰাৰ উদ্দেশ্যে আকৌ পঢ়া শুনাত লাগে আৰু ১৯৮০ চনত গ্ৰেজুৱেচন সম্পূৰ্ণ কৰে। ইয়াৰ পাছত তেওঁ এটা বেংকত চাকৰি কৰিবলৈ লয়।

বিয়াৰ পাছত গ্ৰেজুৱেচন সম্পূৰ্ণ কৰি বেংকত চাকৰি কৰি থকা সময়ত তেওঁ উপলব্ধি কৰিছিল যে শিক্ষা দীক্ষা নথকা মহিলা সকলৰ পইচা সাচি ৰখাৰ অভ্যাস নাই কাৰণ তেওঁলোকৰ বিত্তীয় শিক্ষাৰ অভাৱ। সেইবাবে ১৯৮৩ চনত লখিমী বৰুৱাই যোৰহাটৰ দক্ষিণ সৰ্বাইবন্ধা অঞ্চলত এখন মহিলা সমিতি গঠন কৰিছিল যাৰ জৰিয়তে তেওঁ আৰ্থিকভাবে পিছপৰা মহিলা সকলক লগত লৈ তেওঁলোকৰ বাবে কাম কৰিছিল। বহুবছৰ ধৰি বেংকত কাম কৰাৰ পাছত ১৯৯০ চনত তেওঁ মহিলা সমবায় বেংক আৰম্ভ কৰাৰ চিন্তা চৰ্চা কৰিছিল। অৱশেষত ১৯৯৮ চনত ৮.৪৬ লাখ টকা মূলধন হিচাপে লৈ ১৯৯৮ চনৰ ২২ মে তাৰিখে সমবায় সমিতি আইন-১৯৪৯ৰ অধীনত তেওঁ শ্বহীদ কনকলতা বৰুৱাৰ নামেৰে নামকৰণ কৰি কনকলতা মহিলা আৰবান কোঅপাৰেটিভ বেংক গঠন কৰিবলৈ সক্ষম হয় কনকলতা মহিলা কোঅপাৰেটিভ বেংক হৈছে উত্তৰ পূৰ্বাঞ্চলৰ প্ৰথমটো মহিলা সমবায় বেংক। এই বেংকৰ প্ৰত্যেক গৰাকী বিষয়া কৰ্মচাৰীয়েই নাৰী। এই সমবায় বেংকৰ মূল উদ্দেশ্য হৈছে মহিলা সৱলীকৰণ আৰু সমবায় বেংকিংৰ মাধ্যমেৰে দুৰ্বল শ্ৰেণীৰ মহিলা সদস্যা সকলক বিত্তীয় শিক্ষাপ্ৰদান কৰা।

 

২০১৬ চনৰ মাৰ্চ মাহত, আন্তঃৰাষ্ট্ৰীয় মহিলা দিৱসত ভাৰত চৰকাৰৰ মহিলা আৰু শিশু কল্যাণ মন্ত্ৰ্যালয়ৰ তৰফৰ পৰা কনকলতা মহিলা আৰবান কোঅপাৰেটিভ বেংক লৈ নাৰী সৱলীকৰণৰ দিশত উল্লেখযোগ্য ভূমিকা গ্ৰহণ কৰাৰ বাবে নাৰী শক্তি বঁটা^{[উদ্ধৃতিৰ প্ৰয়োজন]} প্ৰদান কৰা হয়। লখিমী বৰুৱাই বেংকৰ হৈ পূৰ্বৰ ৰাষ্ট্ৰপতি প্ৰণৱ মুখাৰ্জীৰ পৰা নতুন দিল্লীত দেৱী অহল্যাবাই হোলকাৰ বঁটা গ্ৰহণ কৰে। তেওঁক ভাৰত চৰকাৰে ২০২১ চনত সমাজসেৱা ক্ষেত্ৰত চতুৰ্থ সৰ্বোচ্চ অসামৰিক সম্মান পদ্মশ্ৰী বঁটাৰে সন্মানিত কৰে।