廣州地鐵 西村站

樓層

呢個站一共有3層樓嘅地下區域，其中地下1樓係站廳，有票務設施，客務中心同商鋪；地下2樓係8號綫嘅月台，但而家未開通；地下3樓係5號綫嘅月台。同大多數嘅5號綫車站一樣，雖然車站冇休息室，但廁所喺B出入口嘅地面位。

打掂

打橫

站廳

西村站分開咗南、北兩個站廳，收費區喺南站廳北邊，北站廳南邊，雖然中間有聯絡通道連埋一齊，但免費區唔相連。四圍都俾車站商舖方面圍住嗮。而收費區有好多部扶手電梯同樓梯往返月台都得。由於車站空間太細，所以冇專用𨋢，但係北站廳有輪椅升降機俾坐輪椅啲人上落。

月台

呢個站有2個月台。其中5號綫喺環市西路嘅地底，而8號綫喺廣雅路嘅地底。

商舖同自助服務

而家嘅西村站入面有好多唔同類嘅鋪頭畀乘客買嘢同埋食嘢，好似有便利檔、麵包檔同洗衫舖、賣衫檔等。

另外，西村站入面重有好多自助服務設施畀乘客用，包括咗自動櫃員機、自動販賣機、自動影相機同羊城通充值機等；重有可以充羊城通、交水電費同交通嘅罰錢、查地鐵嘅路線、頭尾班車同埋地鐵嘅安全指引同畀乘客登記變成廣州地鐵薈嘅會員嚟查獎分、換獎品嘅服務。

出入口

西村站冚唪唥嘅出入口
A出入口    B出入口    C出入口    D出入口    E出入口    F出入口    G出入口

呢個站一共有7個出入口，分別係A、B、C，D同埋E、F、G。安檢方面，呢個站往返C、D兩出入口，及A、B兩出入口之間係唔使安檢。

冧巴	標記	方位	去到邊度
南站廳
出入口A	廣雅路	東	廣雅后街、西灣東路、地鐵西村巴士總站
出入口B	廣雅路	東南	西灣路、環市西路、富力環市西苑（西村）巴士站（東行）
出入口E	環市西路	西	園崗路、地鐵西村站巴士總站、富力環市西苑（西村）巴士站（東行）
出入口F	廣雅後街	西南
出入口G	廣雅路	南	西灣東路、廣東廣雅中學（廣雅路校區）北門、廣雅路巴士站（北行）
北站廳
出入口C	環市西路	東北	西灣路、卓越教育西村教學中心、西灣路巴士站、克山巴士站、悅匯城
出入口D	環市西路	北	西灣路、西增路、協和中學、廣州市勞動力市場殘聯分市場、工人體育場、步雲天地環球國際商貿中心、西城天富鞋業鞋材市場、財富天地廣場、晟商鞋匯、富力環市西苑（西村）巴士站（西南行）
註：  有盲人引導徑 |   有斜道 |   有輪椅升降臺 |   有𨋢 |   有扶梯

規劃

喺1997年嘅城市快速軌道交通線網規劃嘅A方案入面講咗，呢個站係3號綫同4號綫嘅轉車站，嗰時同而家西村站嘅位差唔多。到咗2003年變成而家嘅5號綫同8號綫嘅轉車站。

施工

5號綫

• 2004年5月28號，車站正式動工，初期時施工方唔想搞到西灣路同環市西路交界嘅交通大塞車雪上加霜，加上1999年起緊內環路時整咗好多條樁響地下，所以分成兩個站廳嚟起，中間用聯絡通道連埋一齊嘅方法。
• 2006年6月26號，大坦沙到淘金嗰三條盾構區間開始執行盾構工程。
• 2007年10月13號後半夜，工程隊掘緊西場到草暖公園嘅盾構區間右線隧道時，出現大量潮水而引起68mm沉降，令隧道上邊嘅內環路要臨時封閉。
• 2009年4月19號凌晨，西區間右線盾構機到咗西村站而貫通嗮成條5號綫嘅區間。

8號綫

開工時摸門釘

 

路線準備施工時，由於工地範圍啲屋受到拆遷補償嘅影響，直到2016年6月先至喺車站西北角搞拆遷同部份管線改造。同年12月1號開始喺A出入口到西增路嗰邊搞管線改造。但因為重差位居民因為要巨額補償，令車站嘅8號綫區域一直未開工。

2017年初，原先2016年底重有4位堅持要巨額補償嘅釘戶當中，有3位正式接受補償而搬走咗，凈得返位90歲嘅阿婆未搬走，而且施工個位咁啱就喺主體結構嘅核心位，而且冇得兜過。據記者得知，阿婆係因為唔滿意地鐵方畀佢多70m²（21.3平方英呎，7.8平方市尺）嘅補償，係都要獅子開大口話要補償480m²（146.4平方英呎，53.2平方市尺）先至得。後嚟地鐵方同最後嗰間釘戶猛咁傾咗輪，最後喺嗰年夏初正式同釘戶嗰三姊妹達成共識兼搬出拆遷範圍重喺同年7月3號拆咗。

正式入場施工

地鐵方喺準備入場施工前，將最後嘅釘戶拆咗後搞咗份施工方案。原先計劃起帶柱式嘅島式月台結構，但考慮到施工範圍有兩樖分別生咗成130年同個半世紀嘅榕樹而改成分離島式月台結構，連起嘅地鐵站空間（計埋設備房）變細咗好多，控制室同排風設備都會安排到5號綫範圍，有可能整唔到車站廁所嘅同時，亦間接影響埋起11號綫嘅車場。

附屬工程出大頭佛

雖然佢係最後開工起嘅車站，但進度好快追返上嚟，喺2019年8月29號順利封頂。雖然南站廳西邊有預留結構，喺2020年4月正式圍蔽利用，方便8號綫接入，但係車站附屬工程要等到同年10月7號先至有得逳手，所以喺8號綫北延段喺2020年11月28號晏晝開通之後，呢個站一直飛站，連車都冇得轉。直到2022年6月19號先至入營運前調試；同年12月7號先至起好晒。

開通

• 2009年12月28號14:00，5號綫開通之後，呢個站先至開咗地下3樓，而地下2樓冇開到。
• 2022年12月28號06:00，8號綫範圍亦正式開通，地下2樓同轉車通道亦正式開放。

出入口

呢個站喺開通初期淨得A、B、D三個出入口，而C出入口因西灣路嘅商場喺度開緊發而冇整到，直到2020年7月28號嘅若比鄰社區商業中心開業之後先至開通。B出入口因2017年嘅8號綫入場施工而封咗5年，直到2022年12月28號先至重新開返。而E、F、G三個出入口喺2022年12月28號開通8號綫時亦順便開埋。

事件

人踩人

2014年3月4號清晨，有架地鐵埋緊西村站時突然噴白煙，啲人見到後以為係毒氣而好驚，懷疑有恐怖襲擊。到站後，啲人即刻跑出去月台，人潮撞跌咗喺月台嘅孫婆婆，重踩落佢個身度，佢以為死梗，最尾佢畀人送咗去廣州市第一人民醫院。另外重有一個卅幾歲嘅女人送咗去同一間醫院。件事造成13個乘客受傷，同埋21部列車晚點（遲咗）。

事後警方介入調查，查出原嚟係兩個男人喺度噴防狼煙霧而造成誤會。事件造成財物損失，有人被整爛部智能電話，亦有個女人被撕爛咗對絲襪，不過損失唔算嚴重。同年8月1號09:30（UTC+8），造成踩踏事件嗰兩位22歲嘅廣西男人，分别以涉嫌過失，以危險方法危害公共安全罪、窩藏罪而被刑事拘留。

疫情封站

2022年11月9號09:00，呢個站因爆發武漢肺炎疫情而試過封站，因嗰時8號綫重未起好，所以連車都冇得轉，直到同年月26號先至開返，但淨開咗D出入口，而A同C兩個出入口重繼續封閉，直到同月30號晏晝先至開返。

西村站附近有好多間住宅小區，及好多間中小學、克山同西灣路一帶嘅鞋皮具批發城為主，喺8號綫未向北延長到白雲湖之前，呢個站亦係距離白雲區同德圍、增埗最近嘅地鐵站，所以有好多喺西村甚至同德圍、增埗地區住啲人都先搭巴士等公共交通工具到呢個站轉地鐵。呢個站每日都有好多客流出入，尤其喺上落班同返放學高峰都出現客流井噴現象。

呢個站嘅轉車方面，其中：

• 8→5：行扶手梯上到站廳後向西北行，到E出入口附近有條兩岔路，行左邊條通道落去就得。
• 5→8：搵月台中間條扶手梯，上到站廳後向東南行，最後直行直接落去就得。

 

廣州市協和中學

 

廣州市美華中學

 

廣東廣雅中學

醫院

• 荔灣區第二人民醫院

學校

• 廣東廣雅中學
• 廣州市協和中學
• 陳嘉庚紀念中學
• 環市西路小學
• 廣州市協和小學

住宅

• 和平新村
• 富力環市西苑

商場

• 富力國際鞋業商貿
• 若比鄰社區商業中心

寫字樓

• 羊城西灣大廈

教堂

• 西村堂

 

維基同享有多媒體嘅嘢：
Xicun Station

註

攷