蔡克健

傳媒報道佢嘅新聞，唔少都係同佢嘅政治參與（包括正義聯盟）有關。

同李偲嫣/正義聯盟嘅爭議

佢同李偲嫣曾經合作組成政黨正義聯盟，但係去到2016年初，呢個黨陷入內訌，李偲嫣喺3月被舉報涉嫌私吞捐款兼被「罷免」主席一職，但5月嗰陣李偲嫣就反咬佢，話佢盜取「正義聯盟」機密資料同擅自搞公司註冊，涉嫌欺詐，已經向佢採取法律行動，又話佢已經被踢出黨。

正義聯盟黨之後發展成鬧雙胞，分別由李蔡兩個人帶領。而且會同場出現喺一啲活動，例如喺2016年6月6號，七警暗角打人案喺區域法院續審嗰陣，兩邊都帶咗各20人去撐警。

雙方互相攻訐嘅行為，一直延伸落去。去到7月，李偲嫣又入稟法院告蔡克健誹謗。而喺2016年香港立法會選舉入面，李偲嫣用正義聯盟嘅名義參選，但係蔡克健就喺Facebook發文話李偲嫣係一個打著『撐警』參選立法會嘅人，喺8月31號藉「撐警」名義進行疑似賄選，又附上《明報》嘅連結，話佢哋襲擊在場記者同搶記者嘅手機。

開拍反佔中電影計劃失敗

喺2016年，佢計劃開拍針對雨傘革命嘅愛國電影《血傘》，自己編劇同執導，計劃黨內成員都會參與演出，不過套戲一直開唔成。去到2018年8月，香港蘋果日報就報道，蔡克健近日有唔少電影工作，但係就係無《血傘》，有網民就問蔡克健《血傘》係咪爛尾，蔡就話未開拍，然後當網民繼續問，點解咁多愛國愛港人都開唔到，蔡克健只係回覆佢話：「你繼續意淫啦，小心身體呀！」