青衣站(粵拼:cing1 ji1 zaam6;英文:Tsing Yi Station)係香港一個鐵路站,喺青衣島東北面,港鐵東涌綫同埋機場快綫共用呢個站,亦係青衣島唯一嘅鐵路車站,服務島上近20萬居民。
翻新後嘅青衣站A出口 | |
站名 | |
中文名 | 青衣站 |
英文名 | Tsing Yi Station |
站代碼 | TSY |
基本資訊 | |
車站色 | 東涌綫 - 淺墨綠色 機場快綫 - 白色 |
途經路線 | 東涌綫 |
站服務時間 | 0549-0113 尾班車時間 |
接駁交通 | 巴士、小巴 |
車站結構 | |
站類 | 架空 |
月台類 | 側式月台 |
月台數 | 4 |
出口數 | 6 |
其它設施 | 其它無障礙設施 |
地圖 | |
青衣站係個架空站,總共有6層,有4個側式月台,全部月台都裝上月台幕門。地面係私家車上客區、U1層係東涌綫票務大堂、U2層係去香港站方向月台、U3層係閣樓、U4層係去東涌同機場/博覽館方向月台、U6層係停車場。各層都有扶手電梯連接,重有四部𨋢。而且,負責控制港鐵觀塘綫、荃灣綫、港島綫、東涌綫、機場快綫及將軍澳綫運作嘅車務控制中心(OCC),亦都喺入面。
青衣站設有4個大堂,包括喺U1層嘅東涌綫票務大堂、U4層連接青衣城F出口嘅東涌綫大堂、U2層機場快綫抵港月台大堂、以及U4層機場快綫離港月台大堂。由於機場快綫同東涌綫設有兩套獨立收費系統,所以兩條路綫嘅月台同大堂唔可以互通,需要重新出入閘同埋經過車站大堂先可以往返兩個月台。而U4層東涌綫大堂更直接連接青衣城購物商場,因此由F出口大堂非收費區往返其他車站大堂嘅非收費區,需要經過青衣城,否則要經東涌綫收費區往返其他大堂。而家東涌綫嘅入閘機改咗喺U2層(東涌綫往香港方向月台)。
青衣站內有唔同類型嘅商店,例如有麵包糕餅店、時裝店等零售業及醫務所等服務。由於港鐵收費區唔准飲食,因此大部份食肆都唔喺收費區內。
此外,青衣站有唔少自助服務設施,包括中國銀行(香港)及恒生銀行嘅自動櫃員機、自動售賣機、自動照相機等。車站更設有香港郵政郵箱,方便乘客喺車站內寄信。另一方面,由於機場快綫大堂為旅客而設,因此機場快綫大堂嘅非收費區設有公眾洗手間。
青衣站設有4個側式月台,1號同埋2號月台係機場快綫月台,而3號同4號月台係東涌綫月台,所有月台響啟用前已經裝上月台幕門。
喺月台排列上,1號月台(機場快綫往機場或博覽館)同3號月台(東涌綫往東涌或迪士尼綫)位於車站最高一層-U4層,呢兩個月台亦係港鐵系統中海拔最高嘅月台;而2號月台(機場快綫往香港)同4號月台(東涌綫往香港)位於U2層。雖然機場快綫同東涌綫月台喺同一層,但每層兩個月台中間嘅路軌有石屎牆分隔,所以儘管兩條路綫路軌並排排列,但係唔能夠互望兩邊月台。
青衣站嘅機場快綫離境同埋抵港月台設有免費嘅Wi-Fi熱點,由電訊盈科提供服務,乘客可以喺等車嗰陣透過手提電腦或者個人數碼助理(PDA)上網。
東涌綫 | ||
香港 - 九龍 - 奧運 - 南昌 - 荔景 - 青衣 - 欣澳 - 東涌 |
機場快綫 | ||
香港 - 九龍 - 青衣 - 機場 - 博覽館 |
青衣站係東涌綫同機場快綫嘅轉車站。喺繁忙時間,有唔少乘客會用呢個站轉車,主要往返港島、九龍、新界、離島區、香港國際機場以及亞洲國際博覽館。
青衣站位於青衣島,主要服務服務島上近20萬居民,但實際得大約4萬名居民可以喺15分鐘內行過去車站,其餘島上居民都要轉駁其他交通公具往返青衣站。區內住宅樓宇林立,加上青衣城商場嘅人流,出入閘人次方面更係東涌綫之冠。因此,港鐵為青衣站進行改善工程,好似加裝扶手電梯連接大堂及月台,更改入閘機及收費區位置,於U2月台層新增G出口連接青衣城同大幅增加商店等。
由於繁忙時間有龐大人流來往香港站同埋青衣站之間,因此港鐵喺禮拜一至禮拜五嘅上、下晝繁忙時間同禮拜六上晝繁忙時間,加開東涌綫嘅短程班次往來青衣站至香港站。
青衣站於1998年6月22號隨著東涌綫通車而正式啟用。
通車初期,青衣站只有A、B及C出口。及後為方便乘客直接前往青衣城,前地鐵公司於U4層嘅東涌綫3號月台加設F出口連接青衣城。F出口啟用初期只設出閘機,及後至增設入閘機。其後,港鐵公司再於U2層東涌綫4號月台增設G出口連接青衣城,並將東涌綫出入閘設施由U1層大堂遷移至U2層嘅東涌綫4號月台旁。G出口於2009年12月18號啟用。
上一站 | 港鐵 | 下一站 | ||
---|---|---|---|---|
往香港 | 東涌綫 | 往東涌 | ||
往香港 | 機場快綫 | 往博覽館 |
月台 | 方向 | 列車班次(分鐘) | 頭班車 | 尾班車 | |||||
---|---|---|---|---|---|---|---|---|---|
平日上晝 繁忙時段 | 平日下晝 繁忙時段 | 星期六上晝 繁忙時段 | 星期六下晝 繁忙時段 | 星期六 非繁忙時段 | 平日非繁忙時段/ 星期日及公眾假期 | ||||
This article uses material from the Wikipedia 粵語 article 青衣站, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.