泰國少年困山窿意外喺2018年6月23號發生,泰國清萊府一隊少年足球隊13人喺泰國第4大山窿「睡美人洞」(Tham Luang Nang Non)探險,因為落大雨、山窿水浸而失蹤。泰國政府派咗大班人去搜救,英國、美國、中國、澳洲等國亦有派救援隊幫手。
喺洞穴入口嘅救援人員同設備 | |
日期 | 2018年6月23號 | – 2018年7月10號
---|---|
地點 | 泰國清萊府睡美人洞 |
坐標 | 20°22′21″N 99°51′03″E / 20.37250°N 99.85083°E |
起因 | 強烈季風造成嘅暴雨淹沒山洞 |
結果 | 失蹤9日後12位少年同埋教練搵返,,最終全部成功救出山窿 |
死亡人數 | 1個潛水員 |
7月2號,足球隊失蹤9日後,英國潛水員喺山窿好深嘅地方搵到所有失蹤者,個個都冇事。但係撞啱雨季,好難將佢哋全部救出。
7月8號晚,政府展開第一波救援行動,4個少年甩難。用前後包夾嘅方法,兩個泰國海豹部隊隊員帶一個少年,潛水出洞。7月9號,第二波救援行動救多4個少年。7月10號,事發第18日,第三波救援行動救埋剩低5個,噉就全部救返晒。
總共13人困喺山窿。其中12人係少年足球隊「野豬隊」(泰文:ทีมหมูป่าอะคาเดมี)隊員,年齡介乎11至16歲,仲有1人係25歲嘅教練查塔汪(Ekapol Chanthawong)。
被困嘅13人最後全部成功救出。但意外造成1名救援人員死亡。
潛水員 Saman Kunan 係泰國海豹部隊退役隊員。7月5號佢送氧氣樽入山窿,返轉頭嗰時,半路冇晒氧氣而犧牲。佢嘅死促使泰國軍方重新研究救援方案,避免再有人出事。
除咗泰國自己,美國軍方、英國、澳洲、老撾、緬甸、中國都有派人到現場協助救援。
頭兩日先救出嘅8個𡃁仔,冇人發燒。佢哋一出山窿即刻戴太陽眼鏡保護對眼,因為佢哋逗留喺黑鼆鼆嘅環境十幾日,對眼無法承受出面日頭嘅強光。幾個𡃁仔體溫偏低。有一個𡃁仔送醫嗰陣心跳頻率偏低。
所有人離洞後,立即送到醫院隔離7日。因為佢哋長期留喺山窿,洞中環境濕冷、昏暗、唔通風,期間亦冇乜點進食,因此必須觀察佢哋有冇感染洞穴相關嘅疾病,譬如有冇俾寄生喺蝙蝠排泄物嘅菌類感染,以及觀察皮膚擦傷同割傷嘅復原狀況。另外,有兩個𡃁仔肺部疑似出現感染症狀,醫院已同佢哋打咗抗生素。
家陣有部分人可以同親屬會面,但為咗確保佢哋唔會傳染疾病,佢哋只能夠隔住玻璃見人。或者,親屬必須著防護衣,距離必須相隔兩米。
泰國正值雨季,連日暴雨令山窿水位持續升高,每個鐘可以上升15公分,有啲地方積水深達5米。洞內泥水污濁,增加潛水員救援難度。即使泰國政府調來大型水泵同水管抽水,但水管經常俾泥石樹葉之類嘅雜物堵塞,抽水速度又唔夠落雨水浸快。
鄰近農民受抽水影響,抽出來嘅污水排落農田,導致過百位農夫嘅農田同作物謝雞,影響範圍遍及2.2平方公里嘅稻田。
睡美人洞全長十幾公里,係泰國第4長洞穴,全世界最難導航嘅洞穴之一。通道崎嶇狹窄,至今都未有人能夠行晒全程。面對複雜嘅洞穴地形,英國潛水專家指出,「呢個窿嘅構造唔係太複雜,但係好長,通道大細不一,落雨增加救援難度。」
雖然足球隊受困地點距離山窿入口僅4公里,但係落大雨造成水浸,並非每一橛都行到人,其中2.5公里需要潛水或游水,有啲地方水深十幾米。要行晒成條路,專業潛水員單程都要6個鐘(往返11至12個鐘),更何況唔識水性、啱啱開始學潛水嘅𡃁仔。加上足球隊喺窿入邊困咗幾日,體力不佳,或心理承受能力有限,所以長時間潛水係好大挑戰。如果初學者喺潛水過程一時驚慌或失誤,恐怕會釀成悲劇,連累救援人員。
救援隊試過喺山窿上高掘地道,希望能夠製造一條直通受困地點嘅逃生路線,不過呢個計劃評估唔掂,因為掘窿速度太慢,起好新路線需要時間,仲要大型機械來鑽開岩石。挖之前又必須先調查確認方位,先能夠準確鑽窿。鑽窿過程亦會有崩塌風險。
紐約時報報導,其中一位足球隊員係14歲嘅佤族少年阿杜(Adul Sam-on),喺泰緬邊境出世。佢父母喺佢6歲嗰時將佢送到泰國,希望佢能受到較好嘅教育,脫離家族貧困唔識字嘅遭遇。阿杜同教練查塔汪一樣,係受困者當中3個無國籍少數族裔之一,冇法子攞到任何國家嘅公民身份。阿杜嘅父母8年前將佢送到泰國之後,央求美塞縣一對浸信會牧師夫婦照顧阿杜。阿杜同好多無國籍細路一樣,積極向學。佢識5種語言,泰文、緬甸文、中文、英文同佤族語,喺學校學業同運動成績俱佳,享有免學費同免午餐費嘅待遇。呢一次被困山窿,就係佢好有禮貌噉同最早搵到受困者嘅英國潛水員溝通,說明受困者最需要食物。
「野豬隊」受困消息傳開,興起追究相關人士嘅討論。足球隊員全部都係未成年人,而教練查塔汪(Ekapol Chanthawong)作為成年人,居然帶一大班未成年人喺雨季進入山窿探險,行為輕率,因此耗費龐大社會資源。泰國警方拒絕評論社會傳言,淨係表示會審視本案。
不過,有泰國媒體同網友指出,當時係足球隊員獨自先入山窿探險失蹤,教練喺家長請託底下入洞尋人,點知一齊被困。因此教練對於少年受困並冇責任,反而多得佢,班𡃁仔先至有命。被困期間,教練有安撫少年情緒,教導少年正確嘅求生知識(譬如打坐躺臥減少能量消耗、禁飲污糟水、採集洞內滲透清水),仲分自己嘢食畀學生,噉先成班捱到救援大隊來到。
This article uses material from the Wikipedia 粵語 article 泰國少年困山窿意外, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.