稀缺

稀缺指嘅係有限嘅資源同理論上無限嘅慾望之間嘅差異：人類有好多慾望，但係就算有咗現代科技，佢哋手頭上嘅資源－錢、時間、精神－都梗係有限嘅，好多時佢哋都冇足夠嘅資源達到嗮佢哋想要達到嘅目的，例如一個人唔夠錢買嗮佢想要嘅嘢，唔夠時間做嗮佢想要做嘅嘢，又或者一間公司唔夠資源生產嗮佢想要生產嘅嘢。因為稀缺嘅問題，人類需要做犧牲，需要放棄某啲嘢，嚟獲得更多佢想要嘅稀缺嘅資源，亦都因為噉樣而有咗競爭，人同人之間會各自犧牲時間精神等嘅資源嚟爭稀缺嘅嘢。舉個例子說明，「人工高嘅工」係一種稀缺嘅資源：好多人都想要賺多啲錢，所以會犧牲時間同精神返工同埋搵人工高嘅工，而高人工嘅職位嘅數量少過想要呢啲職位嘅人嘅數量，所以啲人就要爭，佢哋會有誘因落力，犧牲更多嘅時間同精神為求爭到嗰啲職位^{:p. 105}。

稀缺係經濟學（研究資源分配嘅學問）嘅最根本概念。有好多資源都係稀缺嘅，所以人類要做好多決策，決定點樣運用某啲資源（時間、精神等等）去最大噉滿足自己嘅慾望：一個人會想用自己有限嘅收入滿足最多嘅慾望，好多時又會想要有多啲錢（等自己可以滿足多啲慾望），但係錢係有限嘅，所以人同人之間會爭錢、爭人工高嘅工；一間牟利公司會想用自己有限嘅人力賺最多嘅盈利，又會想要有多啲人力嚟賺多啲盈利，但係優秀人才嘅數量係有限嘅，所以公司同公司之間會爭人才；一個國家會想用自己有限嘅資源（自然資源同土地等）令自己最穩固，又會想要有多啲資源，而世上嘅資源係有限嘅，所以國家同國家會以外交甚至打仗嘅方式爭資源爭土地。呢啲競爭嘅過程迫使決策者要以最有效率嘅方式運用自己手上嘅資源－而經濟學研究嘅重心就係「點樣運用手上資源，最有效率噉達到目的」。

一件稀缺嘅物品因為數量唔夠滿足嗮所有人嘅慾望，所以會有人爭，而呢點令到啲人會肯付出一啲嘢嚟換取呢樣物品，即係話通常會有個價格。稀缺嘅物品包括：

• 黃金
• 麵包等嘅嘢食；
• 乾淨嘅食水，尤其係喺一啲落後嘅國家，乾淨食水好多時係要爭嘅嘢。

世上有一啲資源唔稀缺，好似係空氣就係一個例子，空氣對於地球上嘅生命嚟講不可或缺，但係佢對人類嚟講唔稀缺（雖然對於某啲生物嚟講可能有）：一個正常嘅人類無時無刻一唞就唞到氣，唔使用啲乜嘢時間精神嚟令到自己有氣唞，而且目前地球上嘅空氣充足到不得了，夠嗮人類享用，人類根本冇誘因爭空氣－空氣呢種資源嘅量足夠滿足人對佢嘅需求，所以唔稀缺。由呢個例子亦都睇得出，稀缺同一件物品係咪必需冇必然關係－空氣係生命必需嘅，但因為人唔使爭都可以得到空氣，所以空氣唔稀缺。

• 經濟短缺
• 能源危機
• 後稀缺
• 呢個世上冇免費嘅午餐

• Milgate, Murray (March 2008). "goods and commodities". In Steven N. Durlauf; Lawrence E. Blume (eds.). The New Palgrave Dictionary of Economics (2nd ed.). Palgrave Macmillan. pp. 546–48. doi:10.1057/9780230226203.0657. Retrieved 2010-03-24.
• Montani, Guido (1987). "Scarcity". In Eatwell, J.; Millgate, M.; Newman, P. (eds.). The New Palgrave. A Dictionary of Economics. 4. Palgrave, Houndsmill. pp. 253–54.
• Malthus, Thomas R. (1960) [1798]. Gertrude Himmelfarb (ed.). On Population (An Essay on the Principle of Population, as It affects the Future Improvement of Society. With Remarks on the speculations of Mr. Godwin, M. Condorcet, and other writers). New York: Modern Library. p. 601. Retrieved 2010-03-24.
• Burke, Edmund (1990) [1774]. E. J. Payne (ed.). Thoughts and Details on Scarcity. Indianapolis, IN: Liberty Fund, Inc. Retrieved 2010-03-24.