《猶大福音》(希臘文:Ε᾽ΥΑΓΓΈΛΙΟΝ ΤΟΥ̃ ᾽ΙΟΎΔΑ;拉丁文:ĒVANGELIVM IVDÆ)係一本以科普特文記載嘅神秘主義派福音書,裡面主要記載耶穌同猶大嘅對話。
《聖經》收錄嘅四本福音,都將猶大描寫成出賣耶穌畀羅馬當局嘅反骨仔。但係《猶大福音》嘅記載同《聖經》大相逕庭:根據《猶大福音》,猶大出賣耶穌嘅原因唔係為咗錢,而係因為耶穌叫佢噉做,以幫助耶穌盡早擺脫肉體嘅束縛,釋放神性。
天主教、東正教同新教普遍都認為呢卷書係偽經或異端作品。大部份學者認為呢卷書嘅真確性存有大量疑問。 尤其是呢卷書裏面同其他聖經書卷所描述嘅猶大完全相反。另外呢卷書內容亦充滿諾斯底主義(神秘主義)嘅色彩,並指猶大係唯一得着耶穌真正福音嘅門徒。
最早關於《猶大福音》嘅記載,來自於公元二世紀神學家愛任紐嘅《駁異端》(希臘文:Ἔλεγχος καὶ ἀνατροπὴ τῆς ψευδωνύμου γνώσεως)。爾本書裏面提及到《猶大福音》嘅存在,並且將爾本書同其他神祕主義派福音擺賣一齊批判。
1978年,一位埃及農民喺拿戈瑪第嘅古代山洞裏面,第一次發現徂一批包含《猶大福音》嘅手稿。1979年,爾批手稿落徂喺埃及古董買賣人夏拿手上。之後批手稿曾經被盜,但係後來攈得返。
1983年5月,夏拿邀請徂來自三間美國大學嘅三位學者去瑞士日內瓦,希望能夠將爾批手稿賣畀學術機構。但由於夏拿出價太高,美國學者表示大學出唔到咁多錢,交易最終流產。之後夏拿去到美國,繼續試圖出賣爾批手稿,但幾次談判都因為夏拿出價太高而失敗。夏拿於是將爾批手稿擲徂喺美國紐約州長島一間花旗銀行分行嘅保險箱裏面。早期神學家近兩千年來想做都做唔到嘅事,竟然陰差陽錯恁被夏拿做到徂:紐約長島係沿海城市,氣候潮濕過埃及唔知幾多倍,而銀行保險箱係唔防潮嘅,於是啲手稿就漚著喺個保險箱裏面慢慢腐爛。
2000年4月,瑞士古董買賣人芙列達·查哥斯-努斯伯格(Frieda Tchacos-Nussberger)終於以30萬美金嘅價格買低徂爾批手稿。可惜嘅係,由於長年漚著喺保險箱裏面,好多內容都已經消失澌。查哥斯-努斯伯格嘗試將批手稿轉賣畀耶魯大學,但耶魯大學無買到,淨係話徂俾查哥斯-努斯伯格知:爾批手稿裏面包含徂失傳多年嘅《猶大福音》。查哥斯-努斯伯格之後邀請徂一批專家學者對爾批手稿進行修復、翻譯同碳-14定年,並且成功講服國家地理頻道資助佢。
2006年,國家地理頻道首次公佈徂查哥斯-努斯伯格工作組修復同翻譯嘅《猶大福音》。
This article uses material from the Wikipedia 粵語 article 猶大福音, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.