漫畫

漫畫可以大分為傳統漫畫同現代漫畫兩種。傳統漫畫係指有諷刺、幽默同灰諧嘅味道，文短編幅細，但係有深嘅寓意嘅單幅畫作。現代漫畫係指畫風精細，配合文字堆砌而成，用分鏡嘅方法去表達一個完全嘅故事嘅多幅畫作。

畫漫畫係一門高技術嘅工作：漫畫家係專業畫漫畫嘅人，佢哋首先要識得作故仔，需要對敘事技巧有深入嘅認識，知點樣先可以作出好睇嘅故仔；另一方面，佢哋又要識得畫畫同美術，能夠（例如）畫出似樣嘅圖像同埋設計出讀者會鍾意嘅角色。因為漫畫嘅技術性，想做漫畫家往往要用閒閒地幾年嘅時間讀相關嘅課程或者跟專業嘅漫畫家學師－呢個領域亦都因此有唔少嘅行話詞彙。

漫畫呢家嘢早喺 19 世紀上半橛嗰陣經已存在，而及後喺廿世紀中後期，美國創作嘅美漫同日本創作嘅日漫大受歡迎，令到漫畫流傳到全世界。到咗廿一世紀初，漫畫經已成為咗最受世人歡迎嘅媒體之一，香港都有出香港特色嘅港漫。除此之外，漫畫作為一種講故仔媒介嘅地位仲得到學術界嘅肯定，吸引到創意寫作（creative writing）以及文化研究（cultural studies）等領域嘅學者嘅注意。

• 文學
• 電影

• McCloud, Scott (1993). Understanding Comics: The Invisible Art. Kitchen Sink Press. ISBN 978-0-87816-243-7，一本好出名、用漫畫嚟講「漫畫要點畫」嘅書。