楊千嬅: 香港女歌手、演員

楊千嬅喺嘉諾撒聖家書院中學畢業，跟住入讀護士學校，攞到註冊護士資格。1995年參加新秀歌唱大賽攞第三之後入樂壇，簽約華星唱片。喺2000年約滿後，俾黃柏高邀請入咗新藝寶唱片。2004年，黃柏高喺新藝寶唱片同埋佢嘅聯營公司（正東唱片）度走咗，自立門戶成立金牌娛樂，楊千嬅亦跟住加入。2007年，藝人黎明嘅唱片公司A Music用高價請佢加盟。2010年，楊千嬅重投東亞娛樂旗下嘅華星唱片，同年開世界巡迴演唱會，隻演唱會DVD好賣到攞埋IFPI銷量大獎。

楊千嬅俾人嘅印象係大笑姑婆，乜都會笑一餐，但亦因為佢嘅真性情同埋努力，成功令佢得到觀眾嘅喜愛同埋支持。過去多年，楊千嬅先後多次得到唔同電視台同埋電台所頒嘅我最喜愛女歌手獎項，肯定佢喺香港樂壇嘅地位。

電影方面，楊千嬅第一套擔正女角嘅戲係2001年嘅《玉女添丁》。之後嗰一年，2002年，由楊千嬅同吳彥祖領銜主演嘅《新紮師妹》令佢傻大姐嘅形象更加深入民心。至於近年楊千嬅最為人知而又受熱棒嘅電影作有《志明與春嬌》系列嘅三套電影。2019年，楊千嬅以第一女主角身份，首次同天王影帝郭富城合作拍攝電影《麥路人》，入圍《第32屆東京國際電影節》「亞洲未來」單元。楊千嬅同郭富城，仲有導演黃慶勳喺10月出席《麥路人》全球首映及分享會。

個人生活方面，楊千嬅2009年同丁子高結婚，2012年中生咗個仔。

電影

電視劇

個人演唱會

 

音樂會 / 其他演唱會

因應佢本身嘅知名度，楊千嬅嘅演技同歌藝有時會成為香港人討論嘅對象，但係更加爭議嘅係佢嘅政治立場，仲有關於佢借運嘅指控。

政治立場相關

喺香港反送中運動入面，佢一度以R.I.P弔念喺運動期間墜樓身亡嘅抗爭者，但之後貼文遭刪除，佢話自己嘅Instagram俾人盜用，仲發表愛國聲明。去到2019年12月，佢參與澳門回歸20年文藝晚會嘅演出，喺全國直播之下，佢代表香港嘅歌手同中國國家主席習近平握手，結果引嚟好多網民嘅批評，甚至引用佢其中一首歌《烈女》嘅歌詞，話佢已經變成奸妃。

去到2021年1月，網絡媒體幫港發聲搞咗一個「滴答樂壇我最討厭的頒獎禮」，楊千嬅喺網民投票當中，攞到95,322票，成為「我最討厭的女歌手」，得票係第二至第五名（肥媽、劉美君、黎瑞恩同埋譚嘉儀）得票總和嘅兩倍。

被指「借運」

楊千嬅曾經被指唔止一次為咗事業有起色而借運，其中第一次係喺佢咗出道，佢第一隻碟唔賣得面臨被唱片公司放棄，跟住就搵咗茅山術士幫手向觀音借運。而曾經為商人龔如心種生基嘅風水師傅俞志麟亦自爆自己曾經為楊千嬅種生基借運。而去到2011年，楊千嬅又被指為咗生仔再次借運。不過，呢啲說法就被楊千嬅否認。

 

維基同享有多媒體嘅嘢：
Miriam Yeung

• 楊千嬅嘅Instagram頁
• 楊千嬅嘅facebook頁
• 楊千嬅嘅新浪微博
•   YouTube上面嘅楊千嬅嘅頻道
• 楊千嬅喺互聯網電影資料庫嘅資料（英文）
• 楊千嬅喺香港影庫嘅資料（香港繁體）
• 楊千嬅喺時光網嘅資料（大陸簡體）
• 楊千嬅喺豆瓣電影嘅資料（簡體中文）