大中華地區 國語

其實，國語、普通話、華語等詞語嘅定義好多時都會有混淆。好多人將國語、普通話、北京話、臺灣話等名稱互換而用，甚至以為華語等同中文或某種漢語。以下係正式官方嘅定義：

國語，全稱中華民國國語，建基於北方官話嘅北京口音，經人為規範，由中華民國教育部國語推行委員會規範同推廣。國立編譯館主編、正中書局出版嘅一部編大專用書《國語》內所解釋，國語分廣義同埋狹義嚟講，茲改述如後：「對外文嚟講，國內各個民族嘅一切語言同埋文字，可以統稱做廣義嘅國語；向本國，對方言嚟講，就指國家選定以北京地方嘅現代音系做標準音嘅標準國語，係狹義嘅國語，對內用以通行各地，對外作為國家語言嘅代表。」

普通話，亦係所謂嘅標準官話，建基於北方官話嘅北京口音，經人為規範，按照1956年2月6號中華人民共和國國務院發出關於推廣普通話嘅指示，就係「以北京語音為標準音，以北方話為基礎方言、以典範嘅現代白話文（中文：官話白話文）著作為文法規範。」由中華人民共和國政府向全國（唔包括香港、澳門）推廣。根據香港基本法同澳門基本法，中央政府冇喺香港、澳門兩個特別行政區推廣普通話呢方面嘅角色，但兩地政府以及民間機構都會透過唔同渠道推廣普通話。

華語，本來指漢語，包含粵語、客語、官話等等多種漢語族語言，香港同廣東等地區到今日都依然係噉解。不過經過八十年代，新加坡同馬來西亞狹化用嚟指規範化官話，排斥粵語、客語等其他漢語仲貶低佢哋做「方言」。新加坡華語、馬來西亞華語語音多數取自北京話。所以，用「華語」嚟專指規範化官話，有承認呢種排斥嘅意味，有歧視粵語同其他漢語族語言嘅嫌疑，對粵語同其他漢語族語言唔公平。

漢語，指成個漢藏語系漢語族，當中包含粵語、客語、贛語、閩語支、吳語、湘語、官話、晉語等等多種唔可以互通嘅語言。當中嘅閩語支又分閩東語、莆仙語、閩南語、閩中語、閩北語等。不過大陸有啲字詞偷換概念，例如「現代標準漢語」同「漢語拼音」等等，明明係指規範化官話，偏偏用「漢語」嚟命名，反映住「官話霸權」嘅思想，對粵語同其他漢語族語言唔公平。

• 標準官話
• 普通話拼音
• 兩文三語