Sŷnnagogue

• Cotentinais : eune synagôgue
• Guernésiais : énne synagogue
• Jèrriais : un sŷnnagogue
• 

Prîncipalement, ch'est eune maîson d'priéthe mais nou peut y trouver étout ofûche des offices, salles dé conmité et salles dé clâsse.

Dé couôteunme, un sŷnnagogue est mênagi par un conmité êlu par les membres d'la congrégâtion. Nou peut appouainté un rabbîn, tch'est un maît' dé louai r'ligieuse (i' n'est pon un minnistre), mais un sŷnnagogue peut m'ner des sèrvices sans aver un rabbîn à prêchi. Chein tch'est nécessaithe pouor un service Juis, ch'est un minyan (lé maîndre nombre) dé dgiêx hoummes (ou hoummes et femmes dans des sŷnnagogues tchi n'sont pon Orthodoxes). Lé minyan peut încliuthe un chanteux tchi chante lé sèrvice; autrément l'conmité du sŷnnagogue peut empliyer un chanteux d'mêtchi - sustout pouor les grandes fêtes.

Dans les touos vièrs temps, les sèrvices des Juis prannaient pliaiche dans l'Templ'ye à Jérusalem, et les Juis avaient à y viagi sustout ès grandes fêtes. Quand l'preunmié Templ'ye, lé chein d'Salomon, fut dêtruit, et pus tard quand l'chein dé Hérode fut passecrit, les Juis eûtent à trouver un mouoyen d'louangi l'Bouôn Dgieu s'lon lus couôteunme dans les pays ioù qu'il' avaient 'té cachis.

L'sŷnnagogue dé Dura-Europos en Syrie est l'pus vièr bâtisse dé sŷnnagogue tch'existe - i' date dé l'an 244. L'pus vièr sŷnnagogue acouo en allant en Ûrope est l'Vièr-Nouvieau Sŷnnagogue dé Prague (1270).

 

Y a co' de quei à vei' ou à ouï' entou'
les sŷnnagogues
sus les Coumuns à Viquipédie

• Églyise
• Cathédrale
• Mostchie